ខ្សែការពារ Chelsea ម្នាក់ និយាយចំៗថា តាមបិទ Ronaldo ស្រួលជាងតាមបិទ Messi
ក្លឹបតោខៀវ Chelsea នឹងត្រូវប្រជែងតតាំង Man Utd នៅយប់ថ្ងៃអាទិត្យនេះ ហើយយើងក៏ត្រលប់មករំឭកនូវសម្រង់សម្តីចាស់មួយ របស់ខ្សែការពារ Thiago Silva ដែលធ្លាប់និយាយអំពីការតាមបិទ Cristiano Ronaldo និង Lionel Messi។
ជាការពិត មានភាគរយខ្ពស់ដែលរាត្រីថ្ងៃអាទិត្យ នៅទឹកដី Stamford Bridge នឹងកើតមានការប្រជែងរវាង Silva និង Ronaldo ជាលើកដំបូងនៅ PL។ កន្លងមកកីឡាករប្រេស៊ីលក៏ធ្លាប់ឆ្លងកាត់បទពិសោធន៍លេងទល់តារាឆ្នើមទាំងពីរខាងលើផងដែរ។
Silva ធ្លាប់និយាយថា៖ "ចំណុចខុសគ្នាមួយ គឺត្រង់ថា Messi ពេលយើងតាមបិទគាត់មួយស្មើ ឬ ២ នាក់បិទមួយ គឺនៅតែពិបាកនឹងបញ្ឈប់គាត់បាន តែជាមួយ Ronaldo មិនមែនខ្ញុំថា បិទគាត់វាងាយនោះទេ គ្រាន់ថាបើយើងប្រើប្រាស់កីឡាករម្នាក់តាមបិទគាត់ ម្នាក់ទៀតគ្រប់គ្រងសភាពការណ៍ក្បែរនោះ នោះអ្នកនឹងទទួលបានអារម្មណ៍ថាសុវត្ថិភាពនៅតំបន់ការពារ"។
លោកបន្ត៖ "និយាយទៅ Messi និង Ronaldo គឺជាកីឡាករដែលអាចបង្កើតរឿងអស្ចារ្យ ដូចជា Neymar អីអ៊ីចឹងដែរ តែខ្ញុំជឿ ខ្ញុំជឿជាក់ថា វាជារឿងពិបាកជាងក្នុងការតាមបិទ Messi បើធៀបនឹងការលេងទល់ Ronaldo"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
