ជ្រើសរើសសន្លឹកបៀរដាស់ចិត្តមួយ ដើម្បីយកសារណែនាំល្អបំផុត នាសប្តាហ៍ថ្មីបិទឆ្នាំ ២០២២
វិលចុះវិលឡើង ចូលមកដល់សប្តាហ៍ថ្មីមួយទៀតហើយ ក៏ជាសប្តាហ៍បិទឆ្នាំ ២០២២ នេះយើងរាប់ចន្លោះថ្ងៃ ២៦ ដល់ ០១ មករា ហើយសម្រាប់ជីវិតមួយនេះ តើអ្នកគួរទទួលបានសារណែនាំអ្វីខ្លះ? Knongsrok នាំឲ្យអ្នកមកជ្រើសរើសសន្លឹកបៀរដាស់ចិត្តមួយ ហើយទៅទទួលយកសារដ៏មានតម្លៃនៅខាងក្រោម៖
សន្លឹកបៀរទី ១
ទម្លាប់តាំងពីដើមមកហើយ អ្នកចង់បានអ្វី ត្រូវការអ្វី គឺអ្នករមែងដាក់គោលដៅនិងរៀបចំខ្លួនដើម្បីយកវាដោយខ្លួនឯង។ អ្នកមិនមែនជាមនុស្សដែលពឹងផ្អែកលើអ្នកដទៃនោះទេ។
យ៉ាងណាចូរអ្នកបន្តបែបនេះទៀត ព្រោះជាការពិតគំនិតយោបល់របស់អ្នកដទៃ មិនអាចជួយអ្នក ១០០ ភាគរយបានឡើយ ហើយការរិះគន់មួយចំនួនក៏មិនសុទ្ធតែទាមទារឲ្យអ្នកផ្លាស់ប្តូរនោះដែរ។ ប៉ុន្តែមួយរយៈនេះ ពាក្យពេចន៍របស់គេនៅតែដក់ជាប់ក្បែរត្រចៀកអ្នក តាមលងអារម្មណ៍អ្នក ឲ្យគេងមិនបានស្កប់ស្កល់ អ៊ីចឹងវាដល់ពេលដែលអ្នកត្រូវផ្លាស់ប្តូរការគិតបែបហ្នឹងហើយ។
សន្លឹកបៀរទី ២
អ្នកជាមនុស្សម្នាក់ដែលមានចិត្តល្អ មានសប្បុរសធម៌ជាមួយមនុស្សជុំវិញខ្លួន។ អ្នកពេញចិត្តនឹងជួយអ្នកដទៃ បើទោះបីជារឿងនោះមិនចាំបាច់ក៏ដោយ។
ប៉ុន្តែអ្នកខ្លួនឯងជាមនុស្សលាក់អារម្មណ៍ ដែលស្ថិតនៅគ្រប់ស្ថានភាពអ្នកនៅតែញញឹម រក្សាឆន្ទៈបង្ហាញមិនឲ្យគេឃើញថាខ្លួនឯងលំបាក ទាំងដែលការពិតគឺក្នុងចិត្តមានការតប់ប្រមល់ នឿយហត់ខ្លាំងណាស់។ ជឿទៅអ្នកនៅតែខ្លាំង អ្នកនៅតែអាចធ្វើបាន ចូរបន្តភាពរឹងមាំរបស់អ្នកដដែល តែត្រូវចាប់យកឱកាសបង្ហាញពីភាពអស្ចារ្យរបស់អ្នកទៅពិភពខាងក្រៅឲ្យបាន។
សន្លឹកបៀរទី ៣
ជាសន្លឹកបៀរ ដែលទាក់ទងនឹងក្តីស្រលាញ់។ អ្នកហាក់កំពុងស្រលាញ់នរណាម្នាក់ តែមិនហ៊ាននិយាយទៅកាន់គេ មិនក្លាហាននឹងសារភាពប្រាប់ទៅគេ ព្រោះខ្លួនឯងគិតថាខ្លួនឯងមិនសក្តិសមនឹងគេទាល់តែសោះ។
អ្នកខ្លាចបំផុត គឺចម្លើយបដិសេធ ពីមនុស្សដែលខ្លួនស្រលាញ់បំផុត។ វាដល់ពេលដែលត្រូវក្លាហានឡើងហើយ ហើយក៏មិនត្រូវឲ្យការស្រលាញ់មកលងបន្លាចខ្លួនឯងអ៊ីចឹងទៀតដែរ។ បើអ្នកស្រលាញ់គេពិត អ្នកគួរតែសាកល្បងប្រាប់ទៅគេ ទោះចម្លើយបែបណាក៏វាធ្វើឲ្យអ្នកអស់ចិត្ត ហើយដឹងថាខ្លួនឯងត្រូវការកែតម្រូវអ្វីខ្លះដែរ។
សន្លឹកបៀរទី ៤
អ្នកមិនមែនជាមនុស្សយន្តនោះទេ ហើយបើទោះបីជាគ្រឿងម៉ាស៊ីន ក៏វាត្រូវការពេលសម្រាកផងដែរ។ ពេលខ្លះអ្នកសម្រេចការងាររបស់ខ្លួនរួចរាល់ហើយ តែនៅទទួលបន្ទុកមកជួយការងារអ្នកក្បែរខ្លួនថែមទៀត។
អ្នកហត់ពេកហើយ ចូរសម្រាកបន្តិចទៅ យកភាពស្ងប់ស្ងាត់ដាក់ខ្លួនបន្តិចទៅ សឹមបន្តភាពជាខ្លួនឯងទៅមុខទៀត ហើយកុំបោះបង់ក្តីស្រមៃរបស់ខ្លួនឯងឲ្យសោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
