ទេសភាពដូចក្រាលព្រំ «កំប្លោក ឬត្រកៀតប៉ោង» មួយវាលធំ ឃើញហើយញ័រជើងចង់ទៅថតរូបលេងកម្សាន្តការពិតស្ថិតនៅ ផ្ទះស្នាក់បៃតង ខេត្តសៀមរាបសោះ
កំប្លោក ឬត្រកៀតប៉ោង គឺជាជាស្មៅទឹកពួកត្រកៀត ភិនភាគដូចត្រកៀត ប៉ុន្ដែកាលដែលនៅតូច មានពកផ្ដួចជាប្លោកប៉ោងឡើង បន្ទាប់មកទើបបែកចេញពន្លកជាស្លឹក ព្រោះហេតុនោះទើបហៅថា ត្រកៀតប៉ោង ។ ត្រកៀតមានប្រយោជន៍ច្រើនយ៉ាងណាស់ គឺផ្កាដែលអ្នកខ្លះយកធ្វើជាអន្លក់ ចំនែកឯធាងវាគេប្រើជាបន្លែក៏បាន។ ធាង និងស្លឹកស្រស់គេប្រើជាចំណីឲ្យគោ ក្របីស៊ី។ ធាងវាបើកាត់ហាលថ្ងៃឲ្យស្ងួតហើយប្រើការបានច្រើនប្រភេទ គឺវេញខ្សែចំណង ខ្សែចែវ ធ្វើអង្រឹង ធ្វើកន្ទេល ធ្វើសំពៀត ។ល។
កំប្លោកមានគ្រប់ទិសទីនៅតាមទីកន្លែងដែលមានទឹក ដូចជាស្រះជាដើម ហើយបានកើតកូនកើតចៅច្រើនស្ទើពេញស្រះតែម្តង ។ បើនិយាយពីសម្រស់វិញនោះ គឺថាពិតជារុក្ខជាតិដែលដុះលើផ្ទៃទឹកយ៉ាងស្រស់ស្អាតមែនទែន ដោយពេលនេះទេសភាពផ្កាកំប្លោកមួយវាលធំត្រូវបានគេឃើញថា មានផ្ការីកស្គុះស្គាយស្រស់ស្អាតមែនទែន ដែលមើលទៅពិតមានទេសភាពស្រស់ស្រាយដូចជាផ្ទាំងគំនូរ កម្រាលព្រំ អាចមកទស្សនាកម្សាន្តអារម្មណ៍ ឬថតរូបលេងក៏បាន។
វាលកំប្លោកនេះ ត្រូវបានគេដឹងថាមានទីតាំងស្ថិតនៅ «ផ្ទះស្នាក់បៃតង» ខេត្តសៀមរាប ដោយផ្កានេះរីកបានជិតមួយខែ ហើយអស់ម្តងប្រហែលមួយអាទិត្យក្រោយរីកម្តងទៀត ម្ចាស់កន្លែងបានឱ្យដឹងថាមិនកាត់ផ្កាលក់ ឬប្រើប្រាស់ទេ គឺទុកអោយភ្ញៀវដែលមកកំសាន្តថតរូបលេង ។ ដោយ «ផ្ទះស្នាក់បៃតង»នេះគឺជាកន្លែងស្នាក់នៅបែប Eco អាចគេងស្នាក់នៅជាបន្ទប់បែបស្ទាយ៍ជនបទ អាចចង់គេងបោះតង់ អាចមកអង្គុយទទួលទាននៅកញ្ចុះនៅមាត់ទឹកក៏បាន មានទឹកជ្រោះងូតលេងកម្សាន្ត មកលេងដឹងតែស្រស់ស្រាយអារម្មណ៍ខ្លាំង។
គួរឱ្យដឹងផងដែរថា «ផ្ទះស្នាក់បៃតង » ដែលមានវាល ផ្កាកំប្លោកនេះ មានទីតាំងស្ថិតនៅភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប មានចម្ងាយពីក្រុងសៀមរាប 33km ចូលតាមផ្លូវវត្តត្បែង និងនៅជាប់វត្តស្រះដូនរីក (Google Map ) ដោយអាចទំនាក់ទំនងសាកសួរបន្ថែម ឬកក់ទុកជាមុនតាមរយៈលេខទូរស័ព្ទ 092 300 124៕
ប្រភពរូបភាព៖ ទៅលេងបន្ទាយស្រី/ផ្ទះស្នាក់បៃតង
ព័ត៌មានថ្មីៗ
