តាមដំណាល គេពោលថា ទារកមិនថាស្រីឬប្រុស ដែលកើតចំថ្ងៃនាំលាភទាំង ៥ នោះនឹងរមែងមានសំណាង មានជីវិតភ្លឺចិញ្ចាចតាំងតែពីថ្ងៃចាប់កំណើត ហើយក៏ប្រៀបបាននឹងកំណប់ទ្រព្យជូនឪពុកម្តាយផងដែរ៖
ថ្ងៃទី ៣ និងទី ៥
ឥតខុសពីគ្រាប់ពេជ្ររំលេចឡើងមកក្នុងគ្រួសារ ជារួមកំណើតកូនប្រុសស្រី ចំថ្ងៃទី ០៣ ឬទី ០៥ នៃខែណាមួយក៏ដោយ ក៏ដូចជានាំមហាសំណាង នាំភាពមានបាន ចូលមកដល់ក្រុមគ្រួសារ។
ចំពោះម្តាយឪពុក ដែលតែងទាស់ពាក្យទាស់សម្តី ច្រើនមានរឿងក្តៅក្រហាយកើតឡើងជារឿយៗ បន្ទាប់ចាប់កំណើតបុត្រាបុត្រី នៅថ្ងៃទី ៣ ឬទី ៥ នេះ ក៏ដូចបាននាំភាពផ្សះផ្សា ឲ្យគ្រួសារមានតែសុខដុមរមនា ឥតមានការឈ្លោះប្រកែកដូចមុន ពោលកើតតែសុភមង្គល ជាកូននាំចម្រុងនាំចម្រើន កើនតែភាពសម្បូរសប្បាយ។
ថ្ងៃទី ៨ និងទី ១០
ប្រៀបដូចផ្កាយនាំសំណាង មកចាប់កំណើត ដោយរាសីរបស់ពួកគេនឹងមានភាពចម្រុងចម្រើនតាំងតែពីក្មេង ដល់ចាស់ រួចទៅថ្ងៃខាងមុខ ក៏អាចជោគជ័យក្នុងអាជីពការងារ ការរកស៊ីបានដោយងាយ។ ទារកនេះ ហាក់មានចិត្តគំនិតខិតខំ ភាពរឹងមាំជាប់នឹងខ្លួន អមដោយឆន្ទៈច្បាស់លាស់តាំងតែពីក្មេង សូម្បីតែទម្លាប់គេង ឈរ អង្គុយ ក៏ក្មេងនេះ បង្ហាញមកត្រឹមត្រូវ ជាក់លាក់ខុសពីក្មេងដទៃដែរ។
ចំពោះក្មេងប្រុសដែលកើតចំថ្ងៃ ៨ ឬ ១០ ត្រូវបានគេមើលឃើញ ថាធំទៅជាមនុស្សឆ្លាត ពូកែរកស៊ី និងចេះរកលុយ។ រីឯក្មេងស្រីដែលកើតចំថ្ងៃទី ៨ ឬទី ១០ ធំឡើងជាស្រ្តីរឹងមាំ ជាមួយនឹងអាជីពរុងរឿង ជោគជ័យអស្ចារ្យ។ ក្មេងនេះក៏មិនភ្លេចកំណើត ជារួមពេលមានពេលបាន តែងរុញច្រានក្រុមគ្រួសារ សាច់ញាតិឲ្យសុខស្រួលជាមួយនឹងខ្លួនដែរ ពោលឡើងខ្ពស់ឥតភ្លេចទ្រនំនោះទេ។
ថ្ងៃទី ១៣ និងទី ២១
ជាលេខថ្ងៃសំណាង ហើយកូនដែលកើតក្នុងថ្ងៃនោះ ច្រើនតែមានទេពកោសល្យពីកំណើត ដូចកើតមកលើកសំណាងដល់ឪពុកម្តាយ។ ពួកគេរមែងមានចរិតស្លូតបូត តែក៏តែងតែនាំភាពរីករាយចូលដល់ក្រុមគ្រួសារ។ យ៉ាងណាកូនកើតចំថ្ងៃទាំងពីរនេះ ប៉ះកូនខ្លះ រាងស្ងប់ស្ងាត់បន្តិច មិនសូវមាត់ក តែតែងបើកចំហចិត្តធំទូលាយ មិនរុញរានឹងជួយសាច់ញាតិ ដែលឃើញលំបាកនៅនឹងភ្នែក។
ពេលកូននេះកើតមក គ្រួសារនឹងកាន់តែសម្បូរសប្បាយ មានភាពរុងរឿងខ្លាំងឡើង ហើយពេលពួកគេធំធាត់ឡើង គឺងាយរកបានការងារល្អធ្វើ ចេះអភិវឌ្ឍខ្លួនឯងបានយ៉ាងត្រឹមត្រូវ ដើរតាមគន្លងធម៌ មិនឲ្យឪពុកម្តាយហត់មាត់ ហត់ចិត្តនោះទេ។
ថ្ងៃទី ២៨ និង ៣០
ក៏ត្រូវបានគេចាត់ទុកជាថ្ងៃស្រស់បំព្រងផងដែរ សម្រាប់ការចាប់កំណើតបុត្រាបុត្រី ក៏ដូចជាថ្ងៃដែលទារកកើតមក មានការការពារពីព្រះ ពីព្រលឹងវិញ្ញាណល្អ តាមថែរក្សាជាប់។ ពួកគេក៏បាន អមសំណាង ដោយទេវតាទ្រព្យ រាប់ចូលមកដល់គ្រួសារថ្មី ធ្វើឲ្យជំនួញម្តាយឪពុក កាន់តែរីកធំធាត់ខ្លាំង។
ពេលនៅក្មេង កូននេះប្រហែលជាមិនសូវឆ្លាតខ្លាំង មិនលេចធ្លោឲ្យគេកោតសរសើរខ្លាំង តែពេលធំពេញវ័យ នឹងមានចិត្តចេះអត់ធ្មត់ ចេះជម្នះការលំបាក ជម្នះទុក្ខ រួចចូលដល់វ័យកណ្តាល ក៏នឹងកាន់តែមានសុភមង្គលក្នុងជីវិត អាចបង្កើតភាពពេញលេញសម្រាប់ជីវិតខ្លួនឯង ដោយមិនពឹងផ្អែកទ្រព្យឪពុកម្ដាយឡើយ។
ចាំមើលចុះ ប្រហែលអាយុ ២០ មិនទាន់ទេ នឹងអាចបង្កើតភាពល្បីល្បាញក្នុងស្រុកក្នុងភូមិ ឬដល់លំដាប់ប្រទេស ដោយតាមរយៈទេពកោសល្យ ឬអំណោយទានពីធម្មជាតិដែលពួកគេមាន បូកនឹងការខិតខំ ឥតបោះបង់នោះផង។ ចុងក្រោយយើងចូលរួមអបអរ បើអ្នកកំពុងស្តាប់ជាម្តាយឪពុក ឬបងប្រុសបងស្រី មានបុត្រធីតា កើតចំថ្ងៃ ដូចបានកំណត់ទាំង ៨ ខាងលើ៕
ប្រភព៖ បរទេស | ប្រែសម្រួល៖ ក្នុងស្រុក