ផ្ញើជូនអ្នកខ្ជិល អ្នកសន្សំសំចៃជ្រុល! អាហារពេលព្រឹក ៤ ដូចកំពុងសន្សំរោគក្នុងរាងកាយ
អាហារពេលព្រឹកគឺជារបបអាហារដ៏សំខាន់ វាដើរតួកំណត់ថាមពលរាងកាយយើងពេញមួយថ្ងៃ។ ទោះជារវល់មមាញឹកយ៉ាងណា ក៏អ្នកគួរតែជៀសឲ្យបាននូវប្រភេទអាហារទាំង ៤ ខាងក្រោម៖
៤) អាហារពេលព្រឹកនៅតាមផ្លូវ
បើសម្រាប់មនុស្សធំមិនសូវជាប៉ះពាល់ខ្លាំងទេ ព្រោះរាងកាយមានភាពសុាំខ្លះ តែសម្រាប់កុមាររដែលស្ថិតនៅដំណាក់កាលអភិវឌ្ឍ គឺងាយនឹងរងការបង្កគ្រោះថ្នាក់ខ្លាំងណាស់ សម្រាប់ការទទួលទានអាហារតាមដងផ្លូវជាប្រចាំ។
ភាគច្រើននៃអាហារតាមដងផ្លូវ គឺគេតម្រូវសម្រាប់អ្នកចង់បានរបស់ទទួលទានងាយៗ រហ័ស តែបើនិយាយពីគុណភាពអនាម័យគឺមិនអាចធានាបានឡើយ។ ឧទាហរណ៍ដូចប្រភេទនំដូណាត់ អាហារចៀន ទឹកសណ្តែកមួយចំនួន គឺអ្នកមិនគួរទទួលទានឡើយនៅពេលព្រឹក។ ប្រសិនទទួលទានក៏គួរជ្រើសរើសទីតាំងមួយ ដែលច្បាស់លាស់ថាមានអនាម័យ។
៣) អាហារដែលសល់ពីថ្ងៃម្សិលមិញ
អ្នកខ្លះនៅព្រឹកថ្ងៃថ្មី ខ្ជិលងើបចម្អិនអាហារ ក៏ពួកគេទៅយកអាហារដែលសល់ពីយប់មកចម្អិន ហើយទទួលទានម្តងទៀតនៅពេលព្រឹក។
យ៉ាងណារបស់ដែលទុកក្នុងទូទឹកកក ឬរបស់ដែលកម្តៅច្រើនលើកច្រើនពេក វាងាយនឹងបង្កជាតិពុលច្រើនក្នុងរាងកាយ ហើយអាហារូបត្ថម្ភសំខាន់ៗដែលរាងកាយត្រូវការ ក៏ត្រូវបាត់បង់ទៅតាមនោះផងដែរ។ សម្រាប់មនុស្សមួយចំនួន ដែលក្រពះ ពោះវៀនខ្សោយគឺងាយនឹងទទួលរងផលអាក្រក់ពីវាខ្លាំងណាស់។
២) សាច់ក្រក សាច់កែច្នៃ អាហារកំប៉ុង
ប្រភេទសាច់ដែលគេវេចខ្ចប់ ឬឆ្លងកាត់ការកែច្នៃ ដូចជាសាច់ក្រកជាដើមនេះ គឺងាយនឹងបង្កហានិភ័យនៃការកើតជំងឺមហារីកខ្ពស់ ប្រសិនអ្នកបន្តទទួលទានរយៈពេលយូរ។ ជាងនេះវាក៏មិនបានផ្តល់ប្រូតេអ៊ីនគ្រប់គ្រាន់សម្រាប់រាងកាយ ដូចជាអាហារសុខភាពដទៃទៀតមានទឹកដោះគោ ស៊ុត និងឈីសជាដើមនោះដែរ។
១) មីកញ្ចប់
អ្នកខ្លះមិនចង់ចំណាយច្រើន ហើយគិតថាទទួលទានឲ្យតែបាន តែនេះជាការយល់ឃើញខុស ព្រោះអាហារពេលព្រឹកសំខាន់ខ្លាំងណាស់ នៅរបបអាហារប្រចាំថ្ងៃរបស់មនុស្សយើងម្នាក់ៗ។ ប្រភេទមីកញ្ចប់ក្តី មីកំប៉ុងក្តី គឺរមែងមានជាតិក្តៅ និងជាតិខ្លាញ់ខ្ពស់ ហើយមួយថ្ងៃជះឥទ្ធិពលអាក្រក់បន្តិច យូរទៅដូចសន្សំរោគក្នុងរាងកាយ។
និយាយឲ្យងាយស្តាប់ វាពុំបានផ្តល់វីតាមីន ឬជាតិសរសៃ ដែលជារបស់ចាំបាច់សម្រាប់ក្រពះនោះទេ។ កុំឲ្យវាហួសពេលទាន់ អ្នកគួរតែផ្លាស់ប្តូររបបអាហារពេលព្រឹកទាំងនោះចេញ ហើយជ្រើសរើសយកការទទួលទានស៊ុត គ្រាប់ធញ្ញជាតិឬបន្លែ ដែលអាចផ្តល់នូវសារធាតុចិញ្ចឹមគ្រប់គ្រាន់ជំនួសមកវិញ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
