កុំឲ្យមានការយល់ច្រឡំ Xavi បញ្ជាក់ច្បាស់ៗ កីឡាករ ២ រូបនេះ អត់សម្រាប់លក់ទេ
កន្លងមកមានដំណឹងថា លោក Xavi Hernandez គិតចង់លក់ចេញ កីឡាករមួយចំនួន ដើម្បីបង្កើតតុល្យភាពនៃចំណូលចំណាយ សម្រាប់ខែមករាខាងមុខ។ ពេលនោះក៏មានឈ្មោះ Frenkie de Jong និង Gavi ជាកីឡាករលេងតំណែងបម្រើផងដែរ តែយ៉ាងណាតាមការបញ្ជាក់ច្បាស់ៗពីអ្នកចាត់ការផ្ទាល់ គឺបានបដិសេធចចាមអារ៉ាមទាំងអស់នោះហើយ។
បញ្ជាក់ថា De Jong សល់កុងត្រាច្រើនឆ្នាំទៅមុខទៀត តែហាងឆេងតម្លៃខ្លួនរបស់គេខ្ពស់ អាចថ្លៃដល់ជាង ៧០ លានអឺរ៉ូ ដូច្នេះក៏កើតមានចចាមអារ៉ាមថា Barcelona ចង់លក់យកលុយចូលក្លឹបខ្លះ។ ដូចគ្នានឹង Gavi កុងត្រាថ្មីរបស់គេមិនទាន់ចុះហត្ថលេខា ដូចជាយុវជនឯទៀត Pedri និង Ansu Fati អ៊ីចឹងក៏មានដំណឹងនៃការចាកចេញ ហើយលឺថា Liverpool, Man Utd និង Chelsea តាមចង់បាន។
ឥឡូវមកមើលការបញ្ជាក់ចេញពីមាត់របស់ Xavi ផ្ទាល់និយាយ៖ "ក្រុមរបស់យើងត្រូវការពួកគេ [De Jong, Gavi] ពួកគេមិនសម្រាប់លក់នោះទេ ជារួមទៅ រឿងចង់លក់អ្នកទាំងពីរនេះ មិនមែនជាអ្វីដែលយើងបានគិតទុកឡើយ"។
គួរបញ្ជាក់ថា Barcelona ក្រោមការដឹកនាំរបស់ Xavi Hernandez ក៏ទើបតែយកឈ្នះទៅលើ Villarreal ៣-១ កាលពីយប់មិញ។ នៅតារាង La Liga អ្នកមានបុណ្យឈរលេខ ៧ មាន ២៣ ពិន្ទុ ចាញ់ ៣ ពិន្ទុធៀបនឹងក្រុម Top 4៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
