ក្រុមហ៊ុន ស្មាត អាស្យាតា ប្រកាសផ្តល់ជំនួយមូលនិធិ ទឹកប្រាក់ចំនួនមួយលានដុល្លារអាមេរិក ដើម្បីទប់ស្កាត់វីរុសកូវីដ១៩
មូលនិធិនេះត្រូវបានរៀបចំឡើងបន្ថែមពីលើសកម្មភាពនានាដែលក្រុមហ៊ុន ស្មាត អាស្យាតា បានអនុវត្ត ក្នុងនោះរួមមានដូចជា ការដាក់តំឡើងជាបណ្តោះអាសន្នសេវាកម្ម telemedicine ប្រើប្រាស់បច្ចេកវិទ្យាជំនាន់ទី៥ (5G) ការផ្តល់ជូនបន្ថែមសេវាទិន្នន័យ និងយុទ្ធនាការផ្សព្វផ្សាយជាច្រើន។
រាជធានីភ្នំពេញ ថ្ងៃទី៣០ ខែមីនា ឆ្នាំ២០២០៖ ក្រុមហ៊ុន ស្មាត អាស្យាតា ខូ អិលធីឌី បានប្រកាសមូលនិធិដែល មានទឹកប្រាក់ចំនួនមួយលានដុល្លារអាមេរិក ក្នុងការចូលរួមចំណែកជួយទៅដល់រាជរដ្ឋាភិបាលនៃព្រះរាជាណាចក្រកម្ពុជា ដើម្បីដោះស្រាយ ការរាតត្បាតនៃវីរុសកូវីដ១៩។ ចំនួនទឹកប្រាក់នៃមូលនិធិនេះ គឺជាទឹកប្រាក់បន្ថែម ក្រៅអំពីចំនួនទឹកប្រាក់សរុបចំនួន១% (មួយភាគរយ) នៃចំណូលដុលប្រចាំឆ្នាំដែលក្រុមហ៊ុនប្រើប្រាស់សម្រាប់ចំណាយលើកម្មវីធីទំនួលខុសត្រូវ សង្គម (CSR) របស់ខ្លួន។ មូលនិធិនេះ គឺនឹងត្រូវយកទៅប្រើប្រាស់សម្រាប់ជាជំនួយផ្នែកហិរញ្ញវត្ថុដល់សកម្មភាពទាំងឡាយណាដែលមានសមត្ថភាពចូលរួមជួយដោះស្រាយបញ្ហាប្រឈមនានាដែលមានក្នុងព្រះរាជាណាចក្រកម្ពុជា ទាំងក្នុងអំឡុងពេលកំពុងកើតមាន និងក្រោយពេលបញ្ចប់បញ្ហាផងដែរ។
ការផ្តល់ជូនបន្ថែមនេះ គឺត្រូវបានធ្វើឡើងបន្ទាប់ពីក្រុមហ៊ុន ស្មាត រួមជាមួយក្រុមហ៊ុន Huawei បានតំឡើងជាស្ថាពរនូវស្ថានីយបណ្តោះអាសន្នសម្រាប់ជួយទ្រទ្រង់ សម្របសម្រួល និងតាមដានបញ្ហាវីរុសកូវីដ១៩ ជូនដល់ក្រសួងសុខាភិបាលនៃព្រះរាជាណាក្រកម្ពុជា។ នាថ្ងៃទី២៧ ខែមីនា ឆ្នាំ២០២០ មន្ទីពេទ្យមិត្តភាពកម្ពុជា-សូវៀត និងមណ្ឌលសុខភាពចាក់អង្រែ បានតភ្ជាប់បណ្តាញជាស្ថាពរទៅកាន់ក្រសួងសុខាភិបាល សម្រាប់ប្រព័ន្ធទំនាក់ទំនងវីដេអូ (Video Conference) ដោយប្រើប្រាស់ហ្វ្រេកង់ស៍វិទ្យុសាកល្បងបច្ចេកវិទ្យាជំនាន់ទី៥(5G) ដើម្បីធានាឲ្យបាននូវល្បឿនលឿន និងមានសមត្ថភាពខ្ពស់បំផុត។ ការរៀបចំតំឡើងជាលក្ខណៈបណ្តោះអាសន្ននេះ គឺបានក្លាយជាករណីប្រើប្រាស់ដោយផ្ទាល់លើបច្ចេកវិទ្យាជំនាន់ទី៥ (5G) ដំបូងបង្អស់ក្នុងព្រះរាជាណាចក្រកម្ពុជា។
លោក ថូម៉ាស ហ៊ុន នាយកប្រតិបត្តិនៃក្រុមហ៊ុន ស្មាត បានអោយដឹងថា បើទោះបីជាយើងខ្ញុំបានវិនិយោគជាច្រើនរយពាន់ដុល្លារអាមេរិកក្នុងអំឡុងពេលប៉ុន្មានសប្តាហ៍មកនេះក្តី យើងខ្ញុំក៏នៅតែពិនិត្យឃើញថា មានចំនុនជាច្រើនទៀតដែលយើងទាំងអស់ត្រូវរួមគ្នាចូលរួមគាំទ្រ និងដោះស្រាយ។ មូលនិធិមួយលានដុល្លារអាមេរិកនេះ គឺនឹងត្រូវផ្តោតជាសំខាន់ទៅលើគំនិតផ្តួចផ្តើមទាំងឡាយចំពោះវិស័យទាំងបួន រួមមានៈ បច្ចេកវិទ្យាទូរគមនាគមន៍ គមនាគមន៍ និងព័ត៌មាន សម្រាប់ វិស័យអប់រំ ការគ្រប់គ្រងគ្រោះមហន្តរាយ ការក្សាចម្ងាយពីគ្នា និងការរក្សាអនាម័យផ្ទាល់ខ្លួន។ វិស័យឯកជន រួមទាំងវិស័យ សហប្រតិបត្តិការសាធារណៈទាំងអស់ដែលមានចំណាប់អារម្មណ៍ សូមមេត្តារៀបចំគំរោងការរបស់ខ្លួនដើម្បីទទួលបាននូវ កញ្ចប់មូលនិធិក្នុងទំហំទឹកប្រាក់រហូតដល់ ២០០,០០០ (ម្ភៃមឺុនដុល្លារអាមេរិក) យកទៅអនុវត្តគំរោងរបស់ខ្លួន។
យើងខ្ញុំនឹងចាប់ផ្តើមទទួលពាក្យពីថ្ងៃទី៨ ខែមេសា ឆ្នាំ២០២០ តទៅ។ សូមលោកអ្នកដែលមានចំណាប់អារម្មណ៍រៀបចំគំរោងការរបស់ខ្លួនមកកាន់យើងខ្ញុំទៅតាមប្រភេទវិស័យនីមួយៗ។ យើងខ្ញុំនឹងធ្វើការពិនិត្យជម្រុះក្នុងក្របខណ្ឌផ្ទៃក្នុង របស់ក្រុមហ៊ុនជាមុនសិន មុននឹងធ្វើការដាក់ជូនទៅពិនិត្យសម្រេចពីសំណាក់គណៈកម្មាធិការ ដែលមានសមាសភាពមកពី ក្រុមហ៊ុន ស្មាត អាស្យាតា ក្រុមហ៊ុនមេរបស់ក្រុមហ៊ុន ស្មាត (Axiata Group) និងតំណាងពីស្ថាប័ន្នឯករាជ្យផ្សេងៗដទៃទៀត។ សម្រាប់ព័ត៌មានលម្អិតស្តីអំពីមូលនិធិនេះ សូមលោកអ្នកចូលទៅកាន់បណ្តាញទំនាក់ទំនងសង្គមរបស់ក្រុមហ៊ុន Smart Axiata និង Smart For Cambodia ក្នុងរយៈពេលប៉ុន្មានថ្ងៃខាងមុខនេះ។
លោក ថូម៉ាស ហ៊ុន នាយកប្រតិបត្តិនៃក្រុមហ៊ុន ស្មាត អាស្យាតា ក៏បានឲ្យដឹងបន្ថែមទៀតថា ក្រៅតែអំពីការតភ្ជាប់ បណ្តាញទំនាក់ទំនងទៅកាន់មជ្ឍមណ្ឌលមេរបស់ក្រសួងសុខាភិបាលតាមរយៈការប្រើប្រាស់ហ្រ្វេកង់ស៍វិទ្យុបច្ចេកវិទ្យាជំនាន់ ទី៥ ដែលយើងខ្ញុំទទួលបានអាជ្ញាប័ណ្ណសាកល្បងនោះ យើងខ្ញុំក៏បានផ្តល់ជូននូវសេវាទិន្នន័យបន្ថែមជូនដល់អតិថិជន រាល់ពេលនៃការបញ្ចូលទឹកប្រាក់តាមរយៈ (e-top ups) , Smart @Home និងអតិថិជនជាលក្ខណៈក្រុមហ៊ុនទាំងអស់។
ស្របពេលជាមួយគ្នានេះផងដែរ ក្រុមហ៊ុន ស្មាត អាស្យាតា ក៏បាននិងកំពុងចាត់វិធានចាំបាច់នានាចំពោះមុខ ក្នុងទិសដៅធានាឲ្យបាននូវសុខមាលភាពជូនដល់បុគ្គលិកនិយោជិតទាំងអស់ ក៏ដូចគ្នាផងដែរជូនទៅដល់ដៃគូប្រតិបត្តិការ និងអតិថិជនទាំងអស់ តាមរយៈនិយាមនៃការគ្រប់គ្រងនិរន្តរភាពអាជីវកម្មរបស់ខ្លួន។ សកម្មភាពមួយចំនួនដែលបាន និងកំពុងអនុវត្តរួមមាន៖ ការវាស់ស្ទង់កំរិតសីតុណ្ហភាពកំដៅ ការរៀបចំឲ្យមាននូវជែលលាងសំអាតដៃ និតិវិធីសំអាតអនាម័យ តម្រូវឲ្យបុគ្គលិកនិយោជិតដែលបំរើការផ្ទាល់ជាមួយអតិថិជនត្រូវពាក់ម៉ាស់ការពារ ធ្វើការងារពីផ្ទះ លើកពេលវេលាចំពោះកម្មវិធីរបស់ក្រុមហ៊ុនដែលបានគ្រោងទុកពីមុនមក និងធ្វើការប្រជុំតាមរយៈកម្មវិធីឌីជីថល (Virtual) នានា។
លោក ថូម៉ាស ហ៊ុន ក៏បានមានប្រសាសន៍បន្ថែមទៀតផងដែរថា សេវាទំនាក់ទំនងទូរគមនាគមន៍ គឺត្រូវបានកំណត់ជាសេវាកម្មដែលមានភាពចាំបាច់បំផុត ដូចទៅនឹងសេវាអគ្គិសនី និងសេវាទឹកស្អាតផងដែរ សម្រាប់ប្រទេសជាតិនីមួយៗ។ ខណៈពេលដែលយើងខ្ញុំកំពុងបន្តតាមដានយ៉ាងយកចិត្តទុកដាក់បំផុតនោះ យើងខ្ញុំក៏យល់យ៉ាងច្បាស់អំពីភាពចាំបាច់ និងតម្រូវការរបស់អតិថិជនជាច្រើនលាននាក់ ដែលពួកគាត់ទាំងអស់មានការជឿជាក់ និងត្រូវការការតភ្ជាប់ជានិច្ច។ អាស្រ័យហេតុនេះ យើងខ្ញុំនឹងអនុវត្តគ្រប់មធ្យោបាយ ដើម្បីផ្តល់សេវាកម្មជូនដល់អតិថិជនទាំងអស់ ដោយមានការគាំទ្រពីសំណាក់រាជរដ្ឋាភិបាលនៃព្រះរាជាណាចក្រកម្ពុជា ពិសេសក្នុងអំឡុងពេលនៃវិបត្តិដែលយើងទាំងអស់គ្នាបាននិងកំពុងប្រឈមនាពេលបច្ចុប្បន្ននេះ។
សម្រាប់ព័ត៌មានបន្ថែម និងព័ត៌មានថ្មីៗពីកម្មវិធីទំនួលខុសត្រូវសង្គមនិងនិរន្ដរភាពនៃក្រុមហ៊ុន Smart, សូមចូលទៅកាន់ទំព័រហ្វេសប៊ុករបស់ «Smart for Cambodia» តាមរយៈ www.facebook.com/SmartForCambodia ឬចូលទៅកាន់គេហទំព័រ www.smart.com.kh។
អំពីក្រុមហ៊ុន Smart
ក្រុមហ៊ុន Smart Axiata Co., Ltd. ជាប្រតិបត្ដិករទូរគមនាគមន៍ចល័តឈានមុនគេក្នុងព្រះរាជាណាចក្រកម្ពុជា។ បច្ចុប្បន្នក្រុមហ៊ុនបាននឹងកំពុងបម្រើអតិថិជនចំនួន ៨ លាននាក់ ស្ថិតក្រោមស្លាកសញ្ញា “Smart”។ Smart Axiata គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ មានឈ្មោះថា “Axiata Group Berhad” ដែលជាក្រុមហ៊ុនផ្ដល់សេវាទូរគមនាគមន៍ធំជាងគេបង្អស់មួយក្នុងទ្វីបអាស៊ី។
ក្រុមហ៊ុន Smart គឺជាប្រតិបត្តិករទូរគមនាគមន៍ចល័តដែលមានភាពឈានមុខគេបង្អស់ផ្នែកសេវាបច្ចេកវិទ្យាទំនើបទាន់សម័យក្នុងព្រះរាជាណាចក្រកម្ពុជា។ ក្រុមហ៊ុន Smart គឺជាប្រតិបត្ដិករដំបូងបង្អស់ដែលបានដាក់ឲ្យដំណើរការសេវាបច្ចេកវិទ្យាជំនាន់ទី៤ “4G LTE” ក្នុងឆ្នាំ២០១៤ បច្ចេកវិទ្យា 4G+ក្នុងឆ្នាំ២០១៦ បច្ចេកវិទ្យា 4G+ជាមួយ HD Voice (VoLTE) និង 4.5Gក្នុងឆ្នាំ២០១៧។ នៅពាក់កណ្តាលឆ្នាំ២០១៩ Smart បានរៀបចំកម្មវិធីបង្ហាញសាកល្បងបច្ចេកវិទ្យាជំនាន់ទី៥ “5G” ដំបូងគេបង្អស់នៅកម្ពុជាដោយបង្ហាញពីភាពជាអ្នកដឹកនាំផ្នែកសេវាទិន្នន័យចល័ត។ ក្រុមហ៊ុន Smart ក៏មានផ្ដល់នូវបច្ចេកវិទ្យាទូរស័ព្ទចល័តដ៏សម្បូរបែបរូមមាន៖ សេវាបច្ចេកវិទ្យា 2G, 2.5G, 3G និង3.75G ក៏ដូចជាសេវាកម្មទូរស័ព្ទក្រៅប្រទេស (Roaming) ដែលអាចប្រើបានច្រើនជា១៩០ប្រទេស។ Smart បាននឹងកំពុងផ្តល់សេវាគ្របដណ្តប់ក្នុងតំបន់ប្រជាសាស្ត្រច្រើនជាង៩៩% (កៅសិបប្រាំបួន) ភាគរយ នៅទូរទាំងព្រះរាជាណាចក្រកម្ពុជា ។
ក្រុមហ៊ុនក៏កំពុងបម្លែងខ្លួនយ៉ាងសកម្មទៅជាប្រតិបត្តិករបែបឌីជីថល តាមរយៈការផ្ដល់នូវសេវាកម្ម និងកម្មវិធីកំសាន្ដលក្ខណៈស៊ីវិល័យប្រកបដោយភាពច្នៃប្រឌិតជាច្រើន។ នេះរួមបញ្ចូលភាពជាដៃគូជាមួយភាគីអន្តរជាតិនានាដូចជា៖ ក្រុមហ៊ុន Universal Music ក្រុមហ៊ុន Apple និង ក្រុមហ៊ុន Facebook ក៏ដូចជាសេវាកម្មឌីជីថលនានា រួមមាន៖ សេវា SmartLuy សេវាធានារ៉ាប់រងជីវិតឆ្លាតវ័យ សេវា SmartPay សេវា Pleng by Smart សេវា GigaGigs by Smart និងសេវា SmartNas ។ ក្រុមហ៊ុន Smart មានទស្សនៈវិស័យក្លាយជាក្រុមហ៊ុន “លេខ១ និងជាក្រុមហ៊ុនបច្ចេកវិទ្យាទូរគមនាគមន៍ដែលទទួលបានកី្ដស្រលាញ់ពេញចិត្តបំផុត”នៅព្រះរាជាណាចក្រកម្ពុជាត្រឹមឆ្នាំ២០២២ តាមរយៈកម្មវិធីទំនួលខុសត្រូវខ្ពស់លើកិច្ចការងារសង្គម និងកម្មវិធីនិរន្តរភាពនានាសម្រាប់កំណើនសេដ្ឋកិច្ច និងសង្គមជាតិ។
ក្រុមហ៊ុន Smart មានបុគ្គលិកនិយោជិតសរុបប្រមាណជាង១,០០០ (មួយពាន់)នាក់ ក្នុងនោះរួមបញ្ចូលទាំងនិយោជិតក្នុងស្រុក និងនិយោជិតបរទេសដែលកំពុងខិតខំប្រឹងប្រែងឆ្ពោះទៅសម្រេចបេសកកម្មរួមគ្នាក្នុងការផ្សារភ្ជាប់ និង ធ្វើអោយជីវិតកាន់តែប្រសើរឡើង។
Smart ជីវិតរស់រវើក!
ព័ត៌មានថ្មីៗ
