បើឈឺចាប់ខ្លាំងកំឡុងពេលមករដូវ ស្រីៗកុំប្រើថ្នាំ ហើយមកសាកទទួលទានរបស់ទាំង ៦ នេះវិញ
នៅពេលមករដូវ ជាទូទៅស្រ្តីតែងតែមានបញ្ហាឈឺពោះ មិនស្រួលក្នុងខ្លួន ហើយផ្លាស់ប្តូរអារម្មណ៍ច្រើន និងមានចំណង់ក្នុងការឃ្លានខុសពីធម្មតា។ យ៉ាងណាការទទួលទានរបស់នៅពេលនេះ ក៏ត្រូវតែប្រយ័ត្ន ព្រោះរបស់ខ្លះអាចនាំឲ្យប៉ះពាល់សុខភាពអ្នក និងធ្វើឲ្យការឈឺចាប់មានការកើនឡើងលើសដើម។
ចំពោះស្រ្តីខ្លះនៅពេលដែលឈឺចាប់ខ្លាំងពេក ក៏សម្រេចប្រើប្រាស់ថ្នាំដើម្បីទប់និងកាត់បន្ថយការឈឺចាប់រយៈពេលខ្លី ប៉ុន្តែទម្លាប់នៃការប្រើថ្នាំ គឺមិនល្អនោះទេចំពោះសុខភាព។ អត្ថបទនេះ Knongsrok ណែនាំការជ្រើសរើសអាហារ&ភេសជ្ជៈ ៥ ប្រភេទដែលល្អបំផុតសម្រាប់ស្រ្តីកំឡុងពេលមករដូវ៖
៥) ត្រីសាម៉ុង
វាជាអាហារដែលស្រ្តីគួរតែទទួលបានបំផុតកំឡុងពេលមករដូវ ព្រោះជាតិអូមេហ្គា-៣ នឹងជួយឲ្យអារម្មណ៍របស់អ្នកល្អ មិនសូវតានតឹង ហើយបន្ថែមនឹងសារធាតុប្រឆាំងអុកស៊ីតកម្មខ្ពស់ថែមទៀតផង។
ជាងនេះវានឹងជួយបន្ធូរសាច់ដុំ ហើយបំបាត់ការឈឺចុកចាប់។ ប្រសិនបើអ្នកមិនចូលចិត្តប្រភេទត្រីសាម៉ុង ក៏អាចទទួលទានអាហារផ្សេងទៀត ឲ្យតែជាប្រភពផ្ទុកនូវអូមេហ្គា-៣ ដូចជាគ្រាប់សណ្តែក ទឹកដោះគោសណ្តែក ឬផ្លែល្ពៅជាដើម។
៤) ផ្លែចេក
ជាអាហារដែលជួយឲ្យស្រ្តីមានអារម្មណ៍ល្អកំឡុងពេលមករដូវ ព្រោះចេកមានផ្ទុកវីតាមីន B6 ជួយកាត់បន្ថយការឈឺពោះនិងទ្រូង។ វាក៏ជួយកាត់បន្ថយការហើមពោះផងដែរនៅកំឡុងពេលនោះ។
ជាងនេះវាជួយឲ្យប្រសើរឡើងនៅប្រព័ន្ធរំលាយអាហារ ហើយសូមណែនាំជាពិសេសសម្រាប់ក្មេងស្រីដែលទើបពេញវ័យ និងរមែងទទួលការផ្លាស់ប្តូរអារម្មណ៍លឿន។
៣) ផ្លែក្រូច
ផ្លែក្រូចសំបូរទៅដោយវីតាមីន C ហើយវាជាប្រភពដ៏ល្អនៃកាល់ស្យូម ដែលជួយកាត់បន្ថយអារម្មណ៍ធ្លាក់ទឹកចិត្ត។ ការថប់អារម្មណ៍ ការបាក់ទឹកចិត្ត នឹងត្រូវបានកាត់បន្ថយតាមរយៈការទទួលទានផ្លែក្រូច ជាងនេះវាក៏ជួយបំបាត់ការឈឺចុកចាប់មួយផ្នែកផងដែរ។
ស្រ្តីដែលមានទម្លាប់ឈឺពោះ មុនពេលមករដូវ គេណែនាំឲ្យទទួលទានផ្លែក្រូចឲ្យបានទៀងទាត់ ហើយធានានឹងអាចជួយបានច្រើន។
២) ផ្កាខាត់ណា
នៅពេលដែលមករដូវ រាងកាយនឹងបាត់បង់ឈាមច្រើនណាស់ ហើយនៅពេលដែលជាតិដែកត្រូវបានចុះថយ នោះនឹងឆាប់ធ្វើឲ្យស្រ្តីមានការវិលមុខ និងហត់នឿយលឿន។
បែបនេះយើងត្រូវបំពេញវាមកវិញ តាមរយៈការទទួលទានអាហារដែលមានសារធាតុចិញ្ចឹមនៃជាតិដែក ហើយការជ្រើសរើសយកបន្លែស្លឹកបៃតងដូចជាផ្កាខាតណា គឺជារបស់ល្អបំផុត ព្រោះមានជាតិដែក និងជាតិសរសៃខ្ពស់។
១) តែក្តៅ
អ្នកមិនត្រូវទទួលទានទឹកត្រជាក់ច្រើននោះទេ កំឡុងពេលមករដូវ ហើយត្រូវជំនួសមកវិញនៅតែក្តៅ ឬទឹកក្តៅអ៊ុនៗ ដើម្បីជួយជំរុញលំហូរឈាមឲ្យដំណើរការល្អ។ វាក៏ជួយកាត់បន្ថយការឆាប់ខឹង មួម៉ៅ និងការឈឺចាប់ផ្នែកសាច់ដុំផងដែរ។
ក្មេងស្រីដែលមានការឈឺចាប់ខ្លាំងពេលមករដូវ គួររៀនទម្លាប់ទទួលទានទឹកតែឲ្យបានច្រើន ហើយត្រូវបញ្ចៀសឲ្យបាននៅភេសជ្ជៈដែលមានជាតិកាហ្វេអ៊ីន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
