«កូនខ្ញុំឈឺធម្មតាសោះ តែគ្រូពេទ្យថាមានជំងឺគ្រុនឈាម ទម្រាំដឹងខ្លួនអស់លុយមិនស្ទើរ» អត្ថបទគួរពិចារណា! ផ្ទុះជំងឺគ្រុនឈាម អាចនឹងមានការភាន់ច្រលំនៅក្នុងវិនិច្ឆយជំងឺ ឬជាការកេងចំណេញទៅលើជំងឺដើម្បីព្យាបាលក្នុងតម្លៃថ្លៃ?
ជាការពិតណាស់ នៅក្នុងពេលបច្ចុប្បន្ននេះ ជាពិសេសនៅក្នុងរដូវធ្លាក់ភ្លៀងតែម្តងជំងឺគ្រុនឈាម ដែលបណ្តាលមកពី សត្វមូលខ្លាខាំដែលជាសត្វភ្នាក់ងារចម្លងមេរោគគ្រុនឈាមយ៉ាងសាហាវ បាននឹងកំពុងតែផ្ទុះរាល់ដាលស្ទើរពាសពេញប្រទេសកម្ពុជាយើងគ្រប់ខេត្តក្រុង ហើយអាចកើតឡើងទាំងចំពោះក្មេងៗតូច រួមទាំងមនុស្សពេញវ័យផងដែរ ប្រសិនជាមិនការងារខ្លួនពីសត្វមូសខ្លាខាំនោះទេ។
# រោគសញ្ញាមេរោគគ្រុនឈាម
រោគសញ្ញានៃជំងឺគ្រុនឈាម ធ្វើឱ្យអ្នកជំងឺមានអាការដូចកើតជំងឺផ្តាសាយធំដែរ ដែលមានរោគសញ្ញានៅក្នុងដំណាក់កាលដំបូងដូចជា៖ ក្តៅខ្លួនខ្លាំង តែមិនហៀរសម្បោរ (ដាក់ថ្នាំត្រជាក់មានប្រសិទ្ធភាពរយៈពេលខ្លីប៉ុណ្ណោះ) ឈឺសាច់ដុំ ក្អួតចង្អោរ ឈឺក្បាល ល្ហិតល្ហៃ អស់កម្លាំង ចេះតែងងុយគេង រួមនឹងសញ្ញាមួយចំនួនទៀតដូចជាការឡើងកន្ទួលក្រហមលើស្បែក និងការហូរឈាមតិច ឬច្រើនផងដែរក្នុងអញ្ចាញធ្មេញ ដែលករណីនេះអាចជាករណីដំណាក់កាលធ្ងន់ធ្ងរ។
តែទោះជាយ៉ាងនេះក្តី សម្រាប់គ្រូពេទ្យមួយចំនួនដែលមិនមានជំនាញច្បាស់លាស់នៅក្នុងការព្យាបាល ឬមិនបានពិនិត្យឈាមរបស់អ្នកជំងឺនៅក្នុងមន្ទីរពិសោធន៍ឱ្យបានត្រឹមត្រូវ ដោយគ្រាន់តែយោងតាមការពិនិត្យជាក់ស្តែងនូវស្ថានភាពរបស់អ្នកជំងឺនៅខាងក្រៅរាងកាយ អាចនឹងវិនិច្ឆយរោគខុសក៏ថាបាន ដោយជំងឺគ្រុនឈាមក៏ត្រូវបានគេដឹងថាមានរោគសញ្ញា ស្រដៀងនឹងជំងឺមួយចំនួនដូចជា៖ ការឡើងឈាមសដែលបណ្តាលមកពីការរលាកផ្នែកមួយចំនួននៃរាងកាយ ជំងឺគ្រុនពោះវៀន ជំងឺគ្រុនចាញ់ ជំងឺផ្តាសាយ រួមទាំងជំងឺដទៃទៀត ។
ជាក់ស្តែងក្នុងពេលបច្ចុប្បន្នមានគ្រូពេទ្យមួយចំនួនតូច ត្រូវបានគេរកឃើញថាព្យាបាលអ្នកជំងឺខុសពីជំងឺដែលខ្លួនកើតមាន ដោយការវិនិច្ឆ័យអ្នកជំងឺដែលគ្មានជំងឺគ្រុនឈាមសោះ ថាកើតជំងឺគ្រុនឈាមទៅវិញ ដោយមានមូលហេតុ២យ៉ាង៖
ទី១៖ មិនបានពិនិត្យឈាមរកមេរោគឱ្យបានត្រឹមត្រូវ ឬខ្វះជំនាញច្បាស់លាស់
ទី២៖ កេងប្រវ័ញ្ជលើជំងឺ ដោយកុហកថាអ្នកជំងឺមានជំងឺគ្រុនឈាម ដើម្បីទទួលបានការព្យាបាលដែលមានតម្លៃថ្លៃ។
ដូចដែលលោកអ្នកបានដឹងហើយថា អ្នកដែលកើតជំងឺគ្រុនឈាម ត្រូវតែសម្រាកព្យាបាលនៅក្នុងមន្ទីរពេទ្យ ឬកន្លែងថែទាំងសុខភាពជំនាញពី ៥ថ្ងៃ ទៅ៧ថ្ងៃដើម្បីឱ្យជាសះស្បើយ ដោយការបញ្ចូលថ្នាំ និងជាតិទឹកតាមរយៈសឺរ៉ូមទៅក្នុងរាងកាយដើម្បីព្យាបាល រួមទាំងការព្យាបាលតាមរយៈក្បួនវេជ្ជសាស្រ្តដទៃទៀត។ ដូច្នេះហើយដោយសារតែការវិនិច្ឆយរោគខុស អាចធ្វើឱ្យអ្នកជំងឺទទួលបានការព្យាបាលមិនបានត្រឹមត្រូវដោយមិនត្រឹមតែខាតបង់លុយកាក់ តែអាចធ្វើឱ្យជំងឺជាក់ស្តែងកាន់តែធ្ងន់ធ្ងរផងដែរ។
#ត្រូវចងចាំ
ត្រូវចាំថាដើម្បីដឹងថាអ្នកជំងឺ មានជំងឺគ្រុនឈាម ឬអត់ ត្រូវធ្វើការពិនិត្យឈាមតាមរយៈ ៣វិធីខាងក្រោមនេះ៖
ទី១៖ ការមើលទៅលើគ្រាប់ឈាម (Hemogramme ) ដោយការរាប់គ្រាប់ឈាម ស ក្រហម និងប្លាកែត ដោយអ្នកជំងឺគ្រុនឈាមនឹងមានលទ្ធផលពិនិត្យដូចជា៖
- ធ្លាក់ចុះនៃចំនួនប្លាកែត (តែជំងឺឆ្លងបង្កដោយវីរុស និងបាក់តេរីមួយចំនួនក៏បង្កឱ្យមានការធ្លាក់ចុះនៃប្លាកែតផងដែរ)
- កើនឡើងនៃចំនួន Hematocrit (កំហាប់ឈាមខាប់) ដោយសារមេរោគគ្រុនឈាមអាចបង្កឲ្យមានការហូរចេញនៃប្លាស្មា ដែលធ្វើឲ្យបាត់បង់បរិមាណទឹករបស់ឈាមដែលស្ថិតនៅក្នុងសរសៃឈាម
- គ្រាប់ឈាមសមានការធ្លាក់ចុះខ្លាំង ។
២. មើលលើឧបករណ៍តេស្តឈាមប្រភេទ NS1៖ ជាការវាស់បរិមាណ អង់ទីហ្សែន NS1 នៅក្នុងឈាមរបស់អ្នកជំងឺ តែតេស្តនេះនឹងិនបង្ហាញលទ្ធផលទេ ប្រសិនបើអ្នកជំងឺចេញរោគសញ្ញាបាន ៤ ឬ ៥ថ្ងៃ រួចមកហើយនោះ ដោយសារតែ អង់ទីហ្សែនដែលបញ្ចេញដោយមេរោគបានបាត់ទៅវិញទៅហើយ។
៣. ឧបករណ៍តេស្តឈាមប្រភេទ Serology antibod៖ តេស្តប្រភេទនេះនឹងបង្ហាញពីការកើតជំងឺជាក់ស្តែងក្នុងពេលបច្ចុប្បន្ន រួមទាំងអាចរកឃើញថាអ្នកជំងឺធ្លាប់មានប្រវត្តិកើតជំងឺគ្រុនឈាមពីមុនមក ឬក៏អត់ទៀតផង តាមរយៈការមើលអង់ទីក IgM ឬ IgG ។ តែតេស្តនេះរាងមានតម្លៃថ្លៃបន្តិច។
ដូច្នេះដើម្បីចៀសវាងការពិនិត្យ និងវិនិច្ឆយរោគខុស អ្នកត្រូវទាមតារឱ្យគ្រូពេទ្យធ្វើការពិនិត្យឈាមរបស់អ្នកឱ្យបានត្រឹមត្រូវ ឬសាកសួរលទ្ធផលពិនិត្យឱ្យបានហ្មត់ចត់ ចៀសវាងការព្យាបាលខុស ដែលនាំឱ្យមានបញ្ហាសុខភាពផងដែរ។
ដោយសព្វថ្ងៃមានអ្នកជំងឺ និងគ្រួសារអ្នកជំងឺជាច្រើនកើតការកើតទុក្ខ មិនសុខចិត្ត ដោយមានគ្រូពេទ្យមួយចំនួនតូចបានធ្វើការវិនិច្ឆយរោគខុស ថាកើតជំងឺគ្រុនឈាម តែក្រោយការព្យាបាលប៉ុន្មានថ្ងៃនៅតែមិនជាសះស្បើយឡើយ ថែមទាំងរឹតតែធ្ងន់ធ្ងរ។ តាមរយៈប្រិយមិត្តរបស់ Sad Life មួយរូបសុំមិនបញ្ចេញឈ្មោះបានប្រាប់មកក្រុមការងារ Saf Life ផងដែរថា «កូនខ្ញុំឈឺធម្មតាសោះ តែគ្រូពេទ្យថាមានជំងឺគ្រុនឈាម ទម្រាំដឹងខ្លួនអស់លុយមិនស្ទើរ» « ប្អូនជីដូនមួយខ្ញុំអត់ក្តៅខ្លួន តែឈឺតែពោះសោះ ស្រាប់តែពេទ្យទាមទារឱ្យដាក់សឺរ៉ូម ៤ថ្ងៃ ថាកើតគ្រុនឈាម »។
ទោះជាព័ត៌មានដែលទទួលបានជាការពិត ឬមិនពិតក្តី យើងខ្ញុំសូមសំណូមពរឱ្យគ្រូពេទ្យក្នុងក្របខណ្ឌទាំងអស់យកចិត្តទុកដាក់ឱ្យបានខ្ពស់បំផុតទៅលើការវិនិច្ឆយ និងព្យាបាលលើអ្នកជំងឺ ដើម្បីបង្ការកុំឱ្យមានការព្យាបាលខុសទៅលើអ្នកជំងឺតទៅទៀត ហើយអ្នកជំងឺ ឬគ្រួសារអ្នកជំងឺខ្លួនឯងសូមធ្វើការផ្ទៀងផ្ទាត់លទ្ធផល និងសាកសួរឱ្យបានលម្អិតអំពីជំងឺគ្រុនឈាមផងដែរ៕
រក្សាសិទ្ធអត្ថបទ៖ Knongsrok
ព័ត៌មានថ្មីៗ
