អ្នកកំពុងលើសជាតិប្រៃហើយ បើចេញសញ្ញា ៦ នេះមក ត្រូវប្រញាប់ប្តូររបបអាហារជាបន្ទាន់
របបអាហារប្រចាំថ្ងៃហ្នឹងហើយ ជាកត្តាកំណត់ពីសុខភាពរបស់អ្នកមួយផ្នែកធំ ដែលនាំឲ្យបងប្អូនយើងខ្លះទៅមានជំងឺទឹកនោមផ្អែម/ប្រៃ ឬលើសឈាមជាដើម ក៏ដោយសារតែមិនបានពិនិត្យសុខភាពជាប្រចាំ ឬព្រងើយកន្តើយនៅរោគសញ្ញាមួយចំនួន។
ខាងក្រោម Knongsrok សូមចែករំលែកនូវសញ្ញាព្រមានទាំង ៦ បង្ហាញច្បាស់ថា រាងកាយកំពុងលើសជាតិប្រៃ ដែលទាមទារឲ្យអ្នកត្រូវផ្លាស់ប្តូររបបអាហារជាបន្ទាន់៖
៦) តែងតែមានអារម្មណ៍ស្រេកទឹក
ការទទួលទានអំបិលច្រើនពេក នឹងធ្វើឲ្យរាងកាយត្រូវការបន្ថែមជាតិទឹកជាញឹកញាប់។ វាងាយយល់ទេ ដូចគ្នាទៅនឹងពេលអ្នកទទួលទានអាហារប្រៃ គឺអ្នករមែងស្រេកទឹកជាងពេលទទួលទានអាហារផ្អែមហើយ។
៥) សម្ពាធឈាមឡើងខ្ពស់
សញ្ញាចម្បងមួយផ្សេងទៀត គឺការកើនឡើងនៅសម្ពាធឈាម ដោយសារតែតម្រងនោមរបស់អ្នក។ នោះគឺត្រង់ថាពេលអ្នកទទួលទានជាតិប្រៃច្រើនពេក វានឹងធ្វើឲ្យតម្រងនោមពិបាកក្នុងការកម្ចាត់ជាតិទឹកមិនត្រូវការ ចេញពីរាងកាយ ដែលនាំឲ្យសម្ពាធឈាមមានការកើនឡើង។
៤) ឈឺឆ្អឹង
ការលូតលាស់នៃឆ្អឹង ក៏មានពាក់ព័ន្ធនឹងបរិមាណអំបិលក្នុងខ្លួនរបស់អ្នកផងដែរ។ ប្រសិនអ្នកទទួលទានអំបិលច្រើន នោះតម្រងនោមនឹងមិនអាចបណ្តេញជាតិពុលទាំងអស់ចេញបានទេ នាំឲ្យអ្នកខ្វះជាតិកាល់ស្យូមនៅក្នុងខ្លួន។ កង្វះជាតិកាល់ស្យូមនេះហើយ ដែលងាយឲ្យឆ្អឹងចុះខ្សោយបន្តិចម្តងៗ ហើយសូម្បីតែធ្មេញក៏ងាយពុកផងដែរ។
៣) ហើម
ផ្នែកមួយចំនួនលើដងខ្លួនដូចជាដៃ កជើងវាបានឡើងហើមខុសពីធម្មតា នោះក៏ដោយសារតែមានជាតិប្រៃនៅក្នុងរាងកាយច្រើនពេកផងដែរ។
២) ឧស្សាហ៍ឈឺក្បាល
ពេលសម្ពាធឈាមឡើង ក៏នាំឲ្យសរសៃឈាមវ៉ែនរីកធំ បង្កើតទៅជាហានិភ័យនៃជំងឺលើសឈាម។ នេះជាមូលហេតុនាំឲ្យអ្នកឧស្សាហ៍ឈឺក្បាល សឹងតែរៀងរាល់ថ្ងៃ។
១) ឡើងទម្ងន់
នៅក្នុងមួយសប្តាហ៍ ប្រសិនសង្កេតឃើញថាទម្ងន់ខ្លួនឯងឡើងយ៉ាងឆាប់រហ័ស ឬវាឡើងស្រឺតៗលឿនពេក នោះក៏មកពីជាតិប្រៃក្នុងរាងកាយលើសដូចគ្នា។ សរុបមកបើជួបសញ្ញាព្រមានទាំង ៦ ខាងលើ សូមអ្នកកាត់បន្ថយនៅអាហារដែលមានជាតិប្រៃ តាមដែលអាចធ្វើទៅបាន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
