Love Me Love My Dog អ្នកណាខ្លះធ្លាប់ឮពាក្យនេះ?
ស្នេហា ជាការស្រឡាញ់ ការគោរព ឱ្យតម្លៃ ជឿជាក់ ទុកចិត្តលើគ្នា ហើយវាក៏រឹតតែសំខាន់ បើយើងចេះបើកចិត្ត ផ្ដល់សិទ្ធសេរីភាព និងទទួលយកគ្រប់យ៉ាងរវាងគ្នា ដោយមិនខ្វល់រឿងអតីតកាលរបស់ដៃគូ។
មនុស្សម្នាក់ៗ សុទ្ធតែធ្លាប់មានអតីតកាលរៀងៗខ្លួន មនុស្សគ្រប់រូប សុទ្ធតែធ្លាប់មានកំហុសខុសឆ្កង តែអ្វីដែលសំខាន់គឺ បច្ចុប្បន្នគេបែបណា តើជាមនុស្សចេះកែខ្លួនល្អវិញ ឬនៅតែបន្តធ្វើជាមនុស្សមិនល្អ ជាមួយនឹងកំហុសឆ្គងនោះ។
ស្រឡាញ់មនុស្សម្នាក់ ត្រូវស្រឡាញ់គេជាគេ ស្រឡាញ់ និងព្រមទទួលយកនូវអ្វីដែលគេមាន ដូចពាក្យបរទេសមួយឃ្លានិយាយថា " Love me Love my Dog " ន័យត្រង់ បកចំ គេថា " បើស្រឡាញ់ខ្ញុំ សូមស្រឡាញ់ឆ្កែរបស់ខ្ញុំផង " តែន័យមួយទៀតគឺមានន័យថា " បើស្រឡាញ់ខ្ញុំ សូមស្រឡាញ់នូវអ្វីដែលខ្ញុំមាន "។
ជាការពិតណាស់ មនុស្សយើង តែងមានចំណុចល្អ និងចំណុចអាក្រក់ តែអ្វីដែលសំខាន់ បើសិនយើងពិតជាស្រឡាញ់គេពិតប្រាកដមែន យើងត្រូវតែព្រមទទួលយកនូវអ្វីដែលជាគេ។ មិនថាចំណុចល្អ ឬក៏អាក្រក់ទេ ក៏យើងត្រូវតែព្រម។
កុំស្រឡាញ់គេ តែក្នុងថ្ងៃដែលគេគួរឱ្យស្រឡាញ់ តែត្រូវព្រមទទួលយក ចំណុចមិនល្អ ចំណុចអវិជ្ជមាន និងភាពមានះ ឆេវឆាវ ឆាប់ខឹង ប៉ិនរករឿង ពូកែងក់ងររបស់គេផងដែរ។
កុំឃើញគេស្អាត ឆ្លាត ពូកែទើបស្រឡាញ់ ត្រូវព្រមទទួលថា ពេលចាស់ទៅ គេប្រាកដជាលែងស្អាត គេក៏មានចំណុចខ្សោយ ចំណុចល្ងង់ដូចគ្នាដែរ។
កុំស្រឡាញ់គេ ព្រោះតែគេមានទ្រព្យ មានលុយកាក់ ព្រោះគ្រួសារគេមាន ត្រូវចាំថា របស់អស់ទាំងនោះ គឺសុទ្ធតែជារបស់ក្រៅខ្លួនតែប៉ុណ្ណោះ ចូរស្រឡាញ់គេជាគេ នៅក្បែរគេគ្រប់បេលមិនចោលគ្នា មិនថាមានរឿងអ្វីកើតឡើង ក៏នឹងមិនចោលគ្នាដែរ ត្រូវព្រមលំបាក វេទនា ហេលឆ្លងឧបសគ្គទៅជាមួយគ្នាឱ្យបាន៕
អត្ថបទ ៖ ភី អេច
ក្នុងស្រុករក្សាសិទ្ធ
ព័ត៌មានថ្មីៗ
