ស្ថានភាពជីវិតរបស់មនុស្សម្នាក់ៗមិនដូចគ្នាទេ ដូច្នេះហើយ ខំប្រឹងទៅតាមលទ្ធភាព និងសមត្ថភាពរបស់យើងទៅ ឈប់ប្រៀបធៀបខ្លួនឯងទៅនឹងអ្នកដទៃ
- ផ្លូវនីមួយៗ សុទ្ធតែមានចំណុចចាប់ផ្ដើម!
- រឿងនីមួយៗ សុទ្ធតែមានដើមហេតុ និងជំពូកដំបូង!
- ទំព័រនីមួយៗ សុទ្ធតែមានបន្ទាត់ទីមួយ!
- ការឡើងភ្នំនីមួយៗ សុទ្ធតែមានជំហានដំបូង!
- ហើយរាល់សមិទ្ធិផលជោគជ័យទាំងអស់ គឺសុទ្ធតែមានការព្យាយាមដំបូង!
ពេលខ្លះ យើងតែងតែប្រៀបធៀបជីវិតរបស់យើង ទៅនឹងមនុស្សជុំវិញខ្លួន រហូតដល់ធ្វើឱ្យខ្លួនឯងបាក់ទឹកចិត្ត និងអស់សង្ឃឹម ... តែយើងភ្លេចគិតថា ការពិតទៅ យើងមានចំណុចចាប់ផ្ដើមខុសពីអ្នកដទៃ យើងមានពេលវេលាខុសពីគេ យើងមានស្ថានភាពជីវិតមិនដូចអ្នកផ្សេងឡើយ។
យ៉ាងណាមិញ យើងទាំងអស់គ្នារីកចម្រើនក្នុងអត្រាផ្សេងៗគ្នា មានជំនាញផ្សេងៗគ្នា និងត្រូវបានផ្តល់ឱកាសក៏ផ្សេងៗគ្នាដែរ ដូច្នេះហើយការប្រៀបធៀបផលផ្លែផ្កានៃកម្លាំងពលកម្មរបស់មនុស្សម្នាក់ ជាមួយនឹងមនុស្សម្នាក់ទៀត គឺជាការប្រៀបធៀបមិនយុត្តិធម៌នោះឡើយ។
នៅពេលដែលយើងចាប់ផ្តើមពីអ្វីមួយ ហើយឃើញលទ្ធផលតិចតួច យើងអាចមានអារម្មណ៍ថាតូចណាស់ តិចណាស់ មិនជោគជ័យ និងពោរពេញដោយការសង្ស័យមកកាន់ខ្លួនឯង។
ទោះជាយ៉ាងណាក៏ដោយ នៅពេលដែលយើងដឹងថា អ្នកផ្សេងទៀតធ្លាប់ស្ថិតក្នុងដំណាក់កាលដូចគ្នា ពេលនេះយើងកំពុងប្រឈមមុខនឹងការភ័យខ្លាច ការសង្ស័យ និងអសន្តិសុខដូចគ្នា អាកប្បកិរិយារបស់យើងអាចផ្លាស់ប្តូរទៅជាការបំផុសគំនិតមួយ ខណៈដែលភាពជោគជ័យរបស់អ្នកដទៃ អាចជាសញ្ញាប្រាប់យើងនូវអ្វីដែលអាចធ្វើទៅបាន និងអាចសម្រេចបានសម្រាប់យើង។
ហើយនៅពេលដែលយើងអាចយល់បានថា ជោគជ័យមិនមែនជាបន្ទាត់ យើងអាចដឹងគុណ និងយល់យ៉ាងច្បាស់ថា ការចាប់ផ្តើមដំបូង ភាពក្លាហានក្នុងការដាំគ្រាប់ពូជដំបូង និងការរីកចម្រើន និងបន្ត គឺគ្រាន់តែជាការកត់សម្គាល់ និងគួរឱ្យចាប់អារម្មណ៍ដូចជាការប្រមូលផលចុងក្រោយ និងការមើលឃើញលទ្ធផលចុងក្រោយតែប៉ុណ្ណោះ។
ហើយប្រសិនបើអ្នកដើរតាមគន្លងអ្នកដទៃ នោះអ្នកនឹងដឹងថា ការពិតទៅ គេក៏ធ្លាប់ឈរនៅកន្លែងដែលអ្នកកំពុងតែឈរ និងជួបប្រទះនៅពេលនេះដែរ។ ប៉ុន្តែសូមកុំភ្លេចថា ពេលខ្លះ ការចាប់ផ្ដើម ឬដើរតាមគន្លងអ្នកផ្សេង អ្នកអាចនឹងមិនបានផលដូចគេទេ ព្រោះស្ថានភាពយើងផ្សេងពីគេ ដូច្នេះ លទ្ធផលក៏មិនដូចគ្នាដែរ ...៕
អត្ថបទប្រែសម្រួល ៖ pHknongsrok / Knongsrok
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖
ព័ត៌មានថ្មីៗ
