ស្រុកខ្មែរស្អាតណាស់! រដូវផ្ការីកនៅតាមជួរភ្នំដងរែក មើលមួយភ្លែតស្មានតែនៅបរទេស!
ឧត្តរមានជ័យ៖ ស្រុកខ្មែរ ត្រូវបានគេប្រសិទ្ធនាមថា ជាទឹកដីសុវណ្ណភូមិ ព្រោះតែប្រទេសតូចតែសម្បូរមួយនេះ មានភោគទ្រព្យបែបធម្មជាតិសព្វបែបយ៉ាង ដែលប្រទេសជិតខាងមួយចំនួនមិនមានដូច ជាពិសេសគឺ ទន្លេ បឹង បួរ សមុទ្រ ព្រៃភ្នំមិនចេះខ្វះ ដែលទាំងនេះគឺជាសម្បត្តិដ៏ថ្លៃថ្លា អាចទាក់ទាញភ្ញៀវទេសចរមកកម្សាន្តយ៉ាងច្រើនក្នុងមួយឆ្នាំៗ។
នៅក្នុងនោះតំបន់កម្សាន្តជាច្រើនបាននឹងកំពុងតែអភិរក្ស និងរៀបចំឱ្យបានល្អជាបណ្តើរៗហើយ ថែមទាំងព្យាយាមផ្សព្វផ្សាយយ៉ាងទូលំទូលាយផងដែរ ដើម្បីស្វាគមន៍ភ្ញៀវទេសចរមកកម្សាន្ត ព្រោះតំបន់ទេសចរណ៍ខ្លះមិនសូវជាមានអ្នកស្គាល់នោះទេ។
ដោយឡែកថ្មីៗនេះរូបភាពប៉ុន្មានសន្លឹក នៃរដូវផ្ការីកនៅតាមជួរភ្នំដងរ៉ែក ខេត្តឧត្តរមានជ័យប្រទេសកម្ពុជា កំពុងតែធ្វើឱ្យគ្រប់គ្នាភ្ញាក់ផ្អើល មិននឹកស្មានថាស្រុកខ្មែរយើងមានធនធានធម្មជាតិស្អាតៗបែបនេះសោះ ព្រោះក្រៅពីមានទេសភាពព្រៃភ្នំជុំវិញដ៏ស្រស់ស្អាត ថែមទាំងមានផ្ការីកស្គុះស្គាល់គួរឱ្យរីករាយចិត្តផងដែរ។
រូបភាពនៃទិដ្ឋភាពដ៏ស្រស់ស្អាតនេះ លោកអ្នកអាចទស្សនាបានដោយការឡើងជណ្តើរទៅកាន់ប្រាសាទខ្នារ ដោយជណ្ដើរចំនួន ១១៨១កាំ លោកអ្នកនឹងប្រទះនឹងទស្សនីយ៍ភាពផ្ការីកអមសងខាងជណ្ដេីរឡេីងលេីភ្នំ រួមជាមួយនឹងធម្មជាតិដ៏ស្រស់បំព្រងជាមិនខាន។
ចង់សាកល្បងទទួលបានភាពអស្ចារ្យមួយនេះកុំភ្លេចមកកម្សាន្តលេងខេត្តឧត្តរមានជ័យម្តងនាពេលថ្ងៃសម្រាក លោកអ្នកនឹងមិនអាចបំភ្លេចបាននូវភាពរីករាយមួយនេះនោះទេ៕
រក្សាសិទ្ធអត្ថបទ៖ ក្នុងស្រុក
ប្រភពរូបភាព៖ Brother Media (សុធីន)
ព័ត៌មានថ្មីៗ
