មុនរៀបការត្រូវនិយាយគ្នា ១០ រឿងនេះឲ្យហើយ ប្រយ័ត្នពេលក្រោយទឹកភ្នែកទាំងសងខាង
ការចាប់ដៃគ្នារៀបការ មិនមែនចេះចង់ធ្វើ ក៏ថាធ្វើទៅដោយគ្មានការគិតគូរអ្វីឲ្យល្អិតល្អន់នោះទេ ព្រោះជីវិតគូគឺទាមទាររឿងជាច្រើន ដែលខុសពីជីវិតសង្សារ ឬអ្នកលេងសើចធម្មតា ដែលពេលបែកគឺមិនសូវមានបញ្ហាពាក់ព័ន្ធច្រើន ហើយក៏ងាយនឹងបំភ្លេច។
ដើម្បីជៀសវាងមានភាពល្អក់កករនឹងគ្នា គូស្នេហាទាំងអស់មុននឹងសម្រេចចិត្តប្រលូកក្នុងជីវិតអាពាហ៍ពិពាហ៍ អ្នកគួរតែសួរនាំនិងដឹងពីគ្នាឲ្យច្បាស់នូវរឿងទាំង ១០ នេះសិន៖
១០) តើអ្នកនឹងរៀបផែនការណ៍ហិរញ្ញវត្ថុដោយរបៀបណា?
ត្រូវនិយាយគ្នាឲ្យច្បាស់ទុកជាមុន ជៀសវាងពេលការហើយ និយាយគ្នាមិនត្រូវរឿងលុយ។ វាគ្មានអ្វីដែលត្រូវលាក់បាំង ឬអៀនខ្មាសនោះទេ ដោយត្រូវច្បាស់ថា តើលុយដែលរកបាន សន្សំចូលគ្នា ឬត្រូវទុកដាច់ដោយឡែកពីគ្នា ហើយបើជ្រើសរើសបែបណាហើយ សូមកុំអន់ចិត្តអ្វីទាំងអស់។
៩) មានជាប់ជំពាក់បំណុលអ្វីឬអត់?
"បំណុល" ជារឿងដែលមនុស្សជាច្រើនធ្លាប់ជាប់ពាក់ព័ន្ធ ខ្លះដោយសារបញ្ហាគ្រួសារ ខ្លះទាល់ការរកស៊ីអ្វីជាដើម។ ប៉ុន្តែអ្នកក៏មិនគួរលាក់បាំងឬខ្មាសអៀនដៃគូនោះដែរ កុំឲ្យដល់រៀបការហើយបាននិយាយ ហើយបើច្រើនទៀតនោះ វាទៅជារឿងទើសទាល់ជាមិនខាន។
៨) តើនឹងមានផែនការណ៍សន្សំបែបណាខ្លះសម្រាប់គម្រោងក្រោយចូលនិវត្ត?
គ្មាននរណាអាចខិតខំរកស៊ី ឬធ្វើការឲ្យគេមួយជីវិតដល់ថ្ងៃទៅនោះទេ។ មនុស្សគឺត្រូវការ ការសម្រាក ពោលអ្នកគួរគិតគ្នាឲ្យហើយ ថាមានផែនការណ៍បែបណាខ្លះក្រោយពេលចូលនិវត្ត ឬឈានចូលវ័យចំណាស់បន្តិច បន្ទាប់មកអាចចាប់ផ្តើមសន្សំឬរៀបចំជាមួយគ្នាជាបណ្តើរៗបាន។
៧) ចង់បានកូនឬអត់?
មិនចេះតែឲ្យតែមនុស្សស្រលាញ់គ្នា ចង់បានកូនគ្រប់គ្នាទេណា! ខ្លះខាងស្រី ឬខ្លះខាងប្រុស ចង់បានជីវិតបែបសប្បាយតែជាមួយមនុស្សដែលខ្លួនស្រលាញ់ ហើយមិនចង់បានកូនមកលាយឡំក្នុងជីវិតរបស់ពួកគេនោះទេ បែបនេះយើងគួរតែដឹងនិងយោគយល់អំពីតម្រូវការរបស់ដៃគូជាមុន។
៦) តើយើងនឹងបែងចែកការងារគ្នាបែបណាខ្លះ?
មិនមែនឲ្យតែបុរសដែលជាសសរទ្រូងគ្រួសារ អាចរកចំណូលមួយមុខចប់នោះទេ តែក៏មានការងារមួយចំនួនតូចផ្សេងទៀតដែលពួកគេគួរតែជួយភរិយា។ ជៀសវាងមានពាក្យទាស់ទែងគ្នាទៅថ្ងៃខាងមុខ ចូរជជែកពិភាក្សាគ្នាឲ្យបានច្បាស់ ថាបើមានកូន ឬរវល់បន្តិចទៅ ការងារណាខ្លះដែលបងអាចជួយអូនបាន ឬការងារណាខ្លះដែលអូនអាចធ្វើបាន។
៥) មានគម្រោងជួយឪពុកម្តាយទាំងសងខាងបែបណាខ្លះ?
មិនមែនតែបង្កើតក្តីសុខសម្រាប់គ្រួសារមួយហើយចប់ទេ ពោលគឺត្រូវប៉ះប៉ូវទៅឲ្យម្តាយឪពុករបស់យើងដែលជាអ្នកបង្កើតយើងថែមទៀត ព្រោះលោកទាំងពីរជាអ្នកមានគុណដែលមិនអាចកាត់ថ្លៃបាន។ ចំណុចនេះអ្នកគួរតែជ្រើសរើសដៃគូណា ដែលពួកគេបានស្រលាញ់ម្តាយឪពុករបស់អ្នក ដូចជាម្តាយឪពុកបង្កើតទើបល្អ។
៤) ចង់មានគម្រោងទៅរស់នៅទីណា?
អ្នកខ្លះការហើយមិនចង់រស់នៅរួមគ្នាជាមួយម្តាយឪពុកទេ តែខ្លះចង់រស់នៅបានជុំម្តាយឪពុក ព្រោះបានជួយមើលថែពួកគាត់។ អ៊ីចឹងគួរនិយាយគ្នាឲ្យបានច្បាស់លាស់ កុំឲ្យការហើយ និយាយគ្នាមិនត្រូវដល់ថ្នាក់អន់ចិត្តដោយសាររឿងបែបហ្នឹង។
៣) តើគួរចំណាយពេលវេលារួមគ្នាបែបណាខ្លះ?
មនុស្សសុទ្ធតែរវល់រៀងខ្លួន ហើយសម័យឥឡូវមនុស្សស្រីក៏រមែងចូលចិត្តជ្រើសរើសការ បម្រើការងារ នៅស្ថាប័នខាងក្រៅ ដូចស្វាមីរបស់នាងអ៊ីចឹងដែរ។ បែបនេះគួរជជែកដើម្បីដឹងពីពេលវេលាសម្រាក ឬពេលវេលាដែលអាចនៅជាមួយគ្នា ជៀសវាងមានពាក្យថា "ជាប្តីប្រពន្ធតែគ្មានពេលឲ្យគ្នា"។
២) តើអ្នករំពឹងនៅទំនាក់ទំនងបែបណានៅពេលជួបមនុស្សខាងក្រៅ?
គ្មាននរណាចង់បានដៃគូដែលមុខក្រមៅ មិនចេះរួសរាយ ឬសម្តីមិនដឹងធំតូចនោះទេ។ ទោះចំណុចខ្លះវាជាធម្មជាតិដែលពិបាកនឹងកែ តែក៏គួរនិយាយគ្នាឲ្យបានដឹង ពីតម្រូវការនៅពេលជួបជុំមិត្តភក្តិ ឬចាស់ទុំ ថាគួរនិយាយស្តីបែបណា ចេញសកម្មភាពបែបណាឲ្យមើលទៅសមសួន។
១) និយាយពីផែនការណ៍ជីវិតជាមួយគ្នា
តើទៅថ្ងៃខាងមុខក្រោយពេលមានកូនហើយ ចង់ឲ្យកូនចាប់យកជំនាញការងារអ្វី ហើយពេលទៅមុខទៀតចង់បានចៅប៉ុន្មាន ហើយគ្រួសារមួយដែលអ្នកកំពុងគិតនោះនឹងអាចទទួលបានក្តីសុខតាមរយៈវិធីបែបណា? គ្រប់យ៉ាងគឺត្រូវតែគិត ត្រូវតែឈរលើគោលដៅរួម ទើបជីវិតគ្រួសារឆាប់ទទួលបានផ្លែផ្កាលឿន៕
ប្រភព៖ Brightside | ប្រែសម្រួល៖ ក្នុងស្រុក
ព័ត៌មានថ្មីៗ
