មនុស្សដែលអាចបំពេញ ៣ ចំណុចនេះបាន ជីវិតរឹតតែមានលាភសំណាង សម្បូរទ្រព្យ សុខសប្បាយ
ជីវិតកាន់តែទាមទារ រឹតតែស្មុគស្មាញ បញ្ហាកើនឡើងក៏កាន់តែច្រើន។ របស់ដែលមិនចាំបាច់មួយចំនួន យើងមិនគួរយកខ្លួនទៅពាំង ហើយរឹតតែមិនសមនឹងយកខ្លួនឯងទៅរ៉ាប់រងនោះឡើយ។ ដូច្នេះហើយ ប្រសិនបើយើងអាចបំពេញនូវចំណុចទាំង ៣ នេះបាន ជីវិតនឹងសុខសាន្ត សំណាងល្អ រស់នៅពោរពេញដោយក្ដីសុខ និងសម្បូរទ្រព្យ។
១. ប្រៀបធៀបកាន់តែតិច ក្ដីសុខកាន់តែច្រើន
នៅលើលោកនេះ មនុស្សជាច្រើនងាយនឹងបណ្តោយឱ្យសេចក្តីប្រាថ្នា ដែលមិនចេះឆ្អែតឆ្អន់មកគ្រប់គ្រងលើចិត្តរបស់ពួកគេ ប៉ុន្តែក៏មានមនុស្សដែលមិនចង់បានអ្វីឡើយ ព្រោះពួកគេចេះគ្រប់គ្រាន់ ហើយក៏ចេះពេញចិត្តនូវអ្វីដែលពួកគេមាន។ នោះគឺជាអាកប្បកិរិយារបស់មនុស្សចេះដឹង និងចេះគោរពឱ្យតម្លៃចំពោះជីវិត។ នៅពេលអ្នកដឹងពីការពេញចិត្ត ជីវិតនឹងតែងតែមានផាសុកភាព។
ក្នុងជីវិត អ្វីៗដែលយើងភ្ជាប់សារៈសំខាន់ខ្លាំងពេក នឹងត្រូវលង់ក្នុងអន្ទាក់នៃការគិតខ្វល់ ធ្វើឱ្យខ្លួនយើងឃើញតែគិតអំពីផលប្រយោជន៍។ កាលណាអ្នកគិត និងប្រៀបធៀបក្នុងចិត្តកាន់តែច្រើន នោះជីវិតរីករាយ និងសុភមង្គលនឹងបាត់បង់កាន់តែច្រើន។ មនុស្សដែលរក្សាការព្រួយបារម្ភរបស់ខ្លួនជារៀងរហូត នឹងមិនបានរស់នៅដោយរីករាយ និងសន្តិភាព។
២. មិនឈ្លោះប្រកែក
ក្នុងមួយជីវិតនេះ មានបញ្ហាជាច្រើនកើតឡើងព្រោះតែមាត់។ មានពាក្យចាស់ពោលថា «សម្ដីជាអាវុធដែលបង្កឱ្យមានការខូចខាតខ្លាំងជាងគ្រាប់បែកទៅទៀត» ។ ដូច្នេះកុំនិយាយពាក្យញុះញង់បង្ខូចកេរ្តិ៍ឈ្មោះអ្នកដទៃតាមអំពើចិត្ត។ ដូច្នេះបើអ្នកស្តាប់ច្រើន អ្នកសង្កេតកាន់តែច្រើន ហើយពាក្យមិនចាំបាច់ដែលអ្នកនិយាយកាន់តែតិច នោះអ្នកនឹងចៀសវាងជម្លោះកាន់តែខ្លាំង។
ការនិយាយ គឺជាសិល្បៈដែលមិនមែនគ្រប់គ្នាអាចធ្វើបាននោះទេ។ សតិសម្បជញ្ញៈ ក្នុងកម្រិតមធ្យម ចូរពិចារណានូវអ្វីគួរ ឬមិនគួរនិយាយដោយប្រុងប្រយ័ត្ន។ កុំនិយាយអាក្រក់ពីអ្នកដទៃពីក្រោយខ្នង ព្រោះនោះជាប្រភពនៃជម្លោះ និងបញ្ហា។
៣. ឈប់ដឹកនាំអ្នកដទៃ
គ្រប់គ្នាគួរគ្រប់គ្រងការងាររបស់ខ្លួន បំពេញតួនាទីខ្លួនឯងឱ្យបានល្អ កុំប្រកាន់រឿងច្រើនពេក។ ទុក្ខទាំងអស់មិនកើតមកពីការរំពឹងទុកច្រើនពេកទេឬ? អ្នករំពឹងថា អ្នកដទៃធ្វើអ្វីដែលអ្នកចង់បាន នៅពេលដែលពួកគេធ្វើខុសពីអ្នក អ្នកនឹងមានការរំខាន។ ការដាក់ខ្លួនឯងទៅលើអ្នកផ្សេង នឹងធ្វើឱ្យអ្នកទាំងពីរកាន់តែមិនស្រួល។
ទោះបីជាអ្នកជាសាច់ញាតិ ប្តីប្រពន្ធ ឬកូនក៏ដោយ អ្នកមិនអាចផ្លាស់ប្តូរការសម្រេចចិត្តរបស់អ្នកដទៃអំពីជីវិតរបស់ពួកគេបានទេ។ ក្នុងគ្រួសារ កុំជ្រៀតជ្រែកជ្រៅពេកក្នុងជីវិតផ្ទាល់ខ្លួនរបស់អ្នកដទៃ។ សូមឱ្យម្នាក់ៗមានទីធ្លារៀងខ្លួនដោយសេរីក្នុងជីវិតរៀងៗខ្លួន ដើម្បីឱ្យគ្រួសារមានភាពសុខដុម និងសុខសាន្ត៕
ប្រភព ៖ បរទេស / Knongsrok
ព័ត៌មានថ្មីៗ
