ចុម ប្លែកម៉េះ គ-ជូរហិរ ទាល់តែក្មេងៗស្រុកស្រែចំការបានស្គាល់
បើនិយាយពីចំណីញ៉ាំលេងរបស់ក្មេងៗស្រុកស្រែចំកាជំនាន់មុនវិញ មិនមានច្រើនសប្បូរបែបដូចបច្ចប្បន្ននោះទេ ដោយភាគច្រើនចំណីអាហារគឺជារបស់បែបធម្មជាតិដើរបេះបោចតាមផ្លូវ តាមចំការដំណាំ ហើយយកមកច្នៃដោយខ្លួនឯង។ តែទោះមិនទាន់សម័យ តែចំណីខ្លះបែរជាដក់ជាប់ក្នុងអារម្មណ៍អ្នកដែលកើតទាន់ជំនាន់មុនរហូតដកចិត្តមិនរួច ដោយក្នុងនោះ គជូរហិរ គឺជាចំណីដ៏ពេញនិយមមួយផងដែរ។
គជូរហិរ (ហៅតាមរបៀបធ្វេី)គឺជាចំណីញ៉ាំលេង របស់ក្មេងៗស្រុកស្រែ ទំនេរៗចូលចិត្តធ្វេីញ៉ាំណាស់ ណាមួយមកពីមិនសូវជាមានចំណីហូរហែដូចក្មេងទីក្រុងផង គឺមានតែចំណីសម្រន់ប្រចាំភូមិស្រុកស្រែចម្ការ ឬភូមិចុងកាត់មាត់ញកបែបនេះ។
តោះមករៀនពីវិធិធ្វើ គ-ជូរហិរ នេះទាំងអស់គ្នា ៖
(១) ជាចំនុចផ្តេីមយេីងបេះប្រឡេះយក"ផ្លែគ"ណាដែលនៅខ្ចីល្មម ឬក្តិប (មិនមែនចាស់) មកចិតសម្បកខៀវចេញ ទុកតែសាច់ក្នុងដែលនៅទន់ៗ។
(២) រួចសាប់ចិញ្រ្ចាំអោយសុសសាច់ បណ្តោយផ្លែ
(៣) បន្ទាប់មកយកអំបិលម្ទេសដែលបុកស្រាប់ (រស់ជាតិតម្រូវចំណង់ចំណូលចិត្តរបស់អ្នកបរិភោគ) មកលាបប្រឡាក់ និងទះបង្ហាប់អោយរសជាតិចាប់ចូលសាច់ផ្លែគ។ រួចផ្អាប់ទុកអោយចូលជាតិសព្វសាច់មួយតួផ្លែជាមួយអំបិលនោះ (ជាធម្មតាគេដាក់រស់ផ្អែមបន្តិច ហិរបន្តិច)
(៤) ជាចុងក្រោយ គេយកផ្លែគដែលចិញ្ច្រាំ និងប្រឡាក់អំបិលរួចនោះ ទៅញាត់ចូលសំបុកអង្ក្រង ឬយកទៅដាក់ទីណាដែលមានសត្វអង្ក្រងច្រេីនតោង (ក្នុងគោលបំណងឱ្យសត្វអង្ក្រងមកតោង នោមដាក់ ដេីម្បីបានរសជាតិជូរៗ)។ គេដាក់មួយសន្ទុះ ឱ្យល្មមនឹងបានរសជូរសព្វសាច់តាមដែលចង់បានហេីយ សឹមដកចេញ
*ចំពោះការបរិភោគ គេត្រូវបេះសត្វអង្ក្រងចេញជាមុនសិន ជៀសវាងបរិភោគទាំងមេអង្ក្រង នាំឱ្យខាំហេីមប៉ោងមាត់ 😂😂😂 (ខ្លះគឺបរិភោគទាំងមេ អង្ក្រងក៏សឹងមាន)។
រូបភាព៖ ប្រភពហ្វេសប៊ុក & Google Image
អត្ថបទ៖ ទេវធីតាសង្ក្រាន្ត
ព័ត៌មានថ្មីៗ
