កំណត់ត្រាប្រវត្តិសាស្ត្រមួយ របស់លោកព្រះ Zlatan ទីបំផុតត្រូវបាន Ronaldo នាំមុខហើយ
តារាឆ្នើម Cristiano Ronaldo បានបន្តបង្ហាញទម្រង់លេងដ៏ល្អ នៅការត្រលប់មកក្លឹប Man Utd ជាលើកទី ២ ហើយត្រឹមការបង្ហាញខ្លួន ២ ប្រកួតនៅក្របខ័ណ្ឌ Premier League លោកអាចរកបាន ៣ គ្រាប់ និងបើរាប់ជារួមនៅក្របខ័ណ្ឌដទៃទៀតគឺមាន ៤ គ្រាប់។
យ៉ាងណាជាមួយការបញ្ចប់ទីទល់ក្លឹបម្ចាស់ដី West Ham United កាលពីចុងសប្តាហ៍កន្លងទៅនេះ ក៏បានរុញឲ្យឈ្មោះ CR7 បានក្លាយជាកីឡាករបង្កើតកំណត់ត្រាថ្មី នោះគឺជាកីឡាករទីមួយក្នុងលោក ដែលអាចស៊ុតបញ្ចូលទីនៅក្នុងកីឡដ្ឋានទាំង ៦៦ ផ្សេងពីគ្នា រាប់ចាប់ពីរដូវកាល ២០០៣/០៤ រៀងមក។ នេះបើតាមសារព័ត៌មាន TheSun បានចុះផ្សាយ។
កន្លងទៅកំណត់ត្រានេះ គ្រងដោយឈ្មោះកីឡាករស៊ុយអែត Zlatan Ibrahimovich ដែលស៊ុតបញ្ចូលទីនៅកីឡដ្ឋានទាំង ៦៥ ហើយឈ្មោះ CR7 គឺបានតាមស្មើ កាលស៊ុតចូលទីក្រុមម្ចាស់ដី Young Boys នៅជំនួបក្របខ័ណ្ឌ UCL ជើងទី ១ កន្លងទៅ ហើយបន្ថែមនៅទឹកដី West Ham មួយគ្រាប់ថ្មីនេះទៀត គឺអាចឲ្យលោកនាំមុខបានសម្រេចហើយ។
បញ្ជាក់ថា ប្រកួតបន្ទាប់គឺ Man Utd ត្រូវជួប West Ham ជាថ្មីនៅជុំទី ៣ EFL Cup តែប្រកួតពានតូចបែបនេះ ទំនងលោក Ole Gunnar Solskjaer មិនប្រើប្រាស់ Ronaldo ទេ ពោលរង់ចាំដល់ប្រកួតចុងសប្តាហ៍ទល់ Aston Villa ច្រើនជាង៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
