របស់ ៣ ដែលអ្នកក្រចូលចិត្តចំណាយ តែអ្នកមានគេទម្លាប់ជៀសឆ្ងាយមិនលូកទេ
របៀបនៃការចំណាយ និងការដែលមិនចេះគ្រប់គ្រងហិរញ្ញវត្ថុខ្លួនឯង នោះហើយជារណ្តៅមរណៈដែលទាញឲ្យអ្នកធ្លាក់ទៅក្នុងភាពក្រខ្សត់ និងពិបាកនឹងមានបានដូចជាគេខ្លាំងណាស់។ អ្នកមានដែលកើតចេញពីការខិតខំដោយខ្លួនឯង ពួកគេមានការចាយវាយត្បិតត្បៀតខ្លាំងណាស់ ហើយមានរបៀបនៃការចំណាយដ៏ត្រឹមត្រូវ។
ខាងក្រោម Knongsrok បង្ហាញរបស់ ៣ យ៉ាងដែលអ្នកក្រចូលចិត្តចំណាយ តែអ្នកមានគេមិនសូវលូកនោះទេ៖
៣) ការដេញម៉ូដទាន់សម័យ
សំលៀកបំពាក់ គ្រឿងតុបតែងលម្អខ្លួន សុទ្ធតែជារបស់លម្អក្រៅខ្លួន ហើយអ្នកមានពិត គេមិនសូវខ្វល់ពីរឿងហ្នឹងនោះទេ។ បើទោះបីគេស្លៀកឬប្រើប្រាស់របស់ធូរថ្លៃ តែគេសម្លឹងមើលគុណភាពរបស់វា ថាអាចប្រើបានយូរឬអត់។
ខុសពីអ្នកក្រ គឺនឹងកាន់តែក្រ ប្រសិនពួកគេ តាមដេញសេរ៊ី ដេញម៉ូដទាន់សម័យចេញថ្មីឥតឈប់ ហើយពុំបានសម្លឹងពីគុណភាពរបស់វានោះទេ។ ឧទាហរណ៍៖ ទូរស័ព្ទមួយគ្រឿងតម្លៃ ១ ពាន់ដុល្លារ អ្នកមានគេប្រើប្រាស់វា ៣-៤ ឆ្នាំ រហូតដល់វាប្រើលែងដើរក៏មាន តែអ្នកក្រខិតខំសន្សំពីមួយខែទៅមួយខែ ឲ្យតែដល់ឆ្នាំគឺព្យាយាមឡើងសេរ៊ីនឹងគេ ហើយចាយខ្ទង់ពាន់។
២) ការទិញរបស់ដែលស្ទើរតែដូចគ្នា
អ្នកមានគេគិតណាស់ គេសន្សំសំចៃណាស់ បើរបស់នោះមានគុណសម្បត្តិដូចគ្នា ឬប្រហាក់ប្រហែលគ្នា ហើយមិនចាំបាច់សម្រាប់ពួកគេ គឺពួកគេមិនទិញថ្មីឡើយ ពោលបន្តប្រើរបស់ដែលមានស្រាប់នោះដដែល។
ខុសពីអ្នកក្រ វិធីល្ងង់នៃការចំណាយ គឺឲ្យតែត្រូវចាយ គឺចាយ គិតថារកបានមួយខែ ចាយមួយខែហ្នឹងសិនទៅ ពេលអស់ចាំគិតទៀត។ របស់ខ្លះមិនចាំបាច់ទេ តែបើយើងតាមចំណាយដាក់ខែ នោះគ្មានថ្ងៃដែលអ្នកអាចមានបាននឹងគេឡើយ។
១) ទិញអ្វីមួយ ទិញឲ្យត្រូវចិត្ត
អ្នកមានគឺឲ្យតម្លៃទៅលើរបស់ដែលពួកគេបានទិញខ្លាំងណាស់ មិនគិតថា ទិញខុសហើយចាំទិញទៀតនោះទេ។ មួយកាក់មួយសេន្តដែលពួកគេរកបាន ក៏ជាលុយចេញពីកម្លាំងញើសឈាមរបស់ពួកគេដែរ ដូច្នេះហើយមុនទិញរបស់ណាមួយ ពួកគេសម្លឹងមើលគុណភាពជាធំ ចំណូលចិត្តឬតម្រូវការជាការគិតបន្ទាប់ ហើយទៅមើលតម្លៃ ពេលខ្លះដ្បិតបើតម្លៃវារាងខ្ពស់បន្តិចមែន តែបើប្រើប្រាស់បានរយៈពេលយូរ គឺពួកគេទិញរបស់ហ្នឹងតែម្តង គឺទិញឲ្យហើយ មិនចង់ទិញខុសពីរបីដងឡើយ។
ខុសពីអ្នកដែលមានគំនិតក្រ គឺមិនសូវបានសម្លឹងគុណភាពជាធំទេ តែឲ្យតម្លៃលើយីហោ ឲ្យតម្លៃលើសំបកខាងក្រៅ បើស្អាត គឺដឹងតែល្អហើយ បើថ្លៃគឺដឹងតែល្អហើយ មួយទៀតរបស់ខ្លះយកមកមិនសូវជាពេញចិត្តទេ តែចេះតែបង្ខំទិញមួយពេលសិន ហើយសឹមទៅទិញពេលក្រោយទៀតបើថាមិនត្រូវចិត្ត៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
