ស្រលាញ់មនុស្សម្នាក់ត្រូវលះបង់អ្វីខ្លះ?
ស្នេហាគឺជាអ្វីដែលមនុស្សម្នាក់ៗតែងជួបប្រទះក្នុងជីវិត ទោះយូរឬឆាប់។ យ៉ាងណាមិញ ស្នេហាគឺជាទំនាក់ទំនងរវាងមនុស្សពីរនាក់ បានន័យថាដៃគូទាំងសងខាងត្រូវរៀនសម្របខ្លួនទៅតាមកាលៈទេសៈផ្សេងៗដើម្បីអាចរស់នៅជាដៃគូបានយូរអង្វែង។ សេចក្តីលះបង់គឺជាផ្នែកមួយសំខាន់នៅក្នុងទំនាក់ទំនងស្នេហាដែលដៃគូនីមួយៗគួរយល់ដឹងនិងហ៊ានទទួលយក។
១. ពេលវេលា
ការលះបង់ពេលវេលាដើម្បីដៃគូគឺមិនចាត់ទុកថាខាតពេលនោះទេ ប៉ុន្តែពិតជាសំខាន់ខ្លាំងណាស់។ ការផ្តល់ពេលវេលាសម្រាប់ដៃគូបានផ្តល់ឱកាសឱ្យអ្នកទាំងពីរស្វែងយល់ពីគ្នា ដឹងសុខទុក្ខគ្នា និងជាខ្នងបង្អែកសម្រាប់គ្នាទៅវិញទៅមកនៅពេលមានទុក្ខ។ ប្រសិនបើអ្នកនិងដៃគូមិនសូវផ្តល់ពេលវេលាឱ្យគ្នាទៅវិញទៅមកនោះទេ ភាគរយខ្ពស់ទំនាក់ទំនងរបស់អ្នកទាំងពីរនឹងអាចមានថ្ងៃចែកផ្លូវគ្នា។
២. ភាពមិនទៀងត្រង់
ស្នេហាដែលរឹងមាំគឺជាស្នេហាដែលដៃគូមានទំនុកចិត្តលើគ្នាទៅវិញទៅមក។ ការទុកចិត្តបានន័យថាដៃគូអ្នកមានអារម្មណ៍កក់ក្តៅពេលដែលបាននៅជាមួយអ្នកនិងហ៊ានចែករំលែករាល់រឿងរ៉ាវរបស់គាត់ជាមួយអ្នក។ មួយវិញទៀត ទំនុកចិត្តគឺមិនមែនជាអ្វីដែលអាចប្រើអំណាចទឹកលុយទិញបាននោះទេ នៅពេលដែលដៃគូអ្នកបាត់បង់ទំនុកចិត្តលើអ្នកហើយ អ្នកអាចនឹងគ្មានថ្ងៃធ្វើឱ្យអ្វីៗប្រសើរដូចដើមនោះឡើយ។
៣. ភាពអត្តនោម័ត
ដូចដែលបានដឹងស្រាប់ហើយ ស្នេហាគឺមានលក្ខណៈជាដៃគូ ដូចនេះអ្នកមិនអាចនាំយកភាពអត្តនោម័តរបស់ខ្លួនចូលមកក្នុងវិថីស្នេហាអ្នកនោះទេ។ អ្នកត្រូវរៀនទទួលយកមតិឬការយល់ឃើញរបស់ដៃគូ និងព្យាយាមយល់ពីអារម្មណ៍ដៃគូអ្នកឱ្យបានច្រើន។ ការធ្វើបែបនេះ ជម្លោះនឹងមិនងាយកើតមានឡើងឡើយដោយសារគូភាគីទាំងសងខាងយល់ពីគ្នាទៅវិញទៅមកនិងចេះសម្របតាម៕
អត្ថបទដោយ៖ Nuth
រូបភាព៖ Pinterest
អំពីអ្នកសរសេររបស់យើង៖ PECH PHEARUN
ព័ត៌មានថ្មីៗ
