Pinto ថាកីឡាករអាស៊ីម្នាក់នេះ មានរបៀបគិតដូចជា Ronaldo
Cristiano Ronaldo ត្រូវបានគេទទួលស្គាល់ថា ជាកីឡាករដែលពោរពេញដោយទេពកោសល្យទាំងលើទីលាន និងរបៀបនៃការគិត ការបំផុសទឹកចិត្តទាំងសម្រាប់ខ្លួនឯង ក៏ដូចជាមនុស្សជុំវិញខ្លួន។ យ៉ាងណាថ្មីៗនេះ លោក Andre Pinto ក៏បានចុចឈ្មោះកីឡាករជប៉ុនមួយរូប ថាមានរបៀបគិតដូចជា CR7។
Pinto ជានាយកផ្នែកកីឡានៅក្លឹប Sint-Truiden នៃលីគកំពូលបែលហ្សិក ជាក្លឹបរបស់ខ្សែការពារស្លាប Takehiro Tomiyasu ដែលកីឡាកររូបនេះទើបផ្ទេរមកចូលរួមនៅក្លឹបកាំភ្លើងធំ Arsenal កាលពីរដូវក្តៅ។
Pinto និយាយប្រាប់សារព័ត៌មាន Goal បែបនេះថា៖ "អ្វីដែលអស្ចារ្យអំពី Tomi គឺគេនឹងមិនអាចទទួលយកនូវអ្វីដែលមិនជោគជ័យនោះទេ គេមិនរំពឹងលើសំណាងទេ តែគ្រប់យ៉ាងកើតមក ដោយសារការខិតខំប្រឹងប្រែង"។
លោកបន្តថា៖ "Tomi របៀបគិតរបស់គេដូចជា Cristiano [Ronaldo] ដែលគេខិតខំខ្លាំង គេទទួលទានអាហារសុខភាព និងជាប្រភេទកីឡាករដែលតែងតែចង់ទទួលបានការអភិវឌ្ឍខ្លួនឯងជានិច្ច"។
គួរបញ្ជាក់ថា កីឡាករជប៉ុន Tomiyasu ជាប់កុងត្រារយៈពេល ៤ ឆ្នាំជាមួយក្រុមលោក Mikel Arteta។ ជាមួយក្លឹបថ្មី គេបង្ហាញខ្លួន ៤ ប្រកួត ឈរជើង ២៥១ នាទីលើទីលាន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
