អ្នកកើតចំឆ្នាំទាំង ៤ ខាងក្រោម តាមអ្នកជំនាញផ្នែកហុងស៊ុយបានឲ្យដឹងថា ពួកគេរមែងនឹងជួបសំណាង សុភមង្គលក្នុងជីវិតច្រើនជាងម្ចាស់ឆ្នាំណាៗទាំងអស់។ តុះទៅផ្ទៀងផ្ទាត់ តើមានឆ្នាំរបស់អ្នកដែរទេ?
អ្នកកើតឆ្នាំខាល – ខ្លា
ជាមនុស្សដែលមានបុគ្គលិកលក្ខណៈរឹងមាំ ស្មោះត្រង់ និងសុទិដ្ឋិនិយម ហើយតែងតែរីករាយច្រើនក្នុងជីវិត ទោះគេមិននាំសប្បាយ ក៏ចេះបង្កើតភាពសប្បាយដល់ខ្លួនឯងផងដែរ។ មនុស្សនេះ ចូលចិត្តភ្លក់បទពិសោធន៍ថ្មីក្នុងជីវិត ដូច្នេះការប្រថុយប្រថានសម្រាប់ពួកគេ គឺរមែងកើតឡើងច្រើន។
សម្រាប់មនុស្សឆ្នាំខាល បើរាប់អានមិត្ត គឺមិនចេះសម្លឹងឃើញប្រយោជន៍របស់គេនោះទេ ហេតុនេះហើយរមែងទទួលបានការគោរពស្រលាញ់ និងឲ្យតម្លៃខ្ពស់ពីមនុស្សជុំវិញខ្លួន។ អនាគតនឹងកើតឆ្នាំខាល រមែងជួបរឿងសប្បាយច្រើនជាងទុក្ខ។
អ្នកកើតឆ្នាំរោង – នាគ
រមែងជាមនុស្សរហ័សរហួន ឈ្លាសវៃ និងមានសមត្ថភាពក្នុងការសង្កេតមើលយ៉ាងម៉ត់ចត់ ហើយប្រៀបដូចជាមានព្រះនាំសំណាង អមដំណើរពួកគេជាប់ជានិច្ច។
មនុស្សនេះរស់ដោយប្រើប្រាស់វិចារណញ្ញាណមិនចេះតែសម្រេចចិត្ត ធ្វើអ្វីឲ្យកើតជាកំហុសដោយងាយៗទេ។ ម្ចាស់ឆ្នាំរោង ត្រជាក់ខាងក្រៅ ក្តៅខាងក្នុង ពេលខ្លះទឹកមុខបង្ហាញមកញញឹម តែខាងក្នុងពួកគេពូកែបៀមទុក្ខខ្លាំងណាស់ ព្រោះពេលខ្លះគិតពីគេជាងគិតពីខ្លួនឯង។
យ៉ាងណាជោគវាសនាម្ចាស់ឆ្នាំរោង ដោយសារពួកគេមានការតាំងចិត្តខ្ពស់ ហេតុនេះជួយឲ្យអាចសម្រេចគោលដៅបានជារឿយៗ។ ជីវិតពួកគេកាន់តែជោគជ័យលឿន និងមានសុភមង្គលពេញបរិបូរណ៍ក្រោយឆ្លងចូលដល់ជីវិតអាពាហ៍ពិពាហ៍។
អ្នកកើតឆ្នាំម្សាញ់ - ពស់
ក្នុងចំណោមសត្វទាំង ១២ សម្រាប់អ្នកកើតឆ្នាំម្សាញ់ អាចរាប់បានជាមនុស្សឈ្លាសវៃដាច់គេហើយ មនុស្សនេះដឹងពេលណាចេះគោរពអ្នកដទៃ ពេលណាចេះដាក់ខ្លួន ពេលណាចេះដំឡើងខ្លួន ពោលគឺប្រតិកម្មលឿន និងចេះសម្របបានទៅតាមស្ថានភាព ពេលវេលា ជារួមគឺ ពូកែខាងបង្កើតទំនាក់ទំនងខ្លាំងណាស់។
ទៅដល់ណាក៏មិនខ្វះញាតិរាប់ដែរ ហើយរបៀបរកលុយរបស់ពួកគេ ជួនខ្លះប្រើតែមាត់ក៏បានលុយចូលហោប៉ៅដោយងាយ។ មនុស្សនេះតាំងពីក្មេងមកគឺខ្លាំង មានការងាររង់ចាំជុំទិស ហើយពួកគេកម្រធ្លាក់ក្នុងស្ថានភាពលំបាកក្នុងជីវិតខ្លាំងណាស់ ជារឿយៗម្ចាស់ឆ្នាំម្សាញ់ រមែងច្រើនជោគជ័យមុនអាយុ។
អ្នកកើតឆ្នាំកុរ – ជ្រូក
ជាមនុស្សដែលមានចរិតស្ងប់ស្ងាត់ ហើយរមែងផ្តោតតែលើការព្យាយាមរកលុយ ព្រោះចង់សម្រេចក្តីស្រមៃ ចង់មានអ្វីដែលជាខ្លួនឯង។ ពួកគេរមែងទទួលស្គាល់នូវគ្រប់លទ្ធផលដែលកើតឡើង មិនថាតែជោគជ័យ និងបរាជ័យ ពោលមិនងាយបាក់ទឹកចិត្តឡើយ។
អ្នកកើតឆ្នាំកុរ រកចំណូលបានច្រើនប៉ុណ្ណា ក៏មិនចេះទៅប្រាប់អ្នកដទៃដែរ ព្រោះពួកគេមានគម្រោងវែងឆ្ងាយទៅមុខ ស៊ូរង់ចាំដល់ជោគជ័យជាដុំកំភួននឹងធឹង ទើបបើកចំហតែម្តង៕
ប្រភព៖ បរទេស | ប្រែសម្រួល៖ ក្នុងស្រុក