Apple ត្រៀមចេញរបស់កើបលុយថ្មី តម្លៃមិនក្រោម ១ ពាន់ដុល្លារនៅឆ្នាំ ២០២២
បើតាមការព្យាករណ៍លើកចុងក្រោយរបស់អ្នកវិភាគល្បីឈ្មោះលោក Ming-Chi Kuo បានឲ្យដឹងថា នៅឆ្នាំក្រោយ ២០២២ ក្រុមហ៊ុន Apple ប្រាកដជានឹងមានការប្រកាសនូវផលិតផលថ្មី នោះគឺ AR Headset ដែលជាប្រភេទឧបករណ៍ពាក់ក្បាលអាចមើលឃើញពិភពសិប្បនិមិត្ត។
តាមប្រភពបានឲ្យដឹងថា បច្ចេកវិទ្យាលែនកាមេរ៉ាដែលមានក្នុងឧបករណ៍នោះ នឹងទទួលបានការផ្គត់ផ្គង់ពីដៃគូសហការធំគឺក្រុមហ៊ុន Genius Electronic Optical របស់តៃវ៉ាន់ ដែលពួកគេក៏ជាដៃគូផ្គត់ផ្គង់លើបំណែកគ្រឿងបង្គំនៃ iPhone 13 សេរីឆ្នាំ ២០២១ នេះផងដែរ។
ងាកទៅមើល AR Headset របស់ Apple វាទំនងជាមកជាមួយនូវអេក្រង់បង្ហាញ microLED របស់ SONY ដែលគាំទ្រទាំងការប្រើប្រាស់នៅបច្ចេកវិទ្យា AR និង VR ហើយមានគ្រាប់កាមេរ៉ាសរុប ១៥ គ្រាប់ ច្របាច់ចូលគ្នាបង្កើតជាបច្ចេកវិទ្យាចំណុចកំពូលមួយ។
វាមានទម្ងន់ស្រាលតែប្រហែល ២០០ ទៅ ៣០០ ក្រាមប៉ុណ្ណោះ ប៉ុន្តែដំណាក់កាលដំបូងវាប្រហែលត្រូវទាមទារឲ្យមានការដោតទៅជាមួយ Computer/Laptop ដើម្បីអាចបើកដំណើរការវាបាន ហើយត្រូវរង់ចាំដល់ឆ្នាំ ២០២៥ ទើបមានជំនាន់ថ្មីដែលនឹងអាចប្រើប្រាស់បានធំទូលាយជាងនេះ។ យ៉ាងណាតាមការព្យាករណ៍ Apple AR Headset ដែលជាឧបករណ៍ថ្មី នឹងមិនលក់ធូរថ្លៃនោះទេ ពោលគឺទាបបំផុតក៏ប្រហែល ១ ០០០ ដុល្លារ ហើយអាចខ្ពស់បំផុតដល់ខ្ទង់ ៣ ០០០ ដុល្លារ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
