Man Utd ចង់ប្រើប្រាស់វត្តមានគ្រូថ្មី Rangnick ទាក់បេះដូងយុវជនគ្រាប់ពេជ្រមួយរូប
ក្លឹបបិសាចក្រហម Man Utd មានការជឿជាក់ថា ជុំវិញការចាត់តាំងអ្នកចាត់ការថ្មី លោក Ralf Rangnick នៅពេលខាងមុខ ក្រៅពីបង្កើតផ្លែផ្កាអាចជួយឲ្យក្រុមជោគជ័យឡើងវិញ ជាងនេះលោកក៏នឹងអាចជាឥទ្ធិពលអូសទាញចិត្តកីឡាករវ័យក្មេងរបស់ក្លឹប Borussia Dortmund ឲ្យព្រមផ្ទេរមក Old Trafford ផងដែរ។
នោះគឺយុវជនវ័យ ២១ ឆ្នាំ Erling Haaland ដែលគេត្រូវមានតម្លៃផ្តាច់កុងត្រា ៦៣ លានផោន ចាប់ពីចុងខែមិថុនា ឆ្នាំ ២០២២ ខាងមុខតទៅ។ មានក្លឹបជាច្រើននៅតំបន់អឺរ៉ុប ដែលចង់បានគ្រាប់ពេជ្រខាងលើ រួមទាំង Real Madrid, Chelsea, Man City និង PSG ជាដើម។
យ៉ាងណា United ជឿថា ដោយសារតែ Rangnick លោកធ្លាប់ជានាយកជាន់ខ្ពស់ នៅក្លឹប RB Salzburg ដែលជាអ្នករត់ការចរចាយក Haaland ចេញពីក្លឹប Molde នៅឆ្នាំ ២០១៩ ដូច្នេះជឿថា ទឹកមាត់របស់លោកនឹងមានន័យសារជាថ្មី ក្នុងការបញ្ចុះបញ្ចូលឲ្យ Haaland បដិសេធសំណើក្លឹបយក្សទាំងឡាយ ហើយជ្រើសយកក្លឹប Man Utd។ នេះបើតាមសារព័ត៌មាន Sunday Mirror បានចុះផ្សាយ។
គួរបញ្ជាក់ថា សម្រាប់លោក Rangnick លឺដំណឹងថាបានព្រមព្រៀងកុងត្រារយៈពេល ៦ ខែជាអ្នកចាត់ការនៅក្លឹប Man Utd ហើយបន្តពីផុតកុងត្រានោះ លោកនឹងធ្វើជាទីប្រឹក្សាពិគ្រោះយោបល់ប្រចាំក្លឹប ២ ឆ្នាំបន្ថែមទៀត។ យ៉ាងណាដំណឹងនេះ មិនទាន់ប្រកាសផ្លូវការចេញពីក្លឹបនៅឡើយ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
