កម្មវិធីឆ្លងឆ្នាំសកលក៏កៀកនឹងចូលមកដល់ ហើយតាមបណ្តាខេត្ត/ក្រុង រាជធានីនានា បានមានការរៀបចំព្រឹត្តិការណ៍ដើម្បីអបអរ ដោយឡែកចាប់អារម្មណ៍ឃើញខេត្តបាត់ដំបង ក៏កំពុងក្លាយជាគោលដៅអាទិភាពមួយ ក្នុងដួងចិត្តរបស់បងប្អូនយើងជាច្រើន។
រដ្ឋបាលខេត្តបាត់ដំបង បានសហការជាមួយមន្ទីរវប្បធម៌ និងវិចិត្រសិល្បៈខេត្ត មន្ទីរទេសចរខេត្ត ក៏ដូចជាអង្គភាពពាក់ព័ន្ធនានា ក្នុងខេត្តបាត់ដំបង បានត្រៀមខ្លួនរួចជាស្រេចដោយបានបំពាក់ភ្លើងចម្រុះពណ៌នៅតាមសួនច្បារសាធារណៈ និងមុខអគាសាលាខេត្តបាត់ដំបង ដើម្បីត្រៀមរៀបចំនូវព្រឹត្តិការណ៍ដាក់តាំងបង្ហាញពិព័រណ៍មុខម្ហូបខ្មែររបស់អ្នកស្រុកខេត្តបាត់ដំបង និងពិធីឆ្លងឆ្នាំសាកល ២០២២ឈានចូល២០២៣ ។
អាជ្ញាធរបានរៀបចំឱ្យមានព្រឹត្តិការណ៍ដាក់តាំងបង្ហាញពិព័រណ៍មុខម្ហូបខ្មែររបស់អ្នកស្រុកនៅខេត្តបាត់ដំបង ដែលល្បីល្បាញមានថ្វីដៃធ្វើម្ហូបឆ្ងាញ់ៗ ដើម្បីបង្ហាញជូនដល់ភ្ញៀវទេសចរជាតិ និងអន្តរជាតិ ដែលមកកម្សាន្ត នៅក្នុងឱកាសអបអរសាទរពិធីឆ្លងឆ្នាំសាកល ២០២២ ឈានចូល២០២៣ មានរយៈពេល២ថ្ងៃ ចាប់ពីថ្ងៃទី៣០-៣១ ខែធ្នូ ឆ្នាំ២០២២នេះ ។
សូមបញ្ជាក់ថា នៅក្នុងព្រឹត្តិការណ៍ពិព័រណ៍ម្ហូបអាហារនេះ រដ្ឋបាលខេត្តបាត់ដំបង បានរៀបចំឱ្យមានការដាក់តាំងពិព័រណ៍ភូមិមួយផលិតផលមួយ ពិព័រណ៍ផលិតផលចម្រុះ ទីតាំងថតរូបស្អាតៗ និងការសម្តែងសិល្បៈ របាំប្រពៃណី និងរបាំប្រជាប្រិយរបស់មន្ទីរវប្បធម៌និងវិចិត្រសិល្បៈខេត្ត ការសម្តែងសៀករបស់អង្គការហ្វាពន្លឺសិល្បៈខេត្ត ការប្រគំតន្ត្រី និងការបាញ់កាំជ្រួចតូចធំ នៅរាត្រីថ្ងៃទី៣១ ខែធ្នូ ឆ្នាំ២០២២ ដើម្បីអបអរសាទរការឆ្លងឆ្នាំចាស់ឈានចូលឆ្នាំថ្មី ឆ្នាំសាកល នារាត្រីថ្ងៃទី១ ខែមករា ឆ្នាំ២០២៣ ផងដែរ៕