អគ្គិភ័យនៅស្ទូឌីយោគំនូរជីវចលជប៉ុន សម្លាប់មនុស្សអស់យ៉ាងហោចណាស់២៤នាក់!
នៅប្រទេសជប៉ុន។ គ្រោះអគ្គិភ័យនៅស្ទូឌីយោគំនូរជីវចលក្យូតូជប៉ុន នាថ្ងៃទី១៨កក្កដានេះ បានផ្ដាច់យកជីវិតមនុស្សអស់យ៉ាងហោចណាស់២៤នាក់។ មន្ដ្រីប៉ូលីសជប៉ុន កំពុងតែស៊ើបអង្កេតករណីនេះ ដោយបានឃាត់ខ្លួនបុរសម្នាក់។ ប៉ូលីសដាក់ការសង្ស័យថា បុរសម្នាក់នេះ ជាអ្នកលួចដុតស្ទូឌីយោគំនូរជីវចលក្យូតូ។ ប៉ុន្តែ ថាតើដុតដើម្បីអ្វី? គេនៅមិនទាន់មានចម្លើយសម្រាប់សំណួរនេះនៅឡើយ។
គ្រោះអគ្គិភ័យនៅស្ទូឌីយោគំនូរជីវចលក្យូតូ កើតឡើងនៅវេលាម៉ោងប្រមាណ១០និង៣៥នាទី ម៉ោងនៅក្នុងប្រទេសជប៉ុន។ សាក្សីបានហៅទូរសព្ទទៅកាន់នាយកដ្ឋានពន្លត់អគ្គិភ័យ ដោយគូសបញ្ជាក់ប្រាប់ថា ខ្លួនបានលឺសំឡេងផ្ទុះយ៉ាងខ្លាំងពីជាន់ទីមួយនៃស្ទូឌីយោគំនូរជីវចលក្យូតូ ហើយបន្ទាប់មក ស្រាប់តែមានផ្សែងហុយចេញពីជាន់ទីមួយនោះ។
នៅក្នុងហេតុការណ៍គ្រោះអគ្គិភ័យនេះ មានមនុស្សយ៉ាងហោចណាស់២៤នាក់បានស្លាប់បាត់បង់ជីវិត។ អាជ្ញាធរឲ្យដឹងថា ចំនួនអ្នកស្លាប់អាចនឹងកើនឡើងបន្ថែមទៀត ដោយសារតែមនុស្សមួយចំនួនមិនអាចរត់ចេញពីអគារបានទាន់ពេលវេលា។ ក្រៅពីអ្នកស្លាប់ ក៏មានដែរ អ្នករបួស ដែលមានចំនួនរហូតដល់ទៅជាង៣០នាក់។
គួរជម្រាបថា នៅស្ទូឌីយោកើតហេតុ ប៉ូលីសជប៉ុនបានឃាត់ខ្លួនបុរសម្នាក់ ដែលសង្ស័យថា ជាអ្នកបង្កឲ្យមានគ្រោះអគ្គិភ័យនេះ។ សាក្សីបានរាយការណ៍ប្រាប់ប៉ូលីសថា ជនសង្ស័យរូបនេះ បានចាក់សារធាតុរាវដូចប្រេងសាំងនៅជុំវិញអគារក្រុមហ៊ុនគំនូរជីវចលក្យូតូ មុនពេលបញ្ឆេះភ្លើងដុត។ មកទល់ពេលនេះ ជនសង្ស័យត្រូវបានបញ្ជូនទៅកាន់មន្ទីរពេទ្យ ដើម្បីព្យាបាលរបួសដោយសាររលាកភ្លើង ខណៈការស៊ើបអង្កេតនៅតែបន្តធ្វើ។
ជាការកត់សម្គាល់ ប្រទេសជប៉ុន មានអត្រាបទល្មើសទាបខ្លាំងណាស់ ហើយបទល្មើសដែលមានលក្ខណៈហិង្សា ក៏មានកាន់តែទាបទៅទៀត។ ការប្រព្រឹត្តបទល្មើសដោយចេតនា ត្រូវបានគេចាត់ទុកថា គឺជាបទល្មើសដែលមានលក្ខណៈធ្ងន់ធរមែនទែន ដោយចំពោះករណីបង្កអគ្គិភ័យដោយចេតនានេះតែម្ដង។ ជនប្រព្រឹត្តល្មើសអាចត្រូវតុលាការជប៉ុនកាត់ទោសប្រហារជីវិត ដោយសម្អាងថា ការបង្កអគ្គិភ័យនៅក្នុងប្រទេសដែលផ្ទះប្រជាជនភាគច្រើនសាងសង់ឡើងពីឈើ គឺជាអំពើអុងអាត់និងឃោរឃៅជាទីបំផុត។ កាលពី១១ឆ្នាំមុន តុលាការជប៉ុនបានកាត់ទោសប្រហារជីវិតបុរសម្នាក់ ពីបទបង្កអគ្គិភ័យដោយចេតនា។ ជាអគ្គិភ័យដែលបង្កឡើងនៅខេត្តអូសាកា និងដែលបានសម្លាប់មនុស្សអស់ចំនួន១៦នាក់៕
ប្រភព៖ km.rfi.fr
ព័ត៌មានថ្មីៗ
