អ្នកប្រាជ្ញល្បីៗ គេប្រកាន់ខ្ជាប់ទម្លាប់ ៧ នេះ ដើម្បីមាន IQ ខ្ពស់ ខួរក្បាលគិតរហ័សចងចាំល្អ
អ្នកអាចប្រើប្រាស់មធ្យោបាយជាច្រើនក្នុងការហ្វឹកហាត់នូវភាពឈ្លាសវៃ បណ្តុះបណ្តាលផ្នែកបញ្ញា និងពន្លឿនការចងចាំ។ យ៉ាងណាក្នុងអត្ថបទនេះ Knongsrok សូមចែករំលែកនូវទម្លាប់ ៧ ដែលអ្នកគួរតែអនុវត្ត និងជាពិសេសសម្រាប់អ្នកខួរក្បាលដំណើរការមិនសូវល្អ ឬរាងស្ពឹកស្រពន់គិតមិនសូវបានលឿន៖
៧) លេងហ្គេមកម្សាន្តដែលប្រើប្រាស់ការគិត
មានប្រភេទហ្គេមដែលទាមទារការគិត ឬក្បួនខ្នាតយុទ្ធសាស្រ្តច្រើន តែយើងណែនាំឲ្យជ្រើសរើសការលេងអុក ក៏អាចពន្លឿនភាពវាងវៃរបស់អ្នកបានដែរ។ តាមការសិក្សាបង្ហាញមកថា មនុស្សចំណាស់អាយុលើស ៧៥ ឆ្នាំ ដែលធ្លាប់លេងអុក គឺមិនងាយវិវត្តទៅរកជំងឺវង្វេងនោះទេ។
៦) ផ្លាស់ប្ដូររបបអាហាររបស់អ្នក
អាហារប្រៀបបានដូចជាប្រេងឥន្ធនៈ សម្រាប់រាងកាយនិងខួរក្បាល ប្រសិនណាអ្នកយកអាហារមិនល្អចូលមកក្នុងខ្លួនច្រើនពេក ដូចយកសំរាមមកក្នុងខ្លួនអ៊ីចឹងដែរ។
អ្នកគួរតែទម្លាប់ទទួលទានអាហារដែលមានអាស៊ីតខ្លាញ់អូមេហ្គា ៣ ដែលល្អសម្រាប់ខួរក្បាលនិងការចងចាំ ជាក់ស្តែងដូចជាប្រភេទត្រីសាម៉ុង។ អ្នកដែលកង្វះជាតិអូមេហ្គា ៣ ច្រើនតែឆាប់អស់កម្លាំងនិងមានការភ្លេចភ្លាំងច្រើន។
៥) បង្រៀនអ្នកដទៃ
អ្នកមិនចាំបាច់ទាល់តែជាគ្រូបង្រៀនដែលឆ្លងកាត់ការសិក្សាខ្ពង់ខ្ពស់ឬត្រឹមត្រូវណាមួយនោះទេ។ ត្រឹមតែចំណេះដឹងបន្តិចបន្តួចដែលអ្នកមាន ហើយចូរទម្លាប់យកវាទៅចែករំលែកបង្រៀនមនុស្សជុំវិញខ្លួន ក៏វាជាផ្នែកមួយដែលអាចបំប៉នខួរក្បាលរបស់អ្នកបានខ្លះដែរ។ ព្រោះវាធ្វើឲ្យអ្នកប្រមូលផ្តុំការគិតត្រលប់មកវិញ ដើម្បីយកទៅចែករលែកដល់អ្នកដទៃ។
៤) បង្កើតការកត់ត្រាប្រចាំថ្ងៃ
ជារៀងរាល់ថ្ងៃអ្នកត្រូវមានផែនការណ៍ជាប្រចាំសម្រាប់ខ្លួនឯង ដោយកត់ទុកថាអ្នកត្រូវធ្វើអ្វីខ្លះ អ្នកសម្រេចបានអ្វីខ្លះ នៅដំណើរជីវិតរយៈពេលមួយថ្ងៃនេះ។ វាក៏ជាទម្លាប់ដែលបំផុសទឹកចិត្តអ្នកឲ្យមានការខិតខំ និងជំរុញខួរក្បាលឲ្យមានការគិតវែងឆ្ងាយបន្ថែមទៀតដែរ។
៣) មានគំនិត ១០ ជារៀងរាល់ថ្ងៃ
កុំធ្វើតែរឿងអ្វីមួយ កុំយកពេលទៅគេង ឬសម្ងំធ្វើរឿងអ្វីមួយពេញមួយថ្ងៃ។ ចូរធ្វើឲ្យខួរក្បាលសកម្មលើរឿងជាច្រើនតាមដែលអាចធ្វើទៅបាន។ ឧទាហរណ៍៖ នៅថ្ងៃតែមួយនោះ អ្នកគិតអំពីអាជីវកម្មផង ការហាត់ប្រាណផង ការកម្សាន្តអារម្មណ៍លើភាពយន្តផង ការជជែកកម្សាន្តជាមួយនរណាម្នាក់ផង ពោលគឺធ្វើឲ្យបានច្រើនក្នុងមួយថ្ងៃនោះ។
២) ទម្លាប់អានឲ្យបានច្រើន
ដើម្បីបង្កើនចំណេះដឹង និងទទួលនូវព័ត៌មានថ្មីពីពិភពខាងក្រៅ ចូរអ្នកមានទម្លាប់អានឲ្យបានច្រើន មិនថាតែការអានសៀវភៅ ឬការអានព័ត៌មានលើគេហទំព័រដែលមានប្រយោជន៍ណាមួយ។ ទម្លាប់នៃការអាន ក៏កំពុងបង្វឹកខួរក្បាល ឲ្យចេះមានការវិភាគ មានការព្យាករណ៍ទុកជាមុននូវរឿងដែលនឹងអាចកើតឡើងបានដែរ។
១) អានប្រលោមលោក
ការអានប្រលោមលោកខុសពីការអានព័ត៌មាន ដោយវានឹងបង្វឹកឲ្យខួរក្បាលមានការស្រមើស្រមៃខ្ពស់។ ចូរទម្លាប់អានអត្ថបទឬសៀវភៅប្រលោមលោក ឲ្យបាន ១ ទៅ ២ ដង/សប្តាហ៍ យូរទៅអ្នកនឹងមានអារម្មណ៍ថាខ្លួនឯង ពូកែក្នុងការស្រមៃបានល្អជាងមុន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
