« ស្លឹកគ្រៃគ្រឿង » រុក្ខជាតិមួយបែបដែលមិនសូវមានអ្នកស្គាល់តែមានប្រយោជន៍ខ្លាំងការពារសត្វល្អិត សត្វពិសសាហាវ ថែមទាំងការពារផ្លូវងងឹតទៀត

បើនិយាយពីស្លឹកគ្រៃធម្មតា ប្រហែលជាមានមនុស្សជាច្រើនសុទ្ធសឹងតែបានស្គាល់ថា ស្លឹកគ្រៃគឺជាគ្រឿងទេសន៍របស់ខ្មែរយើងដែលមិនអាចខ្វះបាន ក្នុងរឿងដាំស្ល ធ្វើម្ហូបអាហារ ពិសេសស្លឹកគ្រៃ និងគល់ស្លឹកគ្រៃនេះ ក៏មានប្រយោជន៍ជាច្រើនសម្រាប់សុខភាពក្នុងការទទួលទាន ឬអាចដាំជាទឹកតែគ្រៃស្រស់ៗទទួលទានក៏អាចជំនួយសុខភាព ការពារ និងព្យាបាលផ្តាសាយបានល្អផងដែរ។

ទន្ទឹមនឹងនេះ ការពិតទៅស្លឹកគ្រៃនេះ មានមួយប្រភេទទៀតដែលគេឱ្យឈ្មោះថា «ស្លឹកគ្រៃគ្រឿង» ដែលមានរូបរាង សឹងតែដូចស្លឹកគ្រៃធម្មតាបេះបិទ តែគល់របស់វាមានពណ៌ក្រហមបែកស្វាយ ឯក្លិនវិញគឺឈួលខ្លាំងជាស្លឹកគ្រៃយើងធម្មតា ពោលមិនខុសពីឈ្មោះរបស់វានោះទេ ស្លឹកគ្រៃគ្រឿងនេះ មានក្លិន និងរសជាតិចម្រុះគ្នា ដូចគ្រឿងដែលបុកហើយសម្រាប់ដាំស្លយ៉ាងអីចឹង មានលាយទាំងក្លិន រំដេង រមៀត និងខ្ជាយ...ល.ជាដើម។

«ស្លឹកគ្រៃគ្រឿង» នេះមិនសូវជាមានអ្នកស្គាល់ច្រើនទេ ពោលអ្នកស្រុកស្រែចម្ការខ្លះសឹងតែមិនស្គាល់ផង តែការពិតទៅរុក្ខជាតិមួយនេះពិតជាមានគុណប្រយោជន៍ខ្លាំងណាស់ ដោយគុណប្រយោជន៍ការទទួលទានវាខាងក្នុងដូចគ្នានឹងស្លឹកគ្រៃធម្មតាដែរ តែគ្រាន់តែមិនសូវមានអ្នកទទួលទានដោយសារតែវាមានក្លិនឈួលខ្លាំង តែសម្រាប់អ្នកទាល់ខ្លាំងនៅក្នុងការដាំស្លរកគ្រឿងបុកមិនទាន់ ក៏អាចញីស្លឹកនេះស្លរជំនួសបានមួយពេលៗទៀតផង។

នៅក្នុងកសិកម្ម «ស្លឹកគ្រៃគ្រឿង» ត្រូវបានគេស្គាល់ថាមានគុណប្រយោជន៍ដូចជាថ្នាំការពារសត្វ និងសត្វល្អិតគ្រប់ប្រភេទ ដោយសារតែក្លិនរបស់វា អាចការពារមិនឱ្យសត្វគោ ក្របី ចូលមកបំផ្លាញស៊ីដំណាំ និងស្រូវបានឡើយ ហើយក៏អាចការពារសត្វល្អិតគ្រប់ប្រភេទ រួមទាំងសត្វពិសសាហាវបានថែមទៀតផង។ នៅក្នុងនោះក៏មានកសិករខ្លះដាំ «ស្លឹកគ្រៃគ្រឿង» នេះជុំវិញចម្ការ ការពារសត្វល្អិត សត្វចង្រៃ និងសត្វពិសសាហាវ ឯកសិករខ្លះទៀត បានយក «ស្លឹកគ្រៃគ្រឿង» នេះមកចិញ្ច្រាំឱ្យល្អិតបាចទៅលើដីដំណាំដែលមិនត្រឹមជាជីរឱ្យដំណាំលូតលាស់ល្អ ថែមទាំងការពារសត្វល្អិតថែមទៀតផង។

ចំណែកនៅក្នុងជំនឿរបស់ខ្មែរយើង «ស្លឹកគ្រៃគ្រឿង» នេះ មានប្រសិទ្ធភាពអាចការពារ និងបន្សាបអាគមផ្លូវងងឹតបាន អាចបង្ក្រាប និងការពារខ្មោច ព្រាយ បិសាច និងព្រលឹងអរូបីដែលមិនល្អមានបំណងយាយីបានផងដែរ ពោលមិនខុសពីស្លឹកទទឹមដែលជាជំនឿរបស់ជនជាតិចិននោះឡើយ ដែលគ្រួសារនីមួយៗគួរតែដាំ «ស្លឹកគ្រៃគ្រឿង» នៅមុខផ្ទះ ឬបរិវេណផ្ទះគឺកាន់តែប្រសើរ៕

អត្ថបទ៖ រក្សាសិទ្ធដោយ ក្នុងស្រុក (ហាមធ្វើការចម្លងបន្តដោយគ្មានការអនុញ្ញាតិ)