អ្នកកើតឆ្នាំទាំង ៤ ខាងក្រោម និយាយតែចំពោះមនុស្សស្រី ចាំសង្កេតមើលចុះ ពួកនាងលំបាកមិនយូរទេ សុខៗក៏ដូចមានវិញ្ញាណល្អ មានអ្វីម្យ៉ាងមករំដោះផុតពីទុក្ខ គ្រោះភ័យទាំងឡាយ ឲ្យក្លាយទៅជាសំណាងល្អវិញ៖
ស្រ្តីកើតឆ្នាំជូត – កណ្តុរ
ងាយនឹងត្រូវបានគេបោកប្រាស់ ឬជំពាក់នេះជំពាក់នោះឥតល្ហែរ តែនាងតែងមានការលើកលែង អធ្យាស្រ័យ ហើយគុណបុណ្យរបស់នាង ក៏ដូចជាកម្មដែលជនដទៃបានសាង មិនយូរមិនឆាប់ក៏គង់តែបង្វែរត្រលប់មក។
ជួបទុក្ខលំបាក ជួបបញ្ហាធ្ងន់កម្រិតណា ក៏គង់តែអាចដោះស្រាយចេញ ដោយតែងតែមានគេមកជួយជារឿយៗ ជំនួយកើតដោយចៃដន្យ ឬសុខៗមានគេមកផ្តល់នេះ ផ្តល់នោះ ដែលវាពេលខ្លះ ពិតជាចូលរួមចំណែកជួយម្ចាស់ឆ្នាំជូតបានច្រើនណាស់។
សឹងតែថា មិនចង់ជឿ ព្រោះពេលជួបទុក្ខ លំបាកតែមួយឆាវ ក៏កើតសុខចូលមកបាំងជិត ទាំងដែលយើងខ្លួនឯង ក៏មិនគិតរកឃើញផ្លូវដោះស្រាយចេញ។ ទាំងនេះហើយ គេហៅថា សំណាង គេហៅថា គុណបុណ្យពីអតីតជាតិ ឬទង្វើល្អដែលអ្នកធ្លាប់បានសាងនោះឯង។
ស្រ្តីកើតឆ្នាំឆ្លូវ – គោ
ស្រ្តីកើតឆ្នាំឆ្លូវ មានចរិតស្លូតបូត ឧស្សាហ៍ព្យាយាម ស្មោះត្រង់ និងមានចិត្តសប្បុរសណាស់។ នាងតែងតែចូលចិត្តតវ៉ា ឬចូលរួមជួយ ប្រសិនឃើញអ្នកទន់ខ្សោយណាត្រូវគេមាក់ងាយ ឬជិះជាន់ផ្លូវចិត្ត។
អំពើល្អទាំងនេះ ក៏ជាចំណែកមួយដែរ ជួយកែប្រែឲ្យម្ចាស់ឆ្នាំឆ្លូវ តែងជួបទេវតាចាំជួយស្រោចស្រង់ ឲ្យចេញពីរណ្តៅលិចលង់ ឡើងមកទីខ្ពស់ ឈរផុតអស់មារ សត្រូវទាំងឡាយ។ ជាទូទៅនាងតែងជាបុគ្គលគំរូ ដែលល្អទាំងក្នុងអាជីពការងារ ការរកស៊ី រួមទាំងការមើលថែផ្ទះសម្បែង។
នាងចេះបែងចែកអារម្មណ៍បានល្អណាស់ មិនឲ្យលាយឡំច្របូកច្របល់ ស្មុគស្មាញផ្លូវចិត្តខ្លាំងឡើយ រួចបើជាមួយអ្នកដទៃផង គឺមិនងាយបើកចំហរឲ្យនរណាដឹងពីអារម្មណ៍លាក់ទុកខាងក្នុងរបស់នាង។ មនុស្សស្រីនេះ អាចពិបាកបន្តិច ត្រង់ពេលខ្លះ រឹងមាំពេក ពិបាកនឹងរកដៃគូផ្គាប់និស្ស័យក្នុងជីវិត។
ស្រ្តីកើតឆ្នាំរោង – នាគ
ជាមនុស្សរឹងមាំ ក្លាហាន តាំងពីថ្ងៃចាប់កំណើត ដោយរាល់ការសម្រេចចិត្តអ្វីមួយ តែងមានរៀបចំផែនការណ៍ច្បាស់លាស់ គិតយ៉ាងល្អិតល្អន់ ទុកផ្លូវក្រោយឲ្យខ្លួនឯងដើរ ពោលមិនងាយដើរខុសផ្លូវឡើយ។
ពេលជួបប្រទះបញ្ហា ក៏ប្រទះមិនយូរ ក្រៅតែពីនៅមិនស្ងៀម ព្យាយាមជួយខ្លួនឯងចេញពីការលំបាក ក៏ស្រាប់តែដូចមានវិញ្ញាណល្អរំលេចចេញមក ហើយជួយបណ្តុះគំនិត បណ្តុះឲ្យឃើញដំណោះស្រាយ ស្រាយផុតអស់ទុក្ខសោក ដែលបានកើតក្នុងជីវិត ខិតជិតមកវិញ តែក្តីសុខ ស្នាមញញឹមទាំងចំពោះខ្លួនឯង និងក្រុមគ្រួសារដែលនៅក្បែរកាយ។
ភាពសម្បូរសប្បាយតែងរំលេចច្រើនជាងទុក្ខ ក៏អរគុណនូវព្រះសំណាង តែងសាងភាពមានបាន ចាំក្បែរជួយគាំទ្រជានិច្ច។ ធ្មេចបើករវល់តែនឹងរឿងលុយកាក់ តែមិនរវល់ជំពាក់ជំពិន ផ្ទុយទៅវិញ គឺរវល់នឹងរាប់ប្រាក់ចំណេញទុកក្នុងហោប៉ៅខ្លួនឯង។
ស្រ្តីកើតឆ្នាំរកា - មាន់
នាងតែងដើរផ្លូវវាង តែដើរដោយភាពឈ្លាសវៃ មិនងាយឲ្យភ្លាត់ស្នៀតដោយការចាប់កំហុសពីជនណាម្នាក់ឡើយ។ អំពើនេះ មិនបានធ្វើបាប ឬកេងលើនរណាម្នាក់ទេ ផ្ទុយទៅវិញ រាប់ថានាងឈ្លាសវៃ មានចំណុចលេចធ្លោជាងមនុស្សជុំវិញខ្លួន អ្វីដែលមនុស្សភាគច្រើនធ្វើមិនបាន ចាំតែមើលចុះ រមែងស្រ្តីកើតឆ្នាំរកា ធ្វើបានទាំងអស់។
មនុស្សនេះ ជោគជ័យ ឬបរាជ័យគឺនៅជិតបង្កើយ មានន័យថា គ្រប់ជំហានដែលដើរ គឺបានដឹងមុនរួចអស់ កម្រទស្សន៍ទាយខុសណាស់ ពីជោគវាសនារបស់ខ្លួនឯង។ បើដួលក៏ងើបដោយខ្លួនឯង ហើយបើជួបបញ្ហាខ្លាំងដល់បាក់ទឹកចិត្ត ក៏ខូចចិត្តមិនយូរ សម្ងំតែមួយភ្លែត ក៏ដូចមានអ្វីមកប្រាប់ឲ្យក្រោកឡើងវិញ ហើយដើរទៅមុខទៀត ដោយភាពជោគជ័យខ្លាំងជាងមុនផងដែរ៕
ប្រភព៖ បរទេស | ប្រែសម្រួល៖ ក្នុងស្រុក