អាហារ ៨ មុខបំផ្លាញថ្លើមលឿនជាងគ្រឿងស្រវឹង ប៉ុន្តែមនុស្សជាច្រើននៅតែទទួលទានរាល់ថ្ងៃ
យើងគ្រប់គ្នាត្រូវបានណែនាំជាញឹកញាប់ កុំទទួលទានគ្រឿងស្រវឹងដើម្បីជៀសវាងបង្កផលអាក្រក់ដល់ថ្លើម។ ប៉ុន្តែការពិតមានមនុស្សតិចណាស់ដែលដឹងថាមានអាហារដែលបំផ្លាញថ្លើមលឿនជាងគ្រឿងស្រវឹង មនុស្សជាច្រើនមិនដឹង ហើយនៅតែញ៉ាំដោយមិនខ្វល់។
ផ្នែកនីមួយៗនៃរាងកាយមានភារកិច្ច និងតួនាទីសំខាន់ៗខុសៗគ្នា ក្នុងនោះថ្លើមមានតួនាទីជួយកម្ចាត់ជាតិពុលនៅក្នុងខ្លួន។ ដូច្នេះ អាហារទាំងអស់ ក៏ដូចជាការការទទួលទានទឹក បន្ទាប់ពីទទួលទានចូលទៅក្នុងខ្លួន នឹងត្រូវបានរំលាយដោយថ្លើម។ ដូច្នេះហើយ ចាំបាច់ត្រូវការពារថ្លើមពីផលប៉ះពាល់ដ៏គ្រោះថ្នាក់នៃអាហារដែលអ្នកបានទទួលទាន ជាពិសេសអាហារទាំង ៨ មុខខាងក្រោមនេះ។ អាហារទាំងនេះត្រូវបានអ្នកជំនាញចាត់ទុកថាមានគ្រោះថ្នាក់ដល់ថ្លើមជាងគ្រឿងស្រវឹងទៅទៀត។
១. បន្លែកំប៉ុង
ក្រៅពីបន្លែស្រស់ៗ មនុស្សជាច្រើនក៏ជ្រើសរើសបន្លែកំប៉ុងផងដែរ ដោយសារតែភាពងាយស្រួលនៃការរក្សាទុក និងប្រើប្រាស់នៅពេលចាំបាច់។ ប៉ុន្តែតាមពិតទៅ ដូចជាសាច់កែច្នៃដែរ អាហារកំប៉ុងក៏មានផ្ទុកសារធាតុរក្សាទុក ហើយជាក់ស្តែង វាមិនល្អសម្រាប់ថ្លើមទាល់តែសោះ។ ក្នុងករណីចង់រក្សាទុកបន្លែ អ្នកគួរជ្រើសរើសបន្លែស្រស់ ឬបន្លែក្លាសេជំនួសបន្លែកំប៉ុង។
២. អំបិល
យោងតាមការសិក្សាជាច្រើន របបអាហារដែលមានជាតិប្រៃខ្ពស់អាចបង្កើនហានិភ័យនៃជំងឺខ្លាញ់រុំថ្លើម រួមចំណែកដល់ការខូចខាតថ្លើម និងការវិវត្តមិនល្អ។
មិនត្រឹមតែប៉ុណ្ណឹងទេ ការបង្កើនការទទួលទានប្រៃខ្លាំង ក៏បានឥទ្ធិពលបង្កទៅជាជំងឺលើសឈាម ដែលជាមូលហេតុចម្បងនៃជំងឺបេះដូង និងជំងឺដាច់សរសៃឈាមខួរក្បាល។ លើសពីនេះ ការទទួលទានអំបិលច្រើនពេក(ទទួលទានប្រៃខ្លាំង) អាចនាំអោយមានការផ្លាស់ប្តូរកោសិកាថ្លើមដែលទាក់ទងនឹងជំងឺ fibrosis ។ ដូច្នេះហើយ ក្នុងរបបអាហារនីមួយៗ អ្នកគួរដឹងពីរបៀបធ្វើឲ្យបរិមាណអំបិលមានតុល្យភាព ទើបវាមានសុវត្ថិភាពសម្រាប់សុខភាព។
៣. ភេសជ្ជៈ
បន្ទាប់ពីការស្រាវជ្រាវ អ្នកវិទ្យាសាស្ត្របានរកឃើញថា អ្នកដែលផឹកភេសជ្ជៈជាប្រចាំ ទំនងជាមានជំងឺខ្លាញ់រុំថ្លើម។ ទោះបីជាការសិក្សាទាំងនេះមិនបញ្ជាក់ថាភេសជ្ជៈជាមូលហេតុចម្បងនៃជំងឺឬអត់ក៏ដោយ ប៉ុន្តែការដាក់កម្រិតទទួលទានភេសជ្ជៈនេះ នឹងផ្តល់អត្ថប្រយោជន៍កាន់តែច្រើនសម្រាប់សុខភាពរបស់អ្នក។
៤. អាហាររហ័ស អាហារកែច្នៃ
នៅក្នុងអាហាររហ័ស ក៏ដូចជាអាហារកែច្នៃច្រើនតែមានផ្ទុកជាតិខ្លាញ់ច្រើន និងកាឡូរីខ្ពស់។ ដូច្នេះ ការទទួលទានអាហារទាំងនេះជាប្រចាំអាចបង្កើនហានិភ័យនៃការធាត់ បង្កឱ្យមានការប្រមូលផ្តុំជាតិខ្លាញ់ច្រើនក្នុងរាងកាយ និងបង្កើនបន្ទុកលើកោសិកាថ្លើម។ យូរ ៗ ទៅសមត្ថភាពថ្លើមក្នុងការបំប្លែងជាតិខ្លាញ់អាចថយចុះ ហើយនាំឱ្យកើតជំងឺខ្លាញ់រុំថ្លើម។
៥. គ្រឿងក្នុងសត្វ
គ្រឿងក្នុងសត្វគឺជាមុខម្ហូបដ៏ពេញនិយមមួយដែលត្រូវបានប្រជាជនខ្មែរយើងភាគច្រើនចូលចិត្តទទួលទាន។ ទោះជាយ៉ាងណាក៏ដោយ អាហារប្រភេទនេះត្រូវបានគេចាត់ទុកថាមានផ្ទុកជាតិខ្លាញ់ និងកូលេស្តេរ៉ុលមិនល្អច្រើន។ ប្រសិនបើអ្នកទទួលទានគ្រឿងក្នុងសត្វច្រើនពេក វាអាចកាត់បន្ថយ ឬរារាំងទឹកប្រមាត់ ដែលធ្វើឲ្យថ្លើមមិនអាចយកខ្លាញ់ចេញ និងបង្កើនបន្ទុកមេតាបូលីសនៅលើថ្លើម។
៦. អាហារអាំង និងចៀន
អាហារអាំង ឬចៀន ច្រើនតែមានរសជាតិទាក់ទាញខ្លាំង ទាក់ទាញអ្នកចូលចិត្តញ៉ាំ ប៉ុន្តែក្នុងពេលជាមួយគ្នានោះ ពួកវាមានគ្រោះថ្នាក់ខ្លាំងដល់ថ្លើម ប្រសិនបើទទួលទានច្រើនពេក។
មូលហេតុគឺថា អាហារទាំងនេះច្រើនតែដាក់ជាមួយគ្រឿងទេសផ្សេងៗ រួមទាំងស្ករ និងអាំង ឬចៀននៅសីតុណ្ហភាពខ្ពស់។ ដំណើរការនេះអាចបណ្តាលឱ្យសារធាតុសកម្មបំផ្លាញថ្លើម ធ្វើឱ្យថ្លើមធ្វើការកាន់តែខ្លាំងដើម្បីដំណើរការបន្សាបជាតិពុល។ យូរ ៗ ទៅវាអាចបណ្តាលឱ្យមានជំងឺថ្លើមរ៉ាំរ៉ៃ។
៧. ទំពាំងស្រស់
ទំពាំងស្រស់ជាបន្លែមួយមុខដែលខ្មែរយើងភាគច្រើនយកមកផ្សំជាមុខម្ហូបក្នុងរបបអាហារប្រចាំថ្ងៃ។ ទោះជាយ៉ាងណាក៏ដោយ នៅក្នុងពន្លកទំពាំងមានផ្ទុកនូវសារធាតុម្យ៉ាងដែលអាចបង្កឱ្យមានការពុលដល់អ្នកទទួលទាន វាអាចគំរាមកំហែងដល់អាយុជីវិតបាននោះគឺ Cyanide។សារធាតុនេះក្នុងទំពាំងស្រស់គឺខ្ពស់ណាស់គឺប្រហែល២៣០មីលីក្រាមក្នុងទំពាំង១គីឡូក្រាម។ នៅពេលទទួលទានទំពាំងដែលមានផ្ទុកសារធាតុ cyanide ច្រើន ក្រោមសកម្មភាពនៃអង់ស៊ីមរំលាយអាហារ ពួកវានឹងប្រែទៅជាអាស៊ីត cyanhydric ដែលជាសារធាតុពុលខ្លាំងអាចចូលទៅ បំផ្លាញថ្លើម។
៨. ជាតិស្ករ
ជាធម្មតាយើងដឹងថាជាតិស្ករមានគ្រោះថ្នាក់ដល់ធ្មេញ ប៉ុន្តែគ្មាននរណាម្នាក់ដឹងថាវាក៏ធ្វើឱ្យថ្លើមរបស់អ្នកមានគ្រោះថ្នាក់ខ្លាំងដែរ។ នៅក្នុងថ្លើម fructose នឹងត្រូវបានរំលាយ ហើយមួយផ្នែកប្រែទៅជាដំណក់ខ្លាញ់។ ប្រសិនបើអ្នកទទួលទានជាតិស្ករចម្រាញ់ច្រើន និងស៊ីរ៉ូដែលមានជាតិស្ករ fructose ខ្ពស់ នោះជាតិខ្លាញ់នឹងកកកុញនៅក្នុងថ្លើម និងបណ្តាលឱ្យកើតជំងឺថ្លើម។
ការសិក្សាខ្លះបង្ហាញថា ជាតិស្ករអាចបំផ្លាញថ្លើមដូចស្រា ទោះបីអ្នកមិនលើសទម្ងន់ក៏ដោយ។ ដូច្នេះ ការកំណត់ការទទួលទានអាហារដែលមានជាតិស្ករច្រើនដូចជា នំខេក និងបង្អែម គឺជាដំណោះស្រាយដ៏ល្អបំផុតដើម្បីការពារសុខភាព៕
ប្រែសម្រួលដោយ៖ វីរៈ(Knongsrok)
ព័ត៌មានថ្មីៗ
