កាន់តែខ្ពស់ កាន់តែត្រូវព្យាយាមជៀសឲ្យឆ្ងាយពីមនុស្ស ៣ ប្រភេទនេះ
កាន់តែឡើងខ្ពស់ អ្នកកាន់តែត្រូវប្រយ័ត្ននៅមនុស្សជុំវិញខ្លួន ព្រោះពួកគេតែងតែចាំមើលនូវទង្វើរបស់អ្នក ហើយគ្មាននរណាដែលរស់នៅដោយមិនទទួលការបៀតបៀនពីមជ្ឈដ្ឋានជុំវិញខ្លួននោះទេ។
មិនថាតែអ្នកឡើងតំណែង ឬទទួលបានលាភធំអ្វីមួយ តាមរយៈការខិតខំប្រឹងប្រែងដោយខ្លួនឯង និងគ្មានការពឹងពាក់អ្នកដទៃ តែអ្នកត្រូវចាំថាការសេពគប់ទៅពេលបន្ទាប់ អ្នកត្រូវប្រយ័ត្នឲ្យមែនទែនជាមួយមនុស្ស ៣ ប្រភេទនេះ ដែលអាចនាំផលអាក្រក់ដល់អ្នកបាន៖
១) មនុស្សមុខ ២
នៅមុខអ្នកនិយាយល្អ នៅក្រោយខ្នងអ្នកនិយាយដើមឈ្ងុយ មនុស្សប្រភេទនេះអ្នកមិនគួររាប់អានទុកជាមនុស្សជំនិតទៅថ្ងៃមុខនោះទេ។
ប្រសិនអ្នកមានរឿងអ្វីទៅចែករំលែកដល់ត្រចៀកពួកគេ នោះអ្នកនឹងអាសាបង់ធំទៅថ្ងៃមុខ ហើយរឿងឬបញ្ហាទាំងអស់ប្រាកដជាសាយភាយទៅដល់ត្រចៀកមនុស្សដទៃទៀតជាក់ជាមិនខាន។
២) មនុស្សដែលមើលឃើញតែប្រយោជន៍
អ្នកខ្លះសម្លឹងការរាប់អានយើង ដោយសារឃើញយើមានប្រយោជន៍អាចជួយទំនុកបម្រុងឬដោះស្រាយបញ្ហាពួកគេបាន លុះពេលផុតទុក្ខបែរខ្នងធ្វើលែងស្គាល់យើងក៏មាន។
មនុស្សប្រភេទនេះក៏អ្នកត្រូវជៀសវាងដែរ ហើយកុំចំណាយពេលឥតប្រយោជន៍ ជាមួយមនុស្សដែលមើលឃើញតែសុខ តែមិនឃើញទុក្ខ។
៣) មនុស្សដែលរង់ចាំសំណាងធ្លាក់ពីលើមេឃ
អ្នកខ្លះខ្ជិលច្រអូស មិនខិតខំប្រឹងប្រែង ហើយរង់ចាំតែសំណាងធ្លាក់ពីលើមេឃ។ ក្នុងពិភពលោកយើងនេះ គ្មានទេលុយ ដែលបានមកដោយមិនឆ្លងកាត់ការខិតខំប្រឹងប្រែង ផ្ទុយទៅវិញបើអ្នកនោះឧស្សាហ៍ព្យាយាម ស្មោះត្រង់នឹងការងារ គឺប្រាកដជាទទួលបានលាភធំមកវិញជាមិនខាន។
ហេតុផលដែលអ្នកមិនគួររាប់អានមនុស្សប្រភេទនេះ ព្រោះពួកគេរមែងគិតពីគំនិតអវិជ្ជមាន ដែលមិនសូវមើលឃើញអ្វីដែលធំទូលាយនោះឡើយ អ៊ីចឹងកុំឲ្យខ្លួនឯងផ្លាស់ប្តូរទៅរបៀបហ្នឹងដែរ បើជៀសបានគួរតែជៀសទៅ៕
រក្សាសិទ្ធិដោយ៖ ក្នុងស្រុក
ព័ត៌មានថ្មីៗ
