ពេលចាស់ទៅ! រឿង ៣ យ៉ាងនេះ វាគួរឱ្យខ្លាច ជាងការដែលនៅម្នាក់ឯងទៅទៀត
នៅពេលដែលអ្នកអាយុកាន់តែច្រើន វ័យកាន់តែចាស់ យើងនឹងដឹងកាន់តែច្បាស់ថា ការរស់នៅម្នាក់ឯង វាមិនគួរឱ្យខ្លាចដូចអ្វីដែលយើងមិនគិតនោះឡើយ។ ផ្ទុយទៅវិញ មានរឿង ៣ យ៉ាង ដែលនឹងធ្វើឱ្យយើងមានអារម្មណ៍ខូចចិត្ត ឈឺចាប់ ហើយវាក៏ជារឿងដែលគួរឱ្យខ្លាច ជាងការរស់នៅម្នាក់ឯងទៅទៀត។
១. ខ្លាចការដែលមានដៃគូ តែគេធ្វើឱ្យយើងមានអារម្មណ៍ថា ឯកា
ពេលមនុស្សកាន់តែចាស់ ប្ដីប្រពន្ធក៏ចាស់ដែរ។ នេះគឺជាពេលវេលាដែលភាគីទាំងពីរត្រូវយកចិត្តទុកដាក់បន្ថែមទៀត ជួយគ្នា រស់នៅជាមួយគ្នា មើលថែគ្នា និងស្រឡាញ់គ្នារហូតដល់ថ្ងៃចុងក្រោយនៃជីវិត។ ហេតុនេះហើយបានជាយើងនិយាយថា ស្នេហាមានតម្លៃ ប៉ុន្តែស្នេហាចាស់កាន់តែល្អពិសិដ្ឋ។
ទោះជាយ៉ាងនេះក្តី វានឹងមិនប្រែប្រួលឡើយ នៅពេលដែលមនុស្សកំដរយើងដល់វ័យចាស់ ជាមនុស្សគ្មានស្ងៀមស្ងាត់ តឹងតែង មិនមានភាពស្និទ្ធស្នាល មិនមានការយកចិត្តទុកដាក់ មិនយល់ពីយើង តែងតែទុកយើងចោលដផយមិនខ្វល់ពីយើងសោះ នោះហើយ ជាជីវិតគូដែលគ្មានន័យ និងគួរឱ្យខ្លាចបំផុត។
ការរស់នៅបែបនេះ គឺគួរឱ្យខ្លាចជាងការនៅម្នាក់ឯងរាប់រយដង វាធ្វើឱ្យយើងមានអារម្មណ៍ខកចិត្ត និងឈឺចាប់ ដូចធ្វើទារុណកម្មខ្លួនឯងអ៊ីចឹង។ ដូច្នេះ ជំនួសឱ្យការត្អូញត្អែរច្រើនពេក ចូរយើងចេះយោគយល់ និងអធ្យាស្រ័យគ្នាទៅវិញទៅមក។ ដូច្នេះពេលចាស់ទៅ ត្រូវចេះថែទាំអស់ពីចិត្ត មិនថាក្ដៅរងា ត្រូវចេះមើលថែ ការពារ ចែករំលែកអំពីជីវិតជាមួយគ្នាទៅវិញទៅមក។
២. គ្មានប្រាក់សន្សំ ឬលុយបម្រុងនៅជាប់នឹងខ្លួន
មនុស្សតែងតែគិតថាអាយុចាស់ គឺជាពេលសម្រាក។ នៅពេលនេះ យើងលែងមានការរំពឹងទុកច្រើន ឬត្រូវទទួលខុសត្រូវខ្ពស់ទៀតហើយ ប៉ុន្តែបានធ្លាក់ចូលទៅក្នុងគន្លងដែលមានស្ថិរភាព។ ដូច្នេះ ក្នុងស្ថានភាពនេះដោយគ្មានមូលនិធិសន្សំសំខាន់ គឺជាបញ្ហានៃវិបត្តិដ៏ធំធេង។
នៅលើលោកនេះ អ្វីៗសុទ្ធតែប្រថុយប្រថាន។ ដូច្នេះហើយ អ្នកត្រូវតែមានការរៀបចំទំនុកបម្រុងទុកជាមុន ក៏ដូចជាសមត្ថភាពក្នុងការទប់ទល់នឹងពួកគេ ជាពិសេសក្នុងវ័យចំណាស់ នៅពេលដែលហ៊ុំព័ទ្ធដោយបញ្ហាជាច្រើនដូចជា ការហូបចុក ថ្នាំសង្កូវ ពេទ្យ ជួបជុំមិត្តភ័ក្តិ ឬការធ្វើដំណើរកម្សាន្ត អ្វីៗសុទ្ធតែត្រូវការលុយ។ ដូច្នេះចាប់ពីពេលនេះទៅ អ្នកគួរតែខំប្រឹងសន្សំប្រាក់ទុកសម្រាប់ខ្លួនឯង កុំចាយវាយ ខ្ជះខ្ជាយច្រើនពេក ជាពិសេសគឺទៅលើរបស់ដែលគ្មានប្រយោជន៍។
៣. រងទុក្ខដោយសារជំងឺរុំារ៉ៃ
ក្នុងវ័យចាស់ មនុស្សជាច្រើនពេលដេកលើគ្រែ កើតជំងឺនឹងសោកស្ដាយថា ហេតុអ្វីបានជាពួកគេរស់នៅដោយមិនខ្វល់អំពីសុខភាពសោះកាលពីមុន ហើយមិនដឹងពីរបៀបថែរក្សាសុខភាពទៀតផង។ ពេលដែលសុខភាពនៅតែពោរពេញដោយថាមពល មិនដែលខ្វល់ យកចិត្តទុកដាក់ទេ រស់នៅគ្មានច្បាប់វិន័យ ហូបចុកមិនប្រុងប្រយត្ន័ រហូតធ្លាក់ចូលក្នុងទម្លាប់អាក្រក់គ្រប់បែបយ៉ាង។ ដល់ពេលរាងកាយទ្រុឌទ្រោមទ្រាំមិនបាន វាក៏យឺតពេល ឈឺហៅលែងឮទៅហើយ។
ដូច្នេះបើនៅក្មេងត្រូវចេះរក្សាទម្លាប់រស់នៅឱ្យបានល្អ កុំខ្ជះខ្ជាយលុយកាក់ និងសុខភាពតាមទម្លាប់គ្មានប្រយោជន៍។ បើចាស់ចេះថែរក្សាចិត្ត ធ្វើលំហាត់ប្រាណ ទើបបានសុខសប្បាយជារៀងរាល់ថ្ងៃ៕
ប្រភព ៖ បរទេស / Knongsrok
ព័ត៌មានថ្មីៗ
