Pi Pay រកបានម្ចាស់ថ្មី លែងស្ថិតក្រោមការគ្រប់គ្រងរបស់ឧកញ៉ា កុក អាន ទៀតហើយ
ដំណឹងថ្មីមួយនៅព្រឹកថ្ងៃទី ១៣ មករានេះបានឲ្យដឹងថាប្រព័ន្ធទូទាត់ឌីជីថល Pi Pay ដែលធ្លាប់ស្ថិតក្រោមការគ្រប់គ្រងរបស់ក្រុមហ៊ុន Anco Group (ក្រុមហ៊ុនរបស់ឧកញ៉ាកុកអាន) បានផ្លាស់ប្តូរម្ចាស់ថ្មីមកច្របាច់បញ្ចូលគ្នាតែមួយ ជាមួយនឹង SmartLuy ដែលជាក្រុមហ៊ុនកុលសម្ព័ន្ធរបស់ Smart Axiata វិញហើយ។ នេះបើតាមការចុះផ្សាយលើទំព័រ CamboFinance។
គួររំឭកថា Pi Pay បានចាប់កំណើតក្នុងទឹកដីកម្ពុជាអស់រយៈពេលជិត ៣ ឆ្នាំមកហើយ ដោយឡែកការច្របាច់បញ្ចូលគ្នារវាងក្រុមហ៊ុនទាំងពីរ នឹងអាចជំរុញឲ្យក្រុមហ៊ុនថ្មីក្លាយជាអ្នកកាន់កាប់ទីផ្សារទូទាត់ដោយគ្មានសាច់ប្រាក់តែម្តង (Cashless) ព្រោះ Pi Pay មានអតិថិជនអ្នកប្រើប្រាស់ច្រើនស្រាប់ ចំណែកឯ Smart Axiata វិញគឺមានទាំងប្រាក់វិនិយោគជាច្រើន ហើយក៏មានជំនាញលើវិស័យទូរគមនាគមន៍ផងដែរ។
បច្ចុប្បន្នតម្លៃទីផ្សាររបស់វិស័យនេះមានតម្លៃប្រមាណជាង ២ ប៊ីលានដុល្លារសហរដ្ឋអាមេរិក ទន្ទឹមនោះក៏មានដៃគូប្រជែងឯទៀតដូចជា Wing, TrueMoney, HuionePay, ABAPay និង Bakong របស់ធនាគារជាតិនៃកម្ពុជា៕
ប្រភព៖ CamboFinance
ព័ត៌មានថ្មីៗ
