រោគសញ្ញាធំៗ ៥ បង្ហាញថា អ្នកកំពុងខ្វះវីតាមីន C ដែលត្រូវការបន្ថែមឲ្យបានគ្រប់គ្រាន់ជាបន្ទាន់
ថ្ងៃនេះ "ក្នុងស្រុក" សូមណែនាំរោគសញ្ញាសំខាន់ៗមួយចំនួនដែលបានលេចឡើងលើរាងកាយរយៈពេលយូរ បង្ហាញថា កំពុងកង្វះវីតាមីនស៊ី ដែលត្រូវតែបន្ថែមឲ្យបានគ្រប់គ្រាន់ជាបន្ទាន់ ដើម្បីធ្វើឲ្យសុខភាពរឹងមាំ៖
១.អស់កម្លាំងឥតឈប់ឈរ និងមានអារម្មណ៍មិនល្អ
មនុស្សភាគច្រើនដែលមានកង្វះវីតាមីន C ងាយនឹងនឿយហត់ សូម្បីតែបន្ទាប់ពីគេងលក់ស្រួល ឬកាត់បន្ថយការប្រើប្រាស់ថាមពលទាំងមូលក៏ដោយ។ ជាមួយគ្នានេះកង្វះវីតាមីននេះក៏ប៉ះពាល់ដល់ស្ថានភាពផ្លូវចិត្ត ងាយបង្កជាកំហឹង និងមានអារម្មណ៍ឆាប់ខឹងផងដែរ។
យ៉ាងណាក៏ដោយ ទោះបីជាភាពអស់កម្លាំង និងឆាប់ខឹងអាចជារោគសញ្ញាដំបូងដែលលេចឡើងក៏ដោយ ជាធម្មតាពួកវាអាចបាត់ទៅវិញបន្ទាប់ពីពីរបីថ្ងៃនៃការទទួលទានអាហារបំប៉នវីតាមីន C គ្រប់គ្រាន់ ឬក្នុងរយៈពេល ២៤ ម៉ោងបន្ទាប់ពីការទទួលទានអាហារបំប៉នវីតាមីន C កម្រិតខ្ពស់។
២.មានអារម្មណ៍ថាប្រព័ន្ធភាពស៊ាំខ្សោយ អ្នកនឹងឈឺរយៈយូរ
វីតាមីន C ជួយជំរុញការផលិតកោសិកាឈាមស ដែលវាយប្រហារបាក់តេរី និងមេរោគ ហើយត្រូវបានគេចាត់ទុកថា ជាផ្នែកមួយនៃការឆ្លើយតបទៅប្រព័ន្ធភាពស៊ាំរបស់រាងកាយ។ ក្រៅពីនេះ វីតាមីន C ក៏ជួយការពារកោសិកាភាពស៊ាំឱ្យដំណើរការកាន់តែមានប្រសិទ្ធភាព ការពារបាក់តេរី និងមេរោគមិនឱ្យវាយប្រហាររាងកាយ។
ប្រសិនបើអ្នកកង្វះវីតាមីន C នៅក្នុងខ្លួន ក៏អាចជាមូលហេតុដែលធ្វើឲ្យអ្នកងាយនឹងកើតជំងឺផ្សេងៗ ជាពិសេសជំងឺទូទៅដូចជា ផ្តាសាយ គ្រុនក្តៅ ក្អក ឈឺក។
៣.ឧស្សាហ៍លេចចេញស្នាមជាំ និងមុខរបួសមិនងាយជាសះស្បើយ
បើអ្នករកឃើញថា រាងកាយរបស់អ្នកមានស្នាមជាំយ៉ាងងាយ ហើយមុខរបួសបានជាសះស្បើយយូរជាងធម្មតា នោះគឺជាសញ្ញាបង្ហាញថា រាងកាយរបស់អ្នកខ្វះវីតាមីន C ហើយ។ មូលហេតុនៅពេលដែលរាងកាយរបស់អ្នកខ្វះវីតាមីន C អាចជាសញ្ញានៃការពន្យឺតការបង្កើតកូឡាជែន និងធ្វើឱ្យសរសៃឈាមចុះខ្សោយ។
ដូច្នេះហើយ ប្រសិនបើរាងកាយរបស់អ្នកលេចចេញស្នាមជាំយ៉ាងងាយ ឬត្រូវចំណាយពេលយូរជាងធម្មតាក្នុងការព្យាបាល អ្នកប្រហែលជាខ្វះវីតាមីន C ដែលគួរតែបន្ថែមឲ្យបានពេញលេញ។
៤.ឧស្សាហ៍ហើមអញ្ចាញធ្មេញ និងហូរឈាម
នៅពេលដែលរាងកាយរបស់មនុស្សមិនបានបំពេញបន្ថែមនូវវីតាមីន C គ្រប់គ្រាន់ អ្នកនឹងងាយនឹងកើតជំងឺអញ្ចាញធ្មេញ បើទោះបីជាមានអនាម័យមាត់ត្រឹមត្រូវក៏ដោយ។ កង្វះវីតាមីន C និងធ្វើឲ្យជាលិកាអញ្ចាញធ្មេញចុះខ្សោយ រលាក និងសរសៃឈាមងាយហូរឈាម។
ជាពិសេស ប្រសិនបើស្ថិតក្នុងដំណាក់កាលធ្ងន់ធ្ងរនៃកង្វះវីតាមីន C អញ្ចាញធ្មេញអាចឡើងពណ៌ស្វាយ និងរលួយមាត់ ដែលជាការបាត់បង់ធ្មេញដ៏គ្រោះថ្នាក់បំផុត។
៥.មានស្បែកស្ងួត
ធាតុផ្សំនៃវីតាមីន C ដើរតួយ៉ាងសំខាន់ក្នុងការជួយដល់ការផលិតកូឡាជែន រក្សាស្បែកឱ្យស និងក្មេងជាងវ័យ។ ស្បែកដែលមានសុខភាពល្អមានផ្ទុកនូវវីតាមីន C ច្រើន ជាពិសេសនៅក្នុងស្រទាប់ស្បែក ឬស្រទាប់ខាងក្រៅនៃស្បែក។ ទាំងអស់នេះមានន័យថា ប្រសិនបើអ្នកមិនផ្តល់វីតាមីន C គ្រប់គ្រាន់ដល់រាងកាយទេ ស្បែករបស់អ្នកនឹងមើលទៅស្រអាប់ និងជ្រីវជ្រួញ ភាពចាស់ និងរិចរិល។
ប្រភព៖ បរទេស
ព័ត៌មានថ្មីៗ
