ចន្លោះម្រាមដៃ ក៏អាចបង្ហាញពីអនាគតរបស់អ្នក មាន ឬក្របានដែរ
ការក្រឡេកមើលគម្លាតរវាងម្រាមដៃ ក៏អាចធ្វើការទស្សន៍ទាយអំពីចរិតលក្ខណៈ និងជោគវាសនារបស់មនុស្សអ្នកបានដែរ។ តោះ!ស្វែងយល់ទាំងអស់គ្នា។
១. រវាងម្រាមចង្អុលដៃ និងដៃកណ្ដាល មានចន្លោះធំ
មនុស្សដែលមានដៃប្រភេទនេះ ជាមនុស្សមានចិត្តសេរី មិនចូលចិត្តឱ្យអ្នកណាមកគ្រប់គ្រង ឬត្រួតត្រា លើខ្សែជីវិតរបស់គេនោះឡើយ។ យ៉ាងណាមិញ មនុស្សទាំងនេះ ក៏ជាមនុស្សដែលមត់ចត់ ម៉ឹងម៉ាត់ មានការប្រុងប្រយ័ត្នខ្ពស់បំផុត។
បើនិយាយពីវិថីអាជីពវិញ បុគ្គលម្នាក់នេះតែងមានជំនឿថា «ចង់មានបាន ដាច់ខាតមិនត្រូវខ្ជិលច្រអូសឡើយ»។ បើបុគ្គលនេះប្រកាន់នូវទស្សនៈនេះ ប្រហែលអាយុ៤០ឆ្នាំ ជីវិតរបស់បុគ្គលនេះនឹងមានភាពចម្រុងចម្រើនខ្លាំង។
រីឯផ្លូវនៃសេចក្ដីស្រឡាញ់ ជីវិតអាពាហ៍ពិពាហ៍របស់បុគ្គលនេះ ក៏ពោរពេញដោយសុភមង្គលដែរ។ ថ្វីដ្បិតតែពេលខ្លះជួបរឿងចម្រូងចម្រាសតិចតួច តែមនុស្សទាំងនេះចេះដោះស្រាយបញ្ហាក្នុងគ្រួសារបានយ៉ាងល្អប្រសើរ។
២. រវាងម្រាមដៃកណ្តាល និងដៃនាង មានគម្លាតពីគ្នា
មនុស្សដែលមានដៃប្រភេទនេះ ច្រើនតែមានមហិច្ឆតាធំ មិនចូលចិត្តអង្គុយស្ងៀមៗតែមួយកន្លែងនោះឡើយ។ ផ្លូវអាជីពរបស់បុគ្គលនេះ នឹងមានការអភិវឌ្ឍល្អក្រៃលែង បើពួកគេ ចេញទៅធ្វើការនៅឆ្ងាយពីផ្ទះ។
ទោះជាយ៉ាងណាក៏ដោយ បុគ្គលនេះតែងតែធ្វើការដោយអន្ទះអន្ទែង គ្មានផែនការ ច្បាស់លាស់ គ្មានការយកចិត្តទុកដាក់ឱ្យបានគ្រប់ជ្រុងជ្រោយទេ ម្យ៉ាងទៀត មនុសុសទាំងនេះ ក៏មានចរិតអភិរក្សនិយមផងដែរ។
ដូច្នេះហើយ មនុស្សទាំងនេះ ច្រើនតែមិនសូវសល់លុយកាក់ប៉ុន្មានឡើយ ដោយសារតែភាពខ្ជះខ្ជាយ មិនចេះទុកដាក់របស់ពួកគេ។ ប្រសិនបើមានការលំបាក និងបរាជ័យ បុគ្គលនេះងាយបាក់ទឹកចិត្ត និងលះបង់គ្រប់យ៉ាងខ្លាំងណាស់។
៣. រវាងម្រាមដៃនាង និងកូនដៃ មានគម្លាតពីគ្នា
សម្រាប់មនុស្សដែលមានដៃប្រភេទនេះ ច្រើនតែជាអ្នកអភិរក្ស ឬមានទំនុកចិត្តខ្លាំងពេក មិនព្រមស្តាប់ដំបូន្មានអ្នកដទៃទេ។ គ្រប់កិច្ចការងារដែលពួកគេបានធ្វើ គឺធ្វើទៅតាមការយល់ឃើញផ្ទាល់ខ្លួន ដោយមិនខ្វល់នឹងការរួមចំណែករបស់អ្នកជុំវិញខ្លួនឡើយ។ ដូច្នេះហើយ បុគ្គលនេះងាយនឹងមានកំហុស និងមិនសូវចុះសម្រុងនឹងមនុស្សជុំវិញខ្លួនប៉ុន្មានទេ។
ចំពោះទំនាក់ទំនងស្នេហាវិញ មនុស្សទាំងនេះ មិនចូលចិត្តឱ្យដៃគូជ្រៀតជ្រែកក្នុងជីវិតរបស់ពួកគេឡើយ ពួកគេស្អប់ការត្រួតត្រាពីដៃគូ ដូច្នេះ ទំនាក់ទំនងរវាងគេ និងគូស្នេហ៍ ក៏មិនសូវជាចុះសម្រុងប៉ុន្មានដែរ។
ក្នុងរឿងស្នេហាអ្នកនេះក៏បង្ហាញពីចរិតអគតិ អភិរក្សនិយម តែងតែចង់ឱ្យភាគីម្ខាងទៀតធ្វើតាមចិត្តរបស់គេ។ បុគ្គលិកលក្ខណៈនេះងាយនឹងធ្វើឱ្យដៃគូមានអារម្មណ៍នឿយហត់ និងបាក់ទឹកចិត្តខ្លាំងណាស់។
៤. មានគម្លាតគ្រប់ម្រាមដៃ
តាមនិស្ស័យមនុស្សដែលមានដៃប្រភេទនេះ គឺជាមនុស្សដែលពូកែធ្វើការ ពូកែរកលុយ តែក៏ពូកែចាយលុយផងដែរ។ មនុស្សទាំងនេះដៃធំ ដៃទូលាយណាស់ គិតថាលុយស្រួលរក ដូច្នេះ ពួកគេក៏ចាយស្រួលដូចគ្នា។
ទោះជាយ៉ាងណាក៏ដោយ ប្រសិនតែគម្លាតរវាងម្រាមនីមួយៗធំៗ សមាមាត្រចំណូល និងចំណាយមិនស្មើគ្នា ការចំណាយគឺច្រើនជាងចំណូល ដូច្នេះងាយប្រឈមនឹងការលំបាកទៅថ្ងៃអនាគត។
៥. ម្រាមដៃបិទជិតគ្នាគ្មានចន្លោះ
មនុស្សដែលមានដៃបែបនេះ ជាធម្មតាមានចិត្តគំនិតអភិរក្ស ប៉ុន្តែមិនចេះប្រកាន់ច្រើន ឬប្រកាន់បក្សពួកនិយមឡើយ។ ពួកគេមិនពូកែខាងទំនាក់ទំនងទេ ចូលចិត្តនិយាយត្រង់ៗ ដូច្នេះហើយ ពេលខ្លះ គេក៏ធ្វើឱ្យមនុស្សក្បែរខ្លួន មិនពេញចិត្តនឹងសម្ដីត្រង់នវឯង។
នៅកន្លែងធ្វើការ បុគ្គលនេះតែងតែជាមនុស្សរឹងរូស មេកានិច ប៉ុន្តែអត្រាជោគជ័យមានខ្ពស់ខ្លាំងណាស់។
ចំពោះស្ត្រីដែលមានដៃបែបនេះ ជាប្រភេទគ្រួសារ ល្អក្នុងការងារផ្ទះ ទទួលខុសត្រូវការងារផ្ទះ។ ពួកគេចូលចិត្តធ្វើម្ហូបសម្រាប់សមាជិកគ្រួសាររីករាយ។ ចំណែកបុរសដែលមានដៃបែបនេះ គឺជាអ្នករកស៊ីយ៉ាងប្រាកដក្នុងគ្រួសារ។
ក្នុងជីវិត បុគ្គលទាំងនេះរស់នៅដោយមនោសញ្ចេតនា គិតឱ្យបានហ្មត់ចត់ តែងតែគិតដល់អ្នកដទៃ មិនដែលគិតប្រយោជន៍ខ្លួនឯងទេ។ លុយកាក់ ចាប់ពីវ័យកណ្តាលឡើង ពួកគេមានតែហូបគ្រប់គ្រាន់ និងហៀរហូរ មិនមានការខ្វះខាតអ្វីឡើយ៕
ប្រភព ៖ Phunutoday / Knongsrok
ព័ត៌មានថ្មីៗ
