ស្អាតដល់ម្លឹង! ផ្ទះស្នាក់អ្នកស្រីបូ អមលាំងកំពង់ស្ពឺ មានបរិយាកាសធម្មជាតិប្លែកតែម្ដងសម្រាប់អ្នកស្រលាញ់ជីវិតជនបទ !
កំពង់ស្ពឺ៖ ប្រិយមិត្តច្បាស់ជាស្គាល់ហេីយថាខេត្តកំពង់ស្ពឺ គឺជាខេត្តមួយក្នុងចំណោមបណ្ដាខេត្តដទៃទៀត ដែលមានទេសភាពស្រស់ស្អាតប្លែក ពោលគឺខេត្តនេះជាខេត្តមួយដែលមានទេសភាពធម្មជាតិវាលស្រែវាលស្រូវ ដែលពោរពេញទៅដោយភ្នំព័ទ្ធជុំវិញ ដែលនេះគឺជាបរិយាកាសដ៏ល្អមួយសម្រាប់សុខភាព ។
ជាក់ស្ដែងថ្មីៗនេះកន្លែងស្នាក់នៅមួយកន្លែង នៅអមលាំង ខេត្តកំពង់ស្ពឺ បាននឹងកំពុងតែមានភាពល្បីល្បាញខ្លាំង ថាមានទេសភាពស្រស់ស្អាត ដោយសារកត្តាទីតាំង បរិយាកាស អាកាសធាតុ ដែលអាចឲ្យប្រិយមិត្ត បោះតង់ និងស្នាក់នៅកម្សាន្តបាន ដោយកន្លែងនោះ មានឈ្មោះថា « ផ្ទះស្នាក់អ្នកស្រីបូ» ។
« ផ្ទះស្នាក់អ្នកស្រីបូ» គឺជាផ្ទះស្នាក់នៅបែប Homestay ដែលមានបម្រើសេវាកម្ម ទាំងការស្នាក់នៅបែបជនបទ ការគេងបោះតង់ គេងចងមុង និងបឹងកាឡូផងដែរ ដែលស័ក្តសមបំផុតសម្រាប់អ្នកដែលស្រលាញ់ការរស់នៅបែបធម្មជាតិជាមួយនឹងទេសភាពព្រៃភ្នំពិតៗ ។
ហើយអ្វីដែលទាក់ទាញភ្ញៀវទេសចរនោះគឺ ផ្ទះស្នាក់នៅមួយនេះ មានទាំងហាងកាហ្វេ សួនផ្កាស្រស់ស្អាតលក្ខណៈគ្រួសារ ឯអាហារដែលភ្ញៀវទទួលទានគឺធ្វេីឡេីងដោយម្ចាស់ផ្ទះផ្ទាល់តែម្ដង ហេីយសាច់ស្រស់បន្លែស្រស់ ធានាថាឆ្ងាញ់តែម្ដង ចង់អាំងសាច់បោះតង់ក៏មានមួយកំផ្លេ ។
ជាពិសេស អ្វីដែលអ្នកស្រលាញ់ធម្មជាតិពេញចិត្តនោះ គឺនៅជិតនោះមាន ចំការអំពៅ ទឹកធ្លាក់ ព្រមទាំងភ្នំជ្រៀវទៀតផង ពិតជាត្រូវចិត្តតែម្ដង ពោលគឺមិនខ្វះកន្លែងកម្សាន្តដើរលេងនោះទេ ។
ដោយចំណែកតម្លៃនៃការស្នាក់នៅទៀតសោត ពិតជាមានតម្លៃសមរម្យបំផុត អាចទទួលយកបាន ដូចជា៖
-បោះតង់ មានតម្លៃ 12 ដុល្លារ សំរាប់ ២ នាក់
-ផ្ទះស្នាក់ 6 ដុល្លារ (អាចចងមុងគេងជុំគ្នា)
-បឹងកាឡូ មានតម្លៃ 20 ដុល្លារ ! ។ (សម្រាប់ការកក់ទុកមុនប៉ុណ្ណោះ ដោយសារតែកន្លែងមានកំណត់)។
អ្វីដែលគួរឱ្យកត់សម្គាល់ទៀតនោះ ដោយសារតែទីនោះជាកន្លែងស្នាក់នៅបែបធម្មជាតិ ប្រសិនបើលោកអ្នកទៅស្នាក់នៅ នៅទីនោះកុំភ្លេច គ្រឿងប្រើប្រាស់សំរាប់ងូតទឹកមានដូចជា ច្រាស ថ្នាំដុសធ្មេញ សាប៊ូ កន្សែងពោះគោ ហើយកុំភ្លេចសាគួរ Powerbank ទៅផង ព្រោះភ្លើងមិនមាន ២៤ ម៉ោងនោះទេ ! សំរាប់អាកាសធាតុ គឺត្រជាក់ស្រស់ស្រាយពេញមួយឆ្នាំ តែសម្រាប់រដូវក្តៅ ឬ អ្នកចាញ់ក្តៅអាចយកកង្ហារសាកថ្មទៅសាគួរក៏បានដែរ។
គួរឱ្យដឹងផងដែរថា សម្រាប់ទីតាំងរបស់ « ផ្ទះស្នាក់អ្នកស្រី បូ » គឺមានទីតាំងស្ថិតក្នុងភូមិអូរដា ឃុំអមឡាំង ស្រុកថ្ពង ខេត្ដកំពង់ស្ពឺ ចម្ងាយ ១២០ គីឡូម៉ែត្រពីភ្នំពេញដោយធ្វើដំណើរតាមផ្លូវជាតិលេខ ៥ បត់ឆ្វេងតាមផ្លូវ ១៣៦ នៅឧដុង្គប្រមាណ ៥៣ គីឡូម៉ែត្ររួចចូលទៅកាន់ទឹកធ្លាក់ជ្រាវនៃផ្លូវលេខ ៥៣។ ពីផ្លូវបំបែកលេខ ១៣៦ បត់ស្ដាំតាមផ្លូវ ៥៣ ចម្ងាយប្រមាណ ៤ គីឡូម៉ែត្រ រួចបន្ដតាមផ្លូវលំជិត ៤ គីឡូម៉ែត្រទៀតអ្នកនឹងបានឃើញស្លាកសញ្ញាផ្ទះលោកស្រី បូ នៅខាងស្ដាំដៃ។ ប្រសិនជាមិនច្បាស់អាចចូលទៅឆែក Google Map៖ https://goo.gl/maps/k7mpvNEq5xN2 ឬគណនីហ្វេសប៊ុកផេក Chez Mme BO និងអាចទាក់ទងសាកសួរតាមរយៈលេខទូរស័ព្ទ 081 282 884 ៕
ចុងក្រោយចង់សំណូមពរម្យ៉ាង ដល់អ្នកដែលទៅលេង គឺការថែរក្សាបរិស្ថាន ដោយមិនបោះចោលសំរាមផ្តេសផ្តាស និង ការមិនរំខានដល់អ្នកមកកំសាន្តផ្សេងទៀតដោយការបើក Speaker លឺហួសហេតុ នៅម៉ោងដែលគេត្រូវគេង ! នេះជាសុជីវធម៌ និង កាតព្វកិច្ចរបស់យើងម្នាក់ៗក្នុងនាមជាអ្នកទេសចរ !
រក្សាសិទ្ធអត្ថបទ៖ ក្នុងស្រុក
ប្រភពរូបភាព៖ Chez Mme BO
ព័ត៌មានថ្មីៗ
