នៅតែផ្ទះ មើលតែកូនសោះ ត្អូញថាហត់ដែរ?
សម្រាប់មួយជីវិតមនុស្សស្រី ប្រហែលមិនអាចនិយាយពាក្យថា ហត់ ឬលំបាកបានទេមើលទៅ ព្រោះបើយើងថាហត់ណាស់ លំបាកណាស់ គេថាយើងនេះទន់ជ្រាយ គិតតែពីរអ៊ូ ការងារប៉ុណ្ណឹងក៏ទ្រាំមិនបាន ទៅធ្វើអីចេញ ... តែបើយើងមិនរអ៊ូ មិនត្អូញទេ គេថាយើងហ្នឹងនៅផ្ទះបែបស្រួលហើយ តែពេលនោះ ប្រហែលជាមនុស្សស្រីរឹងមាំពេក រហូតធ្វើខ្លួនឱ្យឯករាជ្យ អ្នកណាក៏លែងត្រូវការដែរ។
នៅផ្ទះត្រជាក់ តែវាមិនមែនស្រួលទេ ក៏ដឹងថា អ្នកដែលត្រូវចេញទៅធ្វើការខាងក្រៅក៏មិនស្រួលដែរ តែកុំនិយាយពាក្យថា " ប្រពន្ធខ្ញុំនៅផ្ទះស្រួលណាស់ មើលតែកូន អត់មានធ្វើអីទេ " ពាក្យមួយឃ្លានេះ វាចាក់ដោតក្នុងទ្រូងមនុស្សស្រី ស្មើនឹងប្ដីមិនឱ្យតម្លៃនៃការធ្វើកិច្ចការងាររបស់នាង អ្នកមិនគោរពក្នុងការលះបង់របស់នាងក្នុងការនៅផ្ទះមើលថែទាំកូនរបស់អ្នក ព្រោះប្រពន្ធ នាងមិនដែលនិយាយថា " ប្ដីខ្ញុំទៅក្រៅធ្វើការរកលុយស្រួលនោះឡើយ " នាងមានតែប្រាប់គេថា " រាល់ថ្ងៃអាណិតប្ដីណាស់ ចេញពីផ្ទះទៅក្រៅធ្វើការរកស៊ី ហត់នឿយ លំបាក គិតផង អីផង ជួនកាលត្រូវមេស្ដីបន្ទោស បញ្ហាស្មុគស្មាញ ..." ហើយទឹកចិត្តប្រពន្ធខំណាស់ ធ្វើការងារផ្ទះហត់នឿយយ៉ាងណា ក៏មិនដែលភ្លេចរៀបចំធ្វើម្ហូបអាហារឆ្ងាញ់ៗសម្រាប់ប្ដីមកពីធ្វើការវិញដែរ ... ពេលកូនយំមិនហ៊ានរំខានប្ដីទេ សុខចិត្តភ្នែកខ្មៅស មើលកូនកណ្ដាលយប់ ឱ្យប្ដីដេកឱ្យបានស្ងប់ ដេកបានឆ្អែត។
មិនថាប្ដី ឬប្រពន្ធទេ កុំទាមទារចង់បានភាពលំបាកតែឯង កុំគិតថាខ្លួនលះបង់គ្រប់យ៉ាងដើម្បីប្ដី ឬប្រពន្ធ កុំគិតថាអ្នកណាស្រួលជាងអ្នកណា មិនថាកិច្ចការងារផ្ទះមើលកូន ឬចេញក្រៅរកលុយទេ គឺម្នាក់ៗសុទ្ធតែមានផលលំបាក បន្ទុក និងសម្ពាធរៀងៗខ្លួន មិនមែនដេកស៊ីមិនធ្វើអីនោះឡើយ។ សូមឱ្យតម្លៃនៃកិច្ចការរបស់ប្ដី ឬប្រពន្ធ ព្រោះគ្រប់គ្នាសុទ្ធតែខំប្រឹង ដើម្បីកូនៗ និងគ្រួសារដូចគ្នា អ្នកទាំងពីរ គឺត្រូវតែមានការខំប្រឹង ជួយជ្រោមជ្រែង ចាប់ដៃគ្នា លះបង់ជាមួយគ្នា កុំមើលងាយ ឬស្ដីបន្ទោសគ្នាឱ្យសោះ៕
អត្ថបទ ៖ ភី អេក / ក្នុងស្រុករក្សាសិទ្ធិ
រូបភាព ៖ Theolodge Te
អំពីអ្នកសរសេររបស់យើង៖
ព័ត៌មានថ្មីៗ
