Chelsea ត្រៀមចាយលុយ ៣ ខ្ទង់បំបែកកំណត់ត្រាយកខ្សែការពារមួយរូប មកជំនួស Rudiger
Antonio Rudiger ទំនងជានឹងចាកចេញច្រើនជាងការបន្តនៅ ក្រោយពីផុតកុងត្រានៅចុងខែមិថុនា ឆ្នាំ ២០២២ ខាងមុខ។ មានក្លឹបធំៗដូចជា Real Madrid, PSG និង Barcelona ជាដើម កំពុងតាមឃ្លាំមើលកីឡាករសញ្ជាតិអាល្លឺម៉ង់។
យ៉ាងណាក្រឡេកមកក្លឹបអាណាព្យាបាលតោខៀវ Chelsea ឯណេះវិញ ពួកគេក៏នឹងមិនព្យាយាមឃាត់ឃាំង Rudiger អ្វីនោះដែរ ហើយមានតែការបំពេញ តាមរយៈការនាំយកអ្នកថ្មី ដោយសារនេះ គឺចាយលុយធំដល់ ៣ ខ្ទង់ទៀតហើយ។
កន្លងទៅទើបតែយក Lukaku ចាយជិត ១០០ លានផោន ឥឡូវលឺថា ត្រៀមលុយធំ ១០៣ លានផោន ឬជាង ១៤០ លានដុល្លារ ទៅចរចាយក Matthijs de Ligt ពីក្លឹប Juventus មួយរូបផ្សេងទៀត ដើម្បីមកបំពេញតំណែងក្របីព្រៃដែលត្រូវចាកចេញ។
តាមប្រភពបានឲ្យដឹងថា កីឡាករវ័យ ២២ ឆ្នាំ ក៏មានបំណងចង់ចាកចេញដែរ បន្ទាប់ពីឃើញទម្រង់លេងរបស់ក្លឹបមានការធ្លាក់ចុះ ដ្បិតអីសុពលភាពកុងត្រារបស់ខ្លួនត្រូវផុតនៅចុងខែមិថុនា ឆ្នាំ ២០២៤ ឯណោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
