កូនៗដែលបន្ទោសឪពុកម្ដាយរឿង ៥ យ៉ាងនេះ ចាំទៅគ្មានផ្លូវរកស៊ីមានបានដូចគេទេ
ធ្លាប់លឺពាក្យគេនិយាយទេ "កូនដែលចេះដឹងគុណឪពុកម្តាយ ក៏ជាកូនដែលរមែងទទួលបានជោគជ័យធំបំផុតក្នុងជីវិត" ហើយត្រូវចាំថាគ្មានអ្វីដែលធំជាងគុណលោកទាំងពីរនោះឡើយ។
យ៉ាងណាតាមតំណាលចាស់ពីបុរាណបានពោលថា កូនប្រុសស្រីទាំងឡាយ ដែលបានតិះដៀលនិងបន្ទោសឪពុកម្តាយរឿង ៥ យ៉ាងនេះ គឺរមែងធ្លាក់ក្នុងជីវិតអភ័ព្វ ហើយការរកស៊ីធ្វើការអ្វីក៏មិនទទួលបានជោគជ័យ អាចមានបានដូចកូនគេឯទៀតដែរ៖
៥) បន្ទោសឪពុកម្តាយដែលអសមត្ថភាព
គ្មាននរណាដែលល្អឥតខ្ចោះនោះទេ ការដែលលោកទាំងពីរផ្តល់កំណើតឲ្យយើងមកហើយ នោះគឺរាប់ថាជាគុណដ៏ធំមួយហើយ។ ការដែលលោកបីបាច់ថែរក្សាយើងបានធំប៉ុណ្ណេះ ក៏រាប់ថាជាការខិតខំមួយទៀតហើយដែរ បើទោះបីម្តាយយើងក្រ ឪពុកយើងគ្មានចំណេះ ក៏កុំបន្ទោសលោកទាំងពីរ ផ្ទុយទៅវិញយើងគួរខិតខំប្រឹងប្រែងរៀនសូត្រ ដើម្បីស្រវាយកចំណេះប្តូរយកជំនាញបង្កើតជាលុយមកស្រោចស្រង់ពួកលោកវិញ។
៤) បន្ទោសឪពុកម្តាយដែលនិយាយច្រើន
ជឿទៅឪពុកម្តាយណាក៏ដូចគ្នា រមែងនិយាយច្រើនបន្តិចហើយ តែពួកលោកនិយាយក៏ចង់ឲ្យយើងល្អ ចង់ឃើញយើងដើរផ្លូវត្រូវ។ ពេលនេះអ្នកមើលមិនឃើញពីតម្លៃនៃសម្តីរបស់គាត់ តែថ្ងៃខាងមុខអ្នកនឹងយល់ ជាពិសេសនៅពេលដែលអ្នកមានកូនវិញ។
៣) បន្ទោសឪពុកម្តាយដែលស្តីបន្ទោសខ្លួន
ដោយសារតែពួកលោកមិនចង់ឃើញកូនរបស់លោក ដើរផ្លូវហត់នឿយ និងរស់នៅក្នុងជីវិតលំបាក ទើបលោករមែងមានការស្តីបន្ទោស និងប្រើពាក្យសម្តីធំជារឿយៗ។ កុំមានការខឹងសម្បាគាត់ បើពាក្យល្អ ក៏ស្តាប់យកជាមេរៀនកែប្រែនៅពេលក្រោយ បើសម្តីអាក្រក់ក៏គិតថា គ្រាន់ជាកំហឹងមួយពេលរបស់មនុស្សចាស់ ជៀសវាងមានការតបតសម្តីធំត្រលប់ទៅគាត់វិញ នាំឲ្យតែហ្មងសៅទៅថ្ងៃក្រោយ។
២) បន្ទោសឪពុកម្តាយដែលធ្វើអីយឺតៗ
ពួកលោកចាស់ហើយ តើឲ្យសកម្មនិងរហ័សដូចក្មេងបានដោយរបៀបណា? សកម្មភាពខ្លះលោកទាំងពីរក៏ធ្វើទៅរាងយឺតយ៉ាវ ខ្លះធ្វើទៅដោយការភ្លេចភ្លាំង តែកុំស្រែកកុំថាឲ្យលោកឲ្យសោះ ព្រោះត្រូវចាំថាកាលអ្នកនៅក្មេង ពេលអ្នកដើរមិនកើតក៏លោកជាអ្នកបី ជាអ្នកលើក ពេលអ្នកដើរដួល ក៏លោកជាអ្នកចាំជួយទាញឲ្យក្រោកឡើងវិញ ចុះពេលនេះហេតុអ្វីអ្នកមិនមើលថែពួកលោកដូចពេលនោះវិញ?
១) កុំបន្ទោសឪពុកម្ដាយដែលមានជំងឺ
ឪពុកម្តាយខ្លះកើតមានជំងឺ ដែលជាបន្ទុកនាំឲ្យកូនត្រូវចំណាយច្រើន តែចាំណាគ្មាននរណាទៅចង់ឈឺទេ។ ត្រលប់ទៅកាលពីអ្នកនៅក្មេងវិញ លោកទាំងពីរខំអស់ហើយ ស្រក់ញើសស្រក់ឈាម ប្តូរទាំងកម្លាំងប្តូរទាំងការគិត ដើម្បីតែប្រាក់យកមកចិញ្ចឹមមើលថែអ្នក ប៉ះប៉ូវសុខភាពអ្នកមិនឲ្យមានជំងឺបៀតបៀន ចុះហេតុអ្វីពេលនេះពេលពួកលោកមានជំងឺអ្នកបែរជាបន្ទោសនិងចង់បោះបង់ទៅវិញ?
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
