ទោះចំណងតឹងណែនក៏នៅមានមុខសម្រាបស្រាយបាន!!!
ចំណងមួយកើតចេញជារូបរាងគឺទាល់តែមានអ្នកចង។ អ្នកចងចំណងប្រាកដជាដឹងថា ចងសម្លាប់មុខឬចងមិនសម្លាប់មុខ (ចងតឹងខ្លាំងឬចងធូររលុង)។ ប៉ុន្តែទោះជាយ៉ាងណាក៏ដោយចុះ គ្រប់ចំណងសុទ្ធតែអាចស្រាយបានដូចៗគ្នា ឱ្យតែអ្នកនោះមានចិត្ដចង់ស្រាយ។
ប្រសិនបើអ្នកនោះ ពុំមានចិត្ដចង់ស្រាយចំណងទេ ទោះជាចំណងមានភាពធូររលុង និងងាយស្រួលស្រាយយ៉ាងណាក៏ដោយចុះ ក៏មិនអាចស្រាយបានដែរ។ គួរចាំថា គ្រប់ចំណងតែងមានមុខអាចស្រាយបាន អ្វីដែលសំខាន់នោះយើងចង់ស្រាយវាដែរឬទេ?
ដូចគ្នានេះដែរ គ្រប់បញ្ហាទាំងអស់មិនថាតូចធំលំបាកវេទនាប៉ុនណាក៏ដោយ ដែលបានកើតឡើងសុទ្ធសឹងតែមានហេតុផលរបស់វានៅពីក្រោយ ហើយគ្រប់បញ្ហាឱ្យតែមានចិត្ដចង់ដោះស្រាយ គឺសុទ្ធតែមានមុខអាចដោះស្រាយបានទាំងអស់។
បើទោះជាបញ្ហាខ្លះ វាកើតមានឡើងដោយចេតនាក្ដីឬដោយអចេតនាក្ដី យើងគួរតែស្វះស្វែងរកវិធីសាស្រ្ដណាមួយក្នុងការដោះស្រាយវា និងកុំទុកឱ្យបញ្ហាទាំងអស់នោះធ្វើឱ្យនរណាម្នាក់ ឬក៏យើងផ្ទាល់ ក្ដៅក្រហាយដោយសារតែវាអី។
ខ្ញុំធ្លាប់ប្រឈមមុខនឹងបញ្ហាច្រើនណាស់ដែលបានកើតឡើងចំពោះខ្ញុំ ជួនបញ្ហាដែលកើតមានឡើងមក មិនមែនសុទ្ធតែខ្ញុំជាអ្នកបង្កើតវាឡើងមកនោះទេ។ ជួនអ្នកនេះ ជួនអ្នកនោះ ជួនបុគ្គលិកខ្ញុំអីក៏មានដែរ តែគ្រប់បញ្ហាទាំងអស់នោះដែលកើតឡើង ខ្ញុំពុំដែលគេចវេសក្នុងការដោះស្រាយម្ដងណាឡើយ។ បញ្ហាទាំងអស់នោះ សុទ្ធតែជាមេរៀនជីវិតល្អៗ សម្រាប់ខ្ញុំដែលនាំឱ្យខ្ញុំមានថ្ងៃនេះ។
មួយវិញទៀត ប្រសិនបើយើងជ្រុលផុងជើងជាប់ទៅនឹងអ្វីមួយហើយនោះ យើងត្រូវចេះដកជើងចេញមក និងស្វែងរកវិធីសាស្រ្ដដើម្បីបានដើរទៅមុខបន្ដទៀត ក្នុងទិសដៅដែលយើងបានគ្រោងទុក ដោយពុំត្រូវបោះបង់ចោលឱ្យសោះ នោះយើងនឹងបានដើរទៅដល់គោលដៅ។ ចំពោះបញ្ហានៅក្នុងការប្រកបអាជីវកម្មរកស៊ីជួញដូរវិញក៏មិនខុសគ្នាដែរ ប្រសិនបើយើងដឹងថា គម្រោងការដែលយើងបានដាក់ចេញទៅហើយ នៅមានការឆ្គាំឆ្គងខ្វះខាតត្រង់កន្លែងណាមួយ។
ដូច្នេះ យើងត្រូវតែចេះដកថយជំហានសិន ដើម្បីយើងមានពេលវេលាបានគិតពិចារណា និងកែតម្រូវនូវចំណុចខ្វះខាតទាំងនោះឱ្យល្អសិន ទើបអាចធ្វើឱ្យដំណើរការអាជីវកម្មរបស់យើងឱ្យប្រព្រឹត្តិទៅបានដោយរលូន និងអាចទទួលបានជោគជ័យនៅថ្ងៃខាងមុខ៕
ព័ត៌មានថ្មីៗ
