ច្រមុះមនុស្សមានរន្ធពីរ ខណ្ឌចែកដោយរនាំងឆ្អឹងខ្ចី។ នៅត្រង់ឆ្អឹងខ្ចីជាប់នឹងចុងច្រមុះ គឺជាកន្លែងសើមជាប់ជានិច្ច និងជាទីជួបគ្នានៃពពួកសរសៃឈាមតូចៗ ដែលងាយនឹងដាច់ចេញឈាមណាស់។
ចំណុចប្រសព្វរវាងចុងច្រមុះនិងរនាំងឆ្អឹងខ្ចីនេះ ពិតជាងាយទទួលរងផលប៉ះទង្គិចនិងធ្លាយចេញឈាមខ្លាំងភ្លាមៗ គ្រាន់តែតឹងសរសៃឈាម ឬគ្រាន់តែលូកកូនដៃកេះខូងក្នុងច្រមុះធ្ងន់ដៃបន្តិចក៏ឈាមច្រមុះដែរ។
ជាពិសេស នៅពេលមានអាកាសធាតុក្តៅខ្លាំង ផ្ទៃមុខឡើងក្រហម សរសៃឈាមចាប់ផ្តើមរីក និងបើមានកណ្តាស់តែមួយឆែតផង នោះច្បាស់ណាស់នឹងធ្លាយសរសៃឈាម បណ្តាលឱ្យចេញឈាមតាមច្រមុះភ្លាម។
ថ្វីបើការឈាមច្រមុះមានអាការៈសញ្ញាស្រាល ក៏ប៉ុន្តែនៅកម្ពុជាហាក់មានកើតញឹកញាប់ណាស់ មិនថាចំពោះកុមារ មនុស្សពេញវ័យ ឬក៏មនុស្សចាស់ឡើយ។
តាមការកត់សម្គាល់របស់វេជ្ជបណ្ឌិត គួច ម៉េងលី ឈាមច្រមុះមានអាការៈធម្មតាមិនគ្រោះថ្នាក់ធ្ងន់ធ្ងរ និងព្រួយបារម្ភត្រូវបញ្ជូនទៅមន្ទីរពេទ្យសង្គ្រោះបន្ទាន់ តែអ្វីដែលគួរបារម្ភនិងប្រុងប្រយ័ត្ននោះ គឺនៅពេលដែលមានការហូរឈាមច្រើនពេក។
ដ្បិតថា ឈាមច្រមុះមិនបង្កផលវិបាកធ្ងន់ធ្ងរទៅថ្ងៃក្រោយ ក៏ប៉ុន្តែប្រសិនបើហូរឈាមច្រើន និងអូសបន្លាយពេលយូរអាចនឹងបាត់បង់ឈាមច្រើន។ ក្នុងករណីហូរឈាមតាមច្រមុះច្រើនមិនឈប់អាចជាមូលហេតុសមស្របគួរគិតគូរទៅមន្ទីរពេទ្យសង្គ្រោះបន្ទាន់។
ដោយគោរពតាមអនុសាសន៍របស់វេជ្ជបណ្ឌិត គេអាចបញ្ឈប់ករណីឈាមច្រមុះធម្មតាបានយ៉ាងមានប្រសិទ្ធិភាព។ ដំបូងបង្អស់អ្វីដែលគួរចងចាំនិងចៀសវាងនោះ គឺមិនត្រូវងើយក្បាលទៅក្រោយដូចការណែនាំរបស់ចាស់ពីមុនឡើយ ព្រោះពេលងើយឈាមនៅតែបន្តហូរចេញមកដដែល ហើយក្នុងករណីចេញឈាមច្រើន អាចហូរចូលទៅតាមផ្លូវដង្ហើម ឬផ្លូវអាហារដែលបង្កទៅជាផលអាក្រក់បំផុត បើឈាមនោះហូរចូលទៅក្នុងសួតមិនមែនចូលទៅក្នុងក្រពះ។
អ្វីដែលគេត្រូវធ្វើនៅជំហានបន្ទាប់ គឺត្រូវរក្សាភាពស្ងប់ស្ងាត់ ដើម្បីបញ្ចុះសម្ពាធឈាម ឬចៀសវាងកុំឱ្យមានសម្ពាធឈាមឡើង ព្រោះបើសម្ពាធឈាមឡើងគួរតែបញ្ចុះឈាមសិន ទើបបញ្ឈប់ការហូរឈាមនោះ។
លោកវេជ្ជបណ្ឌិត គួច ម៉េងលី សង្កត់ធ្ងន់ថា ដើម្បីបញ្ឈប់ករណីឈាមច្រមុះ ជាធម្មតាគេត្រូវរក្សាជំហរ ឱនក្បាលទៅមុខបន្តិច ហើយញើសសម្បោរបញ្ចេញកំណកដុំឈាមតូចៗឱ្យឆាប់បំផុត ភ្លាមនោះត្រូវច្របាច់ច្រមុះភ្ជិតរន្ធទាំងពីរឱ្យបានយ៉ាងហោច១០ ទៅ១៥នាទី ដើម្បីបំបិទរន្ធសរសៃឈាម។
គួរកត់សម្គាល់ថា ការហូរឈាមច្រមុះច្រើន ដែលអាចបង្កគ្រោះថ្នាក់គួរឱ្យបារម្ភនោះ គឺកើតចំពោះអ្នករលាកច្រមុះឬអាឡាក់ស៊ីច្រមុះរ៉ាំរ៉ៃ អ្នកទទួលទានថ្នាំបង្រាវឈាមជាប្រចាំ (ថ្នាំអាស្ពីរីន Aspirin) អ្នកហិតកូកាអ៊ីន (Cocaine) អ្នកផ្ដាសាយរ៉ាំរ៉ៃ និង២០% នៃស្ត្រីមានផ្ទៃពោះ ដែលភាគច្រើនងាយនឹងឈាមច្រមុះណាស់។
ចំណែកអ្នកពុំធ្លាប់មានប្រវត្តិជំងឺដូចខាងលើ តែមានអាការៈឈាមច្រមុះហូរជោគជាំ ឬហូរឈាមច្រើនម្តងហើយម្តងទៀត ជាអាការៈគួរតែប្រុងប្រយ័ត្ន ព្រោះវាជារោគសញ្ញាសម្គាល់ថា មានជំងឺនៅក្នុងច្រមុះ ពោលគឺអាចកើតមានដុំពកដុះនៅត្រង់ច្រមុះ ឬមហារីកច្រមុះ។
ដុំពកដុះនៅត្រង់ច្រមុះ ឬកើតមហារីកច្រមុះ ក្រៅពីបង្ហាញអាការៈច្រមុះហូរឈាមច្រើន នៅមានអាការៈគួរកត់សម្គាល់មួយចំនួនទៀត ដូចជាឈឺក្បាល ហឹងត្រចៀក វិលមុខ និងស្រវាំងភ្នែកជាដើម ដែលអស់ទាំងនេះសុទ្ធសឹងជារោគសញ្ញាបង្ហាញពីអាការៈកើតមហារីកច្រមុះ។ ក្នុងករណីនេះ គេគួរប្រុងប្រយ័ត្ននិងរួសរាន់នាំទៅជួបគ្រូពេទ្រច្រមុះ។
លោកវេជ្ជបណ្ឌិត គួច ម៉េងលី មានប្រសាសន៍ថា ទោះអាការៈឈាមច្រមុះ ដែលភាគច្រើនពុំមែនជារោគសញ្ញាធ្ងន់ធ្ងរក៏ពិតមែន ប៉ុន្តែការថែទាំអនាម័យសុខភាពច្រមុះ ជារឿងចាំបាច់ ដើម្បីបញ្ចៀសការឈាមច្រមុះ។ ដើម្បីបញ្ចៀសគ្រោះឈាមច្រមុះ លោកវេជ្ជបណ្ឌិតណែនាំឱ្យឧស្សាហ៍លាបវ៉ាសេលីន (Vaseline) ក្នុងច្រមុះ៕
ប្រភព៖ www.interconrooster.com