ឃើញហើយទំនងណាស់ ឪឡឹកលឿងបន្ទាយស្រី ផ្អែម ឆ្ងាញ់ ប្លែកអារម្មណ៍ ស្រស់ថ្មីពីធម្មជាតិ សមិទ្ធផលថ្មី របស់អភិបាលស្រុកវ័យក្មេងមានសមត្ថភាព
ស្រុកបន្ទាយស្រី ខេត្តសៀមរាប មួយរយៈកន្លងមក មានឈ្មោះបោះសម្លេងជាខ្លាំង នៅក្នុងការរៀបចំភូមិស្ថានស្អាតបាតជាភូមិគំរូ កន្លែងទេសចរណ៍កម្សាន្តអារម្មណ៍ និងការកែច្នៃហេដ្ឋារចនាសម្ព័ន្ធគ្រប់ផ្នែកល្អគួរជាទីទាក់ចិត្ត តាមរយៈស្នាដៃគ្រប់គ្រងក្រោមឱវាទលោកអភិបាលស្រុកវ័យក្មេង ឯកឧត្តម ឃឹម ហ្វីណង់ ។
ហើយថ្មីៗនេះផងដែរ បន្ទាយស្រី បានចាប់ផ្តើមកែទម្រង់នៅក្នុងវិស័យកសិកម្មជាបន្តទៀត ដែលមានដើមឈើហូបផ្លែជាសមិទ្ធផលល្អឥតខ្ចោះជាបន្តបន្ទាប់ ដោយលទ្ធផលផ្លែឈើជាបន្តនោះគឺ ការដាំដំណាំឪឡឹកពណ៌លឿងតែម្តង។
តាមរយៈគណនីហ្វេសប៊ុកផេកឯកឧត្តម ឃឹម ហ្វីណង់ បានរៀបរាប់ពីសមិទ្ធផលថ្មីនេះថា៖ « ឪឡឹកលឿងបន្ទាយស្រី»៖ ផ្អែម ឆ្ងាញ់ ប្លែកអារម្មណ៍ ស្រស់ថ្មីពីធម្មជាតិ!
ក្រុមកសិករនៃគម្រោងកសិទេសចរណ៍សាកល្បងនៅក្នុងស្រុកបន្ទាយស្រី កំពុងតែប្រមូលផលពីការខិតខំប្រឹងប្រែងរបស់ខ្លួន បណ្តើរៗហើយ។ បើទោះជាទើបតែដាំបានក្នុងទំហំជាលក្ខណៈគ្រួសារនៅឡើយ ហើយនៅមានកត្តាបច្ចេកទេសខ្លះទៀតត្រូវកែលម្អបន្ថែម
ឪឡឹកទាំងអស់នេះទទួលបានការពេញចិត្ត និងចាប់អារម្មណ៍ខ្លាំងពីសំណាក់អ្នកពិសា ព្រមទាំងបានឆ្លុះបញ្ចាំងពីសក្តានុពលដ៏ធំនៃការធ្វើកសិទេសចរណ៍នៅក្នុងស្រុកបន្ទាយស្រី និងកាលានុវត្តភាពសម្រាប់អ្នកវិនិយោគផងដែរ។
ជាផ្នែកមួយនៃយុទ្ធសាស្ត្រប្រែក្លាយកសិកម្មនៅក្នុងស្រុកបន្ទាយស្រីឱ្យទៅជាដែនដីកសិទេសចរណ៍ដ៏គួរឱ្យទាក់ទាញមួយ គម្រោងសាកល្បងមួយនេះស្ថិតនៅក្នុងចង្កោមនៃគំនិតផ្តួចផ្តើមជាច្រើនទៀតដែលរដ្ឋបាលស្រុកបានសហការជាមួយអង្គការដៃគូ និងអ្នកបច្ចេកទេសកសិកម្ម ដើម្បីតម្រង់ទិស និងផ្តល់ជំនួយគាំទ្រទាំងផ្នែកបច្ចេកទេស និងផ្នែកទីផ្សារ សំដៅធ្វើយ៉ាងណាឱ្យសហគមន៍កសិករនៅក្នុងស្រុកមានភាពជឿជាក់ និងអាចឈោងចាប់យកសក្តានុពលនៃការធ្វើកសិកម្មសម្រាប់បម្រើឱ្យវិស័យទេសចរណ៍បាន។
កសិទេសចរណ៍ពាក់ព័ន្ធនឹងការដាំកសិផលទាំងឡាយណាដែលមានភាពទាក់ទាញសម្រាប់អ្នកទេសចរ ដូចជាប្រភេទបន្លែ ផ្លែឈើ ឬការចិញ្ចឹមសត្វដែលមានភាពប្លែក ប្រចាំតំបន់ និងតាមបែបធម្មជាតិជាដើម។
ភាគច្រើនតែងលក់បានក្នុងតម្លៃថ្លៃ តែក៏តម្រូវឱ្យមានការចំណាយទុនខ្ពស់ជាងកសិកម្មប្រភេទដទៃទៀតផងដែរ ដែលជាហេតុទាមទារឱ្យមានការតម្រង់ទិស ការលើកទឹកចិត្ត ការផ្សព្វផ្សាយ និងការគាំទ្រដល់ប្រជាកសិករនៅក្នុងស្រុក ព្រោះការផ្លាស់ប្តូរទម្លាប់ និងការព្រមទទួលយកហានិភ័យពីភាពស្រពេចស្រពិលនៃទម្រង់កសិកម្មថ្មី មិនមែនជាភាពងាយស្រួលនោះឡើយ។
តួយ៉ាង ដូចជាការប្តូរពីការដាំឪឡឹកចម្ការដែលពិបាករកទីផ្សារ(មានទំហំតូច គ្រាប់ច្រើន និងពណ៌ផ្កាឈូកស្លេកៗ) មកដាំឪឡឹកពូជ ដែលមានតម្រូវការខ្ពស់សម្រាប់វិស័យទេសចរណ៍ជាដើម(ធំជាង ផ្អែមជាង ពណ៌ដិតជាង និងមានគ្រាប់តិច)។
ក្រៅពីឪឡឹកលឿង នៅមានឪឡឹកពូជប្រភេទផ្សេងៗទៀត ដែលកំពុងស្ថិតក្នុងដំណាក់កាលសាកល្បងផងដែរ។ កន្លងមក គំនិតផ្តួចផ្តើមជាច្រើនត្រូវបានបង្កើតឡើងក្នុងគោលបំណងជំរុញ និងផ្សព្វផ្សាយពីចក្ខុវិស័យកសិទេសចរណ៍ និងបង្កើតឱ្យមានផ្លែឈើតំបន់ និងម្ហូបអាហារតំបន់ ដូចជាការចែក និងដាំដើមឈើហូបផ្លែ(ត្រសក់ផ្អែម ទុរេន សាវម៉ៅ ឪឡឹកពូជ ក្រូចឆៃវ៉ាន់ តាង៉ែន ល្ហុងហូល្លង់ លម៉ើ ខ្នុរការ៉ុត) ការដាំបន្លែធម្មជាតិ និងការចិញ្ចឹមសត្វ (ជ្រូកកណ្តុរ ពពែ មាន់ស្រែ មាន់ព្រៃ ឃ្មុំ) » ។
នេះពិតជាដំណឹងដ៏គួរឱ្យត្រេកអរ និងសាទរជាខ្លាំងនៅក្នុងសមិទ្ធផលកសិកម្មដំណាំក្នុងស្រុកមួយនេះ៕
ព័ត៌មានថ្មីៗ
