សារព័ត៏មានវៀតណាមចាប់អារម្មណ៍ស្ដាយ៍លោក Honda ក្នុងការប្រកួតយប់មិញ
នៅល្ងាចថ្ងៃទី ២៩ ខែមេសា ក្រុម U22 របស់កម្ពុជា បានបើកឆាកដោយជោគជ័យក្នុងការប្រកួតដំបូងក្នុងវគ្គចែកពូលនៃការប្រកួតបាល់ទាត់បុរសក្នុងព្រឹត្តិការណ៍ស៊ីហ្គេមលើកទី៣២។
ក្នុងការប្រកួតនេះ ទ័ពរបស់គ្រូបង្វឹក Keisuke Honda បានយកឈ្នះគូប្រកួត U22 ទីម័រខាងកើតយ៉ាងល្អក្នុងលទ្ធផល ៤-០។ គ្រាប់បាល់ស៊ុតបញ្ចូលទីដោយ៖ ជូ ស៊ិនទី, ស រតនា និង លឹម ពិសុទ្ធ។
សារព័ត៏មានវៀតណាម The Thao បានសរសេរបែបនេះថា៖ « ជាការកត់សម្គាល់ គ្រូបង្វឹក Honda មិនបានចូលរួមសន្និសីទសារព័ត៌មានក្រោយការប្រកួតនោះទេ។ ផ្ទុយទៅវិញ អ្នកចាត់ការសញ្ជាតិជប៉ុនស្រាប់តែបង្ហោះ Status ក្នុងគណនីផ្ទាល់ខ្លួនរបស់លោកនៅលើបណ្តាញសង្គម Facebook, Twitter។ ជាក់ស្តែងគ្រូបង្វឹក Honda បានចែករំលែកថា៖ "អរគុណចំពោះការគាំទ្រក្រុម U22 កម្ពុជា យើងនឹងបន្តទន្ទឹងរង់ចាំការប្រកួតបន្ទាប់!"។»
តាមសេចក្តីរាយការណ៍ដែលបានបង្ហោះជាមួយស្ថានភាពខាងលើគឺជារូបថតផ្ទាល់ខ្លួនរបស់គ្រូបង្វឹក Honda ក្នុងស្ថានភាពរីករាយនិងផាសុកភាពបំផុត។ ប្រហែលជាគ្រូបង្វឹក U22 កម្ពុជា មានការពេញចិត្តជាខ្លាំង ចំពោះជ័យជម្នះលើកដំបូងរបស់ក្រុមម្ចាស់ផ្ទះស៊ីហ្គេម លើកទី៣២។
លើសពីនេះ គ្រូបង្វឹក Keisuke Honda ក៏បានទាក់ទាញការចាប់អារម្មណ៍ជាមួយនឹងស្ទីលម៉ូដ "ប្លែក" របស់គាត់នៅពេលបង្ហាញខ្លួនក្នុងការប្រកួត U22 កម្ពុជា ប៉ះ U22 ទីម័រខាងកើត។ ជាពិសេស លោក ហុងដា ស្លៀកសំលៀកបំពាក់ស្រួលៗ ដូចពេលទៅវិស្សមកាលរដូវក្តៅ ខុសពីស្ទីលឆើតឆាយពីមុន។
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
ព័ត៌មានថ្មីៗ
