មិនបាច់ចំណាយលុយច្រើនលើថ្នាំវីតាមីន! ទទួលទានបន្លែផ្លែឈើទាំងនេះនឹងជួយឱ្យប្រព័ន្ធការពាររាងកាយរឹងមាំទប់ស្កាត់មេរោគ និងវីរុសបានល្អ
ជាទុទៅសុខភាពរាងកាយយើងពិតជាត្រូវការវីតាមីន និងសារធាតុចិញ្ចឹមដើម្បីសុខភាពរាងកាយជាទូទៅទៅហើយ តែសម្រាប់បច្ចុប្បន្ននេះមេរោគ និងវីរុសជាច្រើនបាននឹងកំពុងតែរាលដាលនោះ ការផ្តល់សារធាតុមានប្រយោជន៍ចំពោះរាងកានកាន់តែជារឿងចាំបាច់ដាច់ខាតទៅទឿត ពោលគឺដើម្បីឱ្យប្រព័ន្ធភាពស៊ាំការពាររាងកាយរឹងមាំអាចទប់ទល់មេរោគ និងសម្លាប់វីរុសបាន។
នៅក្នុងនោះអ្នកក៏មិនចាំបាច់ផ្អើលតាមគ្នាទិញគ្រាប់ថ្នាំវីតាមីន ឬអាហារប៉ប៉នផ្សេងៗនាំតែអស់លុយច្រើនទេ អ្នកគ្រាន់តែទទួលទានប្រភេទអាហារបន្លែផ្លែឈើទាំងនេះឱ្យបានទៀងទាត់ក៏ជួយឱ្យអ្នកមានសុខភាពល្អ និងប្រព័ន្ធការពាររាងកាយរឹងមាំផងដែរ ថែមទាំងចំណាយលុយតិចទៀត ៖
១. ពពួកផ្លែឈើដែលមានជាតិវីតាមីន C
ផ្លែឈើពពួកក្រូច (ក្រូចឆ្នា ក្រូចថ្លុង ក្រូចពោធិសាត់...) ក្រូចវល្លិ (Passion) ត្របែក សុទ្ធសឹងជាបណ្ដុំផ្លែឈើដែលសម្បូរទៅដោយវីតាមីន C អាចជួយជម្រុញប្រព័ន្ធភាពស៊ាំក្នុងរាងកាយឲ្យរឹងមាំល្អ និងជួយការពាររាងកាយពីការចម្លងរោគនានាបាន។ ជាពិសេស វីតាមីន C អ្នកជួយសម្រួលផ្លូវដង្ហើមពីការតឹងច្រមុះពេលផ្តាសាយ និងជួយបំបាត់អាការៈផ្តាសាយធន់ស្រាលបានមួយកម្រិតដែរ។
២. ផ្លែស្វាយ
ផ្លែស្វាយ អាចថាជាស្តេចផ្លែឈើ ដែលសម្បរទៅដោយសារធាតុចិញ្ចឹម និងវីតាមីនជាច្រើនចម្រុះគ្នា ដូចជា ប៉ូតាស្យូម (Poatssium) ម៉ាញ៉េស្យូម (Magnesium) សេលីស្យូម (Selessium) កាល់ស្យូម (Calcium) ដែក (Iron) និងផូសផ្វ (Phosphorus) វីតាមីនB6 វីតាមីន C វីតាមីន E វីតាមីន K និង វីតាមីនផ្សេងៗទៀតដែលល្អចំពោះសុខភាពទូទៅ ថែមទាំងអាចជួយពង្រឹងប្រព័ន្ធភាពស៊ាំការពាររាងកាយ ទប់ស្កាត់ការពាររាងកាយពីមេរោគ បាក់តេរី និងវីរុសផ្សេងៗបានល្អ។
៣. ខ្ទឹមស និងពពួកខ្ទឹមបារាំង
ខ្ទឹមស ត្រូវបានគេចាត់ទុកជាកំពូលអាហារ ឬកំពូលគ្រឿងទេសសម្រាប់អាហារដែលជួយប្រឆាំងអុកស៊ីតកម្ម ជួយប្រឆាំងការរលាកហើម ប្រឆាំងមេរោគ និងបាក់តេរីនានា។ ខ្ទឹមស ត្រូវបានគេរកឃើញទៀតថា ជួយការពារពីអាការៈផ្តាសាយ និងជួយឲ្យប្រព័ន្ធភាពស៊ាំមានដំណើរការល្អប្រឆាំងនឹងមេរោគផ្តាសាយនេះ លើសពីនេះការទទួលទានខ្ទឹមសឆៅ ២ដងក្នុមួយសប្ដាហ៍ (ម្តង ២ ទៅ ៣កំពឹង) ជួយការការពារ និងកាត់បន្ថយហានិភ័យពីជំងឺរលាកសួតបាន។
៤. ខ្ញី ម្ទេស ឬម្រេច
ខ្ញីគឺជាឱសថធម្មជាតិដែលអាចព្យាបាលជំងឺមួយចំនួនបានយ៉ាងមានប្រសិទ្ធិភាព ជួយឱ្យមានសុខភាពល្អ ពង្រឹងប្រព័ន្ធការពាររាងកាយប្រឆាំងនឹងជំងឺ បាក់តេរី និងវីរុសផ្សេងៗ ថែមទាំងព្យាបាលជំងឺផ្តាសាយ បំបាត់អាការៈឈឺបំពងក ចុកពោះ ឬឈឺចុកចាប់ពេលមករដូវជាដើម ហើយវាក៏អាចកាត់បន្ថយការឈឺចាប់តាមសន្លាក់បានផងដែរ។
៥. រមៀត
រមៀតមានសារធាតុប្រឆាំងអុកស៊ីតកម្មខ្ពស់ ប្រឆាំងការរលាកហើម និងការពារការឆ្លងពីពពួកបាក់តេរី និងវីរុសបានខ្ពស់ ថែមទាំងជួយជម្រុញប្រព័ន្ធភាពស៊ាំក្នុងរាងកាយឱ្យរឹងមាំ អាចប្រយុទ្ធប្រឆាំងនឹងជំងឺជាច្រើនមុខ ពិសេសកោសិកាមហារីកផងដែរ។
៦. ផ្លែល្ពៅ
ត្រូវបានគេចាត់ទុកថា ជាអាហារដែលសម្បូរទៅដោយជាតិវីតាមីន A ខ្ពស់ ហេតុដូចនេះ បរិភោគវាទៅមិនត្រឹមតែ ជួយពង្រឹងប្រព័ន្ធភាពសុាំ ប៉ុណ្ណោះទេ ប៉ុន្តែថែមទាំងជួយផ្ដល់ថាមពល ដល់រាងកាយទៀតផង។
៧. បន្លែពណ៌បៃតង
ដូចជាខាត់ណា ស្ពៃខ្មៅ ផ្កាខាត់ណាខៀវ ឬ Broccoli និងបន្លែស្លឹកបៃតងភាគច្រើន គឺសុទ្ធតែផ្ទុកនូវវីតាមីន A និងសារធាតុចិញ្ចឹមជាច្រើន ដែលអាចជួយពង្រឹងប្រព័ន្ធភាពស៊ាំ ក្នុងរាងកាយទប់់ទល់មេរោគ បាក់តេរី និងវីរុសផ្សេងៗបានយ៉ាងល្អ ថែមទាំងធ្វើឱ្យរាងកាយទាំងមូលមានសុខភាពល្អទៀតផង។
សូមរំលឹកផងដែរ ការពិតទៅបន្លែ ផ្លែឈើដែលដាំដុះពីធម្មជាតិ សុទ្ធសឹងតែមានប្រយោជន៍ចំពោះសុខភាពទាំងអស់ និងធ្វើឱ្យប្រព័ន្ធការពាររាងកាយរឹងមាំដូចគ្នាទាំងអស់គ្រាន់តែតិច ឬច្រើនតែប៉ុណ្ណៅះ ដូច្នេះអ្នកអាចទទួលទានបន្លែផ្លែឈើបានទាំងអស់តាមចំណង់ចំណូលចិត្ត តែអាចយកមួយមុខក្នុងចំណោមបន្លែផ្លែឈើខខាងលើបន្ថែមជាអាហារគោលទើបប្រសើរបន្ថែមទៀត៕
ព័ត៌មានថ្មីៗ
