មិនមែន Varane ឬ Van Dijk តែ Ferdinand បែរចុចឈ្មោះម្នាក់នេះ ជាខ្សែការពារលេខ ១ នៅ PL
តើអ្នកគិតថា ខ្សែការពាររូបណាកំពុងបង្ហាញទម្រង់លេងល្អបំផុតនៅក្របខ័ណ្ឌ Premier League នាពេលបច្ចុប្បន្ននេះ? ជឿថាការយល់ឃើញរបស់មនុស្សម្នាក់ៗគឺខុសគ្នា ខ្លះទៅថាកីឡាកររបស់ Man Utd, Liverpool, Chelsea ឬ Man City ជាដើម។
យ៉ាងណាក្រឡេកមក Rio Ferdinand អតីតកីឡាករនៅបិសាចក្រហម និងបច្ចុប្បន្នជាអ្នកវិភាគលើប៉ុស្តិ៍ទូរទស្សន៍មួយ បានរំលងឈ្មោះ Virgil van Dijk, Raphael Varane និង Ruben Dias ជាដើម ផ្ទុយទៅវិញ លោកបានចុចឈ្មោះ Antonio Rudiger ជាខ្សែការពារជាប់រហស្សនាមក្របីព្រៃនៅក្លឹប Chelsea។
សម្រង់សម្តីពី Metro កន្លងទៅ Ferdinand ថា៖ "តាំងពី Tuchel មកដឹកនាំ គឺខ្ញុំគិតថាគេ [Rudiger] ជាខ្សែការពារកណ្តាលល្អបំផុតហើយ ដោយខ្ញុំគិតថា កម្រិតគេនិង [Ruben] Dias គឺអាចប្រហែលគ្នា តែឥទ្ធិពលដែលគេមានទៅលើក្រុមគឺខ្លាំងជាង"។
លោកបន្ថែម៖ "ក្រោមការដឹកនាំរបស់ Lampard មានពាក្យថាលោកចង់ព្យាយាមដាក់ Rudiger ទៅក្នុងបញ្ជីលក់ចេញទៀតផង ដូច្នេះហើយនៅពេលនោះ គេពិតជាមានអារម្មណ៍ពិបាក ពេលអ្នកចាត់ការមិនមានជំនឿជាក់មកលើខ្លួន តែការដែលឈានមកដល់កម្រិតដូចជាគេពេលនេះ គឺរាប់ថាពិបាកខ្លាំង"។
បញ្ជាក់ថា Rudiger សេសសល់សុពលភាពកុងត្រាត្រឹមចុងខែមិថុនា ឆ្នាំ ២០២២ ខាងមុខ តែតាមតម្រុយភាគច្រើន គេប្រហែលជាបន្តកុងត្រាថ្មី ច្រើនជាងចាកចេញ។ មានក្លឹបធំៗមួយចំនួន ដែលតាមចង់បានកីឡាករអាល្លឺម៉ង់ ជាក់ស្តែងគឺ Real Madrid, Barcelona និង PSG ជាដើម៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
