ពិតជាព្រះកិត្តិយសណាស់ ដែលព្រះមហាក្សត្រទ្រង់យាងប្រទានភ្លេីងបំភ្លឺប្រទីបដោយផ្ទាល់!!
ភ្នំពេញ : មនុស្សជាច្រេីនបានប្រមូលផ្ដុំគ្នានៅតំបន់ទន្លេចតុមុខ ដេីម្បីមេីលការប្រណាំងទូក ដែលប្រារព្ធបាន ១ ថ្ងៃកន្លងទៅហេីយ នៅមុខព្រះបរមរាជវាំង ។ ចំណែកឯយប់ថ្ងៃទី 10 វិច្ឆិកានេះដែរ នាពេលនេះគេប្រទះឃេីញថា មានមនុស្សជាច្រេីនក៏បានមកទស្សនាសម្រស់រាជធានីភ្នំពេញនាពេលយប់ដែរ ពោលគឺមកមេីលកាំជ្រួច និងប្រទីបស្អាតៗ ។
ក្នុងឱកាសដ៏ពិសេសនៅល្ងាចថ្ងៃអាទិត្យ ១៤កើត ខែកត្តិក ឆ្នាំច សំរឹទ្ធស័កព.ស២៥៦៣ ត្រូវនឹងថ្ងៃទី១០ ខែវិច្ឆិកា ឆ្នាំ២០១៩ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ព្រះអង្គបានសព្វព្រះរាជហឫទ័យ ស្ដេចយាងប្រទានភ្លើងទៀនជ័យលើប្រទីបព្រះបរមរាជវាំង ដើម្បីឱ្យប្រទីបដែលមកពីស្ថាប័នផ្សេងៗចំនួន ១៤ ចាប់ផ្ដើមចេញដំណើរបណ្ដែតឡើងតាមដងទន្លេសាប ពីត្បូងទៅជើង ដែលអមដោយពិធីអុជកាំជ្រួច អបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅថ្ងៃទីមួយនេះ ដោយប្រទីបនីមួយៗពិតជាមានភាពស្រស់ស្អាតខ្លាំងនាពេលរាត្រី។
បន្ថែមពីនេះ ក្នុងព្រះរាជពិធីនោះដែរ មានវត្តមាន សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្ដេច ពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងសមាជិក សមាជិកាព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ នាម៉ឺនសព្វមុខមន្ត្រី រាជវង្សានុវង្ស ឧត្ដមទីប្រឹក្សាព្រះមហាក្សត្រ អង្គទូតនៃបណ្ដាប្រទេសជាមិត្តប្រចាំនៅព្រះរាជាណាចក្រកម្ពុជា ភ្ញៀវជាតិ-អន្តរជាតិ និងប្រជាពលរដ្ឋមកពីបណ្ដាខេត្ត និងរាជធានីយ៉ាងច្រើនកុះករ ។
គួរឱ្យដឹងផងដែរថា ថ្ងៃទី ១ នៃព្រះរាជពិធីបុណ្យអ៊ុំទូក អកអំបុក សំពះព្រះខែ និងបណ្ដែត ប្រទីបនេះ មានការចូលរួមយ៉ាងច្រេីនកុះករពីសំណាក់បងប្អូនមកពីខេត្ត និងរាជធានីភ្នំពេញផ្ទាល់ប្រកបដោយស្នាមញញឹមតែម្ដង ដោយនៅរាត្រីថ្ងៃទីមួយនៃព្រះរាជពិធីបុណ្យអុំទូក បណ្ដែតប្រទីប និងសពះព្រះខែ អកអំបុកនេះដែរ ក៏មានការសម្ដែងសិល្បៈ និងប្រគំតន្ត្រីជូនប្រជាពលរដ្ឋទស្សនាកម្សាន្តនៅតាមទីធ្លាសាធារណៈ មួយចំនួនទៀតនៅក្នុងរាជធានីភ្នំពេញផងដែរ៕
ព័ត៌មានថ្មីៗ
