ត្រៀមតែលុយទៅ! ដឹងចំណុចខ្លាំង ២ របស់ iPhone 13 ឆ្នាំ ២០២១ នេះហើយ
ព្រឹត្តិការណ៍នៃការប្រកាសស្មាតហ្វូនជំនាន់ថ្មីប្រចាំឆ្នាំរបស់ក្រុមហ៊ុនយក្សអាមេរិក Apple នឹងឈានចូលមកដល់នៅរយៈពេលជាង ៣ ខែទៀត ពោលគឺនឹងប្រព្រឹត្តិទៅនៅកំឡុងខែកញ្ញា ហើយមានលក់លើទីផ្សារចាប់ពីចុងខែនោះ ឬហៀរចូលខែតុលា។
យ៉ាងណានៅឆ្នាំ ២០២១ នេះ យើងក៏ទទួលបានព័ត៌មានជាច្រើនពាក់ព័ន្ធនឹង iPhone 13 ដែលលឺថាមានការអភិវឌ្ឍច្រើន ហើយមុខងារខ្លះមិនធ្លាប់មានលើម៉ូឌែល iPhone សេរ៊ីមុនៗទាល់តែសោះ។
បើតាមចចាមអារ៉ាមដែលផ្ទុះខ្លាំងនៅរយៈពេលចុងក្រោយនេះ គឺមានចំណុចរសើបពីលើសេរ៊ី iPhone 13 នោះគឺមួយដែលទាក់ទិននឹងការអាប់ដែតនៅល្បឿន Refresh Rate លើអេក្រង់ឡើងដល់ 120Hz និងទីពីរ គឺថាមពលថ្មកាន់តែធំជាងមុន។
ចំពោះល្បឿនអេក្រង់ Refresh Rate លើ iPhone នៅពេលបច្ចុប្បន្ន គឺដំណើរការបានត្រឹម 60Hz ប៉ុណ្ណោះ ដែលវាមិនទាន់រត់បានរលូនល្អដូចបណ្តាស្មាតហ្វូនគូប្រជែងដែលខ្លះមានដល់ 90Hz ឬ 120Hz នោះទេ ពោលប្រសិន Apple អាចធ្វើរឿងនេះបាន នោះវានឹងក្លាយជាលើកដំបូងសម្រាប់អតិថិជនរបស់ខ្លួនហើយ។ ល្ហៀងៗថាការអភិវឌ្ឍបច្ចេកវិទ្យាថ្មីនេះ គឺ Apple ពឹងឲ្យ Samsung ជាអ្នកផលិតអេក្រង់ឲ្យ ដែលជាប្រភេទអេក្រង់ LTOP OLED សម្រាប់ផ្គត់ផ្គង់លើម៉ូដែល iPhone 13 Pro និង iPhone 13 Pro Max ខណៈប្រភេទ iPhone 13 និង iPhone 13 Mini ធម្មតា គឺបន្តប្រើអេក្រង់ LTPS ដែលផ្គត់ផ្គង់ដោយក្រុមហ៊ុន LG ដដែល។ នេះបើតាមរបាយការណ៍ពី The Elec បានចុះផ្សាយ។
ដោយឡែកក្រឡេកទៅមើលថាមពលថ្ម តាមការបែកធ្លាយព័ត៌មានពីគណនី Lovetodream គឺ iPhone ទាំង ៣ សេរ៊ីនឹងមានការបំពាក់ថាមពលថ្មធំជាងមុនដូចខាងក្រោម៖
iPhone 13 mini មានថាមពលថ្ម ២ ៤០៦mAh ធំជាងមុន ៨ ភាគរយបើធៀបនឹង iPhone 12 mini ដែលមាន ២ ២២៧mAh
iPhone 13 និង iPhone 13 Pro មានថាមពលថ្ម ៣ ០៩៥mAh ធំជាងមុន ៩,៩ ភាគរយបើធៀបនឹង iPhone 12 និង iPhone 12 mini ដែលមាន ២ ៨១៥ mAh
iPhone 13 Pro Max មានថាមពលថ្ម ៤ ៣៥២ ធំជាងមុន ១៨ ភាគរយបើធៀបនឹង iPhone 12 Pro Max ៣ ៦៨៧mAh៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
