អ្នកត្រូវបានជ្រើសតាំងគួរឱ្យកត់សម្គាល់ ៣រូប សម្រាប់ជ័យលាភីពានរង្វាន់ពលរដ្ឋគំរូ Smart
ភ្នំពេញ ថ្ងៃទី០៨ ខែមករា ឆ្នាំ២០២១៖ អ្នករត់រយៈចម្ងាយឆ្ងាយ អ្នកជួយសហគន៍ខ្មែរអ៊ីស្លាម និងអ្នកប្រើប្រាស់ថវិកាផ្ទាល់ខ្លួនដើម្បីផ្តល់ការអប់រំដល់កុមារក្រីក្រ ពលរដ្ឋទាំងនេះគឺគ្រាន់តែជាបុគ្គលមួយចំនួនប៉ុណ្ណោះក្នុងចំណោមអ្នកដែលត្រូវបានជ្រើសតាំងដ៏គួរឱ្យកត់សម្គាល់បំផុតក្នុងកម្មវិធីពានរង្វាន់ពលរដ្ឋគំរូ Smart ឆ្នាំ២០២០។
យុទ្ធនាការស្វែងរកពលរដ្ឋគំរូរបស់ប្រទេសកម្ពុជាបានចាប់ផ្តើមកាលពីខែមុន ហើយថ្ងៃផុតកំណត់នៃការជ្រើសតាំងគឺនៅថ្ងៃទី២២ ខែមករា ឆ្នាំ២០២១។
អ្នកដែលត្រូវបានជ្រើសតាំងជាជ័យលាភីពានរង្វាន់ពលរដ្ឋគំរូ Smart នឹងឈ្នះរង្វាន់ធំជាទឹកប្រាក់ចំនួន ១ម៉ឺនដុល្លារ។
លោក លី តុលា ដែលបានជ្រើសតាំងលោក អួន បឋម ដែលត្រូវបានគេស្គាល់តាមរយៈឈ្មោះក្រៅថា សាយ បានថ្លែងថា៖ “ដោយសារតែសកម្មភាពដ៏អស្ចារ្យរបស់គាត់នឹងបង្ហាញផ្ទាល់ដល់យុវជនថាសកម្មភាពជួយដល់សង្គមសំខាន់ប៉ុណ្ណាមិនថាតូចឬធំក្តី។
ជាក្តីសង្ឃឹមសម្រាប់យុវជនជំនាន់ក្រោយ ជាពិសេសគឺកុមារដើម្បីឱ្យពួកគេទាំងអស់ទទួលបានឱកាសដូចគ្នា ធំធាត់ មានសុខភាពល្អ និងក្លាយជាយុវជនជំនាន់ក្រោយដ៏ល្អ”។
បន្ទាប់ពីដឹងថាលោកត្រូវបានជ្រើសតាំង លោក សាយ បានថ្លែងថា នៅក្នុងខួបកំណើតអាយុ ៣០ឆ្នាំនេះ លោកចង់ធ្វើអំពើល្អមួយដល់ប្រទេសជាតិរបស់គាត់។
លោក សាយ បានថ្លែងថា៖ “សម្រាប់ខ្ញុំផ្ទាល់ គឺមានអារម្មណ៍សប្បាយចិត្តនៅពេលដែលគេបានឃើញនូវអំពើល្អរបស់ខ្ញុំហើយនិងក្រុមរបស់ខ្ញុំ ដែលយើងកំពុងតែស្វះស្វែងធ្វើការរត់ទូទាំងប្រទេស រៃអង្គាសថវិកាទៅជួយដល់មន្ទីរពេទ្យកុមារអង្គរដែលជាសកម្មភាពសង្គមមួយ”។
លោក សាយ បានបញ្ចប់ការរត់ចម្ងាយផ្លូវ ២.២២០គីឡូម៉ែត្ររួចហើយគិតត្រឹមថ្ងៃទី១ ខែមករា ឆ្នាំ២០២១ ជាផ្នែកមួយនៃចំណាយផ្លូវសរុបចំនួន ២.៣៩១គីឡូម៉ែត្រ ហើយលោកគ្រោងបញ្ចប់ការរត់ចម្ងាយផ្លូវដ៏វែងនេះនៅថ្ងៃទី១០ ខែមករា ឆ្នាំ២០២១ខាងមុខនេះ។
លោក អែល ម៉ាត់ ក៏ត្រូវបានជ្រើសតាំងផងដែរដោយសារមានការទទួលស្គាល់លើការងារជំនួយសប្បុរសធម៌ដែលគាត់បានផ្តល់ទៅឱ្យសហគមន៍របស់គាត់។ លោក អែល ម៉ាត់ បានរៃអង្គាសប្រាក់ដើម្បីជួយប្រជាពលរដ្ឋក្រីក្រ កុមារកំព្រា និងមនុស្សចាស់ជរា។
លោក កូប ហាសាន់ ដែលជាអ្នកជ្រើសតាំងលោក អែល ម៉ាត់ បានថ្លែងថា៖ “ខ្ញុំជ្រើសរើសយកគាត់ [អែល ម៉ាត់] នឹងគឺដោយសារគាត់ធ្វើការអត់ចង់បានអ្វីទាំងអស់ សូម្បីតែប្រាក់ខែក៏គាត់អត់មានដែរ។ តែខ្ញុំឃើញគាត់ប្រឹងប្រែងធ្វើមែនទែន”។
បន្ទាប់ពីទទួលបានដំណឹងអំពីការជ្រើសតាំងរូបគាត់ លោក អែល ម៉ាត់ បានថ្លែងថា៖ “ការពិតខ្ញុំគ្មានលុយកាក់ទេ ប៉ុន្តែមានទឹកចិត្ត មានគំនិតមួយចង់អោយអ្នកភូមិអ្នកស្រុកឲ្យមានជីវភាពធូរធារ មានការអភិវឌ្ឍន៍ភូមិឃុំឲ្យមាន”។
លោកបានបន្ថែមថា៖ “បើសិនជាខ្ញុំបានជ័យជំនះ ទីមួយលុយនឹងខ្ញុំមិនយកខ្លួនឯងទាំងអស់ទេ គឺខ្ញុំចែកជួយអ្នកក្រីក្រ ក្មេងកំព្រា ចាស់ជរាមួយផ្នែកធំ”។
អ្នកត្រូវបានជ្រើសតាំងដ៏មានប្រជាប្រិយម្នាក់ផ្សេងទៀតគឺលោក អ៊ុក យុទ្ធ រស់នៅខេត្តក្រចេះ។ អ្នកជ្រើសតាំងចំនួន ៥នាក់ បានជ្រើសតាំងរូបគាត់ដោយសារការងារដែលគាត់ធ្វើជាមួយកុមារក្រីក្រ។
និយាយអំពីមូលហេតុដែលគាត់បានជ្រើសតាំងលោក អ៊ុក យុទ្ធ កញ្ញា ស៊ុន ហុកចរិយា បានថ្លែងថា៖ “មូលហេតុដែលខ្ញុំជ្រើសរើសលោក យុទ្ធ ធ្វើជាពលរដ្ឋគំរូ គឺដោយសារតែគាត់ជួយសម្រួលដល់កុមារនៅក្នុងសហគមន៍ឱ្យមកសិក្សាដោយមិនចាំបាច់បង់ប្រាក់ទៅលើមុខវិជ្ជាភាសាអង់គ្លេស”។
លោក អ៊ុក យុទ្ធ ដែលជាអ្នកសម្របសម្រួលសមាគមខ្មែរដើម្បីអភិវឌ្ឍន៏តាមជនបទ ដែលជាអង្គការសហគមន៍មួយប្រតិបត្តិការក្នុងខេត្តក្រចេះបានថ្លែងថា៖ “យើងផ្ដោតទៅលើកុមារដែលក្រីក្រ កុមារដែលមកពីតំបន់ជិតខាង ដូចជានៅតំបន់ចុងជ្រោយ ក្នុងភូមិអូរឬស្សី១នេះ។ ដោយសារមើលឃើញពីការលំបាកផ្នែកភាសា និងការលំបាកក្នុងវិស័យអប់រំ អញ្ចឹងទើបសម្រេចចិត្តធ្វើកម្មវិធីនេះឡើងដើម្បីជួយដល់ក្មេងទាំងនោះ ជាពិសេសក្មេងដែលមកពីគ្រួសារក្រីក្រ ក្មេងដែលខ្វះអាហារូបត្ថម្ភ ហើយនិងពិបាកក្នុងការអាន”។
លោកបានបន្ថែមថា៖ “បើសិនជាមានឱកាសឈ្នះពិតប្រាកដមែន យើងនឹងយកថវិកានេះមកអភិវឌ្ឍកន្លែងរបស់យើង អភិវឌ្ឍកុមារនៅទីនេះ ឲ្យបានប្រសើរជាងមុន”។
អ្នកជ្រើសតាំងយ៉ាងច្រើនបានផ្ញើការជ្រើសតាំងរបស់ពួកគេសម្រាប់មនុស្សដែលពួកគេជឿថាបានធ្វើកិច្ចការជាច្រើនសម្រាប់ប្រទេសជាតិ អ្នកជិតខាង ភូមិ ឬខេត្តរបស់ខ្លួន។
អ្នកជ្រើសតាំងត្រូវបានអនុញ្ញាតឱ្យជ្រើសតាំងតែមនុស្សម្នាក់ប៉ុណ្ណោះ។ ហើយអ្នកជ្រើសតាំងទាំងនោះត្រូវផ្តល់ព័ត៌មានទំនាក់ទំនងលម្អិតរបស់អ្នកត្រូវបានជ្រើសតាំង ព្រមទាំងការពិពណ៌នាដោយសង្ខេបអំពីអំពើល្អ ដែលជួយឱ្យបុគ្គលរូបនោះត្រូវបានជ្រើសតាំង។
អ្នកជ្រើសតាំងក៏ត្រូវបានស្នើសុំឱ្យផ្តល់រូបថតឌីជីថល ឬវីដេអូទៅតាមជម្រើសរបស់ពួកគេផងដែរ។ អ្នកត្រូវបានជ្រើសតាំងសាកសមបំផុត នឹងត្រូវបានទាក់ទងដោយអ្នករៀបចំកម្មវិធី ដើម្បីស្វែងរកព័ត៌មានបន្ថែមអំពីសាវតារបស់ពួកគេ ព្រមទាំងអំពើល្អដែលជួយឱ្យពួកគេត្រូវបានជ្រើសតាំង។ ក្រោយមក អ្នករៀបកម្មវិធី នឹងចេញផ្សាយព័ត៌មានលម្អិតរបស់អ្នកត្រូវបានជ្រើសតាំងនោះ។ រាល់ការផ្សាយគឺជាឆន្ទានុសិទ្ធិរបស់អ្នករៀបចំការកម្មវិធី។
អ្នករបៀបចំកម្មវិធី គ្រោងនឹងជម្រុះបេក្ខជនមកនៅត្រឹមតែ ១០នាក់ប៉ុណ្ណោះ ដែលពួកគេនឹងមានវត្តមាននៅក្នុងពិធីប្រគល់ពានរង្វាន់។ ជ័យលាភី នឹងត្រូវបានជ្រើសរើសដោយគណៈកម្មការ ដែលមានសមាសភាពបីរូប។ ឈ្មោះសមាសភាពរបស់គណៈកម្មការនឹងត្រូវបានប្រកាសនៅដើមឆ្នាំ២០២១។
កម្មវិធីពានរង្វាន់ពលរដ្ឋគំរូនេះមានបំណងបង្ហាញឱ្យឃើញនូវអំពើចេះជួយយកអាសារគ្នារបស់ប្រជាពលរដ្ឋកម្ពុជានៅក្នុងការប្រាស្រ័យទាក់ទងជាមួយមិត្តភក្តិ អ្នកជិតខាង និងអ្នកផ្សេងទៀតនៅក្នុងសហគមន៍របស់ពួកគេ។
សម្រាប់ព័ត៌មានបន្ថែម សូមតាមដានទំព័រហ្វេសប៊ុករបស់ក្រុមហ៊ុន Smart តាមរយៈ www.facebook.com/smartforcambodiaឬចូលទៅកាន់
គេហទំព័រ www.smart.com.kh។
អំពីក្រុមហ៊ុន Smart
ក្រុមហ៊ុន Smart Axiata Co., Ltd. ជាប្រតិបត្ដិករទូរគមនាគមន៍ចល័តឈានមុនគេក្នុងព្រះរាជាណាចក្រកម្ពុជា។ បច្ចុប្បន្នក្រុមហ៊ុនបាននិងកំពុងបម្រើអតិថិជនចំនួន ៨ លាននាក់ ស្ថិតក្រោមស្លាកសញ្ញា “Smart”។
Smart Axiata គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ មានឈ្មោះថា “Axiata Group Berhad” ដែលជាក្រុមហ៊ុនផ្ដល់សេវាទូរគមនាគមន៍ធំជាងគេបង្អស់មួយក្នុងទ្វីបអាស៊ី។
ក្រុមហ៊ុន Smart គឺជាប្រតិបត្តិករទូរគមនាគមន៍ចល័តដែលមានភាពឈានមុខគេបង្អស់ផ្នែកសេវាបច្ចេកវិទ្យាទំនើបទាន់សម័យក្នុងព្រះរាជាណាចក្រកម្ពុជា។ ក្រុមហ៊ុន Smart គឺជាប្រតិបត្ដិករដំបូងបង្អស់ដែលបានដាក់ឱ្យដំណើរការសេវាបច្ចេកវិទ្យាជំនាន់ទី៤ “4G LTE” ក្នុងឆ្នាំ២០១៤ បច្ចេកវិទ្យា 4G+ ក្នុងឆ្នាំ២០១៦ បច្ចេកវិទ្យា 4G+ ជាមួយ HD Voice (VoLTE) និង 4.5G ក្នុងឆ្នាំ២០១៧។
នៅពាក់កណ្តាលឆ្នាំ២០១៩ Smart បានរៀបចំកម្មវិធីបង្ហាញសាកល្បងបច្ចេកវិទ្យាជំនាន់ទី៥ “5G” ដំបូងគេបង្អស់នៅកម្ពុជាដោយបង្ហាញពីភាពជាអ្នកដឹកនាំផ្នែកសេវាទិន្នន័យចល័ត។ ក្រុមហ៊ុន Smart ក៏មានផ្ដល់នូវបច្ចេកវិទ្យាទូរស័ព្ទចល័តដ៏សម្បូរបែបរួមមាន៖ សេវាបច្ចេកវិទ្យា 2G, 2.5G, 3G និង3.75G ក៏ដូចជាសេវាកម្មទូរស័ព្ទក្រៅប្រទេស (Roaming) ដែលអាចប្រើបានច្រើនជាង ១៩០ប្រទេស។ Smart បាននិងកំពុងផ្តល់សេវាគ្របដណ្តប់ក្នុងតំបន់ប្រជាសាស្ត្រច្រើនជាង ៩៩% (កៅសិបប្រាំបួន) ភាគរយ នៅទូរទាំងព្រះរាជាណាចក្រកម្ពុជា ។
ក្រុមហ៊ុនក៏កំពុងបម្លែងខ្លួនយ៉ាងសកម្មទៅជាប្រតិបត្តិករបែបឌីជីថល តាមរយៈការផ្ដល់នូវសេវាកម្ម និងកម្មវិធីកម្សាន្តលក្ខណៈស៊ីវិល័យប្រកបដោយភាពច្នៃប្រឌិតជាច្រើន។ នេះរួមបញ្ចូលភាពជាដៃគូជាមួយភាគីអន្តរជាតិនានាដូចជា៖ ក្រុមហ៊ុន Universal Music ក្រុមហ៊ុន Apple និង ក្រុមហ៊ុន Facebook ក៏ដូចជាសេវាកម្មឌីជីថលនានា រួមមាន៖ សេវាធានារ៉ាប់រងជីវិតឆ្លាតវ័យ សេវា SmartPay សេវា Pleng by Smart សេវា GigaGigs by Smart សេវា Pi Pay និងសេវា SmartNas។
ក្រុមហ៊ុន Smart មានចក្ខុវិស័យក្លាយជាក្រុមហ៊ុនលេខ១ និងជាក្រុមហ៊ុនបច្ចេកវិទ្យាទូរគមនាគមន៍ដែលទទួលបានកី្ដស្រលាញ់ពេញចិត្តបំផុតនៅព្រះរាជាណាចក្រកម្ពុជានៅត្រឹមឆ្នាំ២០២២ តាមរយៈកម្មវិធីទំនួលខុសត្រូវខ្ពស់លើកិច្ចការងារសង្គម និងកម្មវិធីនិរន្តរភាពនានាសម្រាប់កំណើនសេដ្ឋកិច្ច និងសង្គមជាតិ។
ក្រុមហ៊ុន Smart មានបុគ្គលិកនិយោជិតសរុបប្រមាណជាង ១.០០០ (មួយពាន់) នាក់ ក្នុងនោះរួមបញ្ចូលទាំងនិយោជិតក្នុងស្រុក និងនិយោជិតបរទេសដែលកំពុងខិតខំប្រឹងប្រែងឆ្ពោះទៅសម្រេចបេសកកម្មរួមគ្នាក្នុងការផ្សារភ្ជាប់ និងធ្វើឱ្យជីវិតកាន់តែប្រសើរឡើង។ Smart ជីវិតរស់រវើក!
-ចប់-
ក្រុមហ៊ុន Smart Axiata Co., Ltd.
No. 464A មហាវិថីព្រះមុនីវង្ស ទន្លេបាសាក់ ខណ្ឌចំការមន ភ្នំពេញ កម្ពុជា
ទូរស័ព្ទ: +855 10 201 000
www.smart.com.kh
សម្រាប់ព័ត៌មានបន្ថែម សូមទាក់ទង
លោក គាំ ទីវា
ទូរស័ព្ទ ៖ +855 10 202 271
អ៊ីម៉ែល ៖ [email protected]
ព័ត៌មានថ្មីៗ
