ឆ្នាំ ៣ កើតមកខ្សត់ទ្រព្យ តែមានទឹកចិត្តគាប់ប្រសើរ គង់ដើរជួបមនុស្សល្អ ជ្រោមជ្រែងឆ្វេងស្តាំ
មិនបានកើតមកក្នុងទ្រនំគ្រួសារអ្នកមានបាន ឬមានទ្រព្យហូរហៀរអ្វីនោះទេ ផ្ទុយទៅវិញ ម្ចាស់ឆ្នាំទាំង ៣ ដូចបង្ហាញក្នុងអត្ថបទនេះ រមែងចាប់កំណើតនៅក្នុងគ្រួសារដែលមានការខ្វះខាត តែពោរពេញដោយទឹកចិត្តល្អធំធេង គ្មានអ្វីកាត់ថ្លៃ។
ផលនៃអំពើល្អ ទង្វើដែលបានសាងជួយអ្នកខ្សត់ ជួយអ្នកលំបាក ក៏នាំឲ្យជីវិតម្ចាស់ឆ្នាំទាំង ៣ គង់ដើរប្រទះប៉ះមនុស្សល្អ ជួយជ្រោមជ្រែងឆ្វេងស្តាំទៅថ្ងៃមុខ៖
អ្នកកើតឆ្នាំឆ្លូវ – គោ
បើទោះបីកើតមកខ្សត់ អត់ទ្រព្យជាដុំកំភួនដូចកូនដទៃ តែមិនថាជាប្រុស ឬស្រីកើតឆ្នាំឆ្លូវ រមែងតាមមានក្តីសុបិន ហ៊ានក្រោកឈរ ជាមួយមហិច្ឆតាធំជាច្រើនក្នុងជីវិត។ ពួកគេមិនខ្លាចការលំបាក មិនខ្លាចឧបសគ្គនៅចំពោះមុខឡើយ។
ទៅមើលទឹកចិត្ត ក៏ពោរពេញដោយភាពស្មោះត្រង់ តែងឧស្សាហ៍ព្យាយាម មានទំនួលខុសត្រូវ តែត្រង់គុណវិបត្តិម្យ៉ាងរបស់ម្ចាស់ឆ្នាំឆ្លូវ គឺឆាប់ក្តៅ ឆាប់ខឹង។ មនុស្សនេះរស់មិនពឹងផ្អែកអ្នកដទៃ តែចូលចិត្តជួយអ្នកដទៃទៅវិញ ត្រង់អំពើទាំងអស់នោះ ប្រៀបដូចជា "ដើមទុននៃបុណ្យ" គុណផលសំណាងត្រលប់មកជីវិតពួកគេវិញនៅពេលបន្ទាប់។
អ្នកកើតឆ្នាំមមី - សេះ
ម្ចាស់ឆ្នាំសេះ តែងទទួលបានពរជ័យជារឿយៗក្នុងជីវិត ហើយដូចមានអំណាចពីស្ថានសួគ៌ ខុសពីមនុស្សធម្មតា។ ពួកគេតែងប្រកាន់ខ្ជាប់ការគិតសុទិដ្ឋិនិយម ទោះក្នុងខ្លួនមានការខ្វះខាត តែទឹកចិត្តមិនខ្វះនឹងការចែករំលែកឡើយ។
ចូលចិត្តបោះជំហានឆ្ពោះទៅមុខជានិច្ច មិនចេះនៅស្ងៀមនឹងមួយកន្លែង ហើយតែងត្រៀមខ្លួន ត្រៀមលក្ខណៈ ឲ្យតែមានឱកាស ពួកគេនឹងប្រលូកដោយមិនស្ទាក់ស្ទើរ។ លាយឡំចំណេះដឹង បទពិសោធន៍ ក៏អាចបង្កើតទ្រព្យដល់ពួកគេយ៉ាងងាយ នៅល្បាក់អាយុ ២០ ឬ ៣០ ឡើង តែក៏បូកផ្សំនឹងសំណាង កើតចេញពីអំពើល្អ ដែលម្ចាស់ឆ្នាំមមីចូលចិត្តសាងផងដែរ។
អ្នកកើតឆ្នាំរោង – នាគ
មនុស្សនេះ គោរពនិងឲ្យតម្លៃលើភាពស្មោះត្រង់ខ្ពស់ណាស់ ហើយរាល់កិច្ចការងារទាំងឡាយ គឺប្រកបដោយទំនួលខុសត្រូវ ចំពោះអ្វីដែលខ្លួនកំពុងធ្វើ។ អ្វីដែលសំខាន់ ម្ចាស់ឆ្នាំរោង សម្បូរទៅដោយមេត្តា សប្បុរស និងតែងតែត្រៀមខ្លួនចាំជួយអ្នកដទៃ ពោលចង់ឃើញមនុស្សជុំវិញខ្លួនរីកចម្រើន មិនចូលចិត្តបង្អាប់គេឡើយ។
អំពើទាំងអស់នេះ ក៏នាំឲ្យទេវតាមិនរង់ចាំយូរ ហើយកំណត់ពេលវេលាសមរម្យមួយប្រទានពរជ័យដល់ម្ចាស់ឆ្នាំរោង ឲ្យកើតជោគកើតជ័យ មានកេរឈ្មោះល្បី ទទួលបានការកោតសរសើរជុំវិញទិសទី៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
