មិនចាំបាច់តែស្អាតពេកទេ នារីៗឲ្យតែមាន ៣ ចំណុចនេះ បុរសស្រលាញ់ដកចិត្តមិនរួច
ជាទូទៅបុរសមុននឹងដាក់ចិត្តស្រលាញ់នរណាម្នាក់ បើស្ថិតក្នុងវ័យចាស់ទុំ ជឿថាមានហេតុផលច្រើនណាស់ ពោលមិនមែនចេះតែឃើញនារីណាស្អាត ហើយដាក់ចិត្តទៅស្រលាញ់គេនោះទេ។
មនុស្សស្រីក៏ដូចគ្នារមែងមានចំណុចពិសេសជាច្រើនទៀត ក្រៅពីកត្តាសម្រស់ រហូតដល់នារីខ្លះនាងមិនបានប្រើប្រាស់សម្រស់ជាធំ ក្នុងការឆក់យកបេះដូងបុរសណាម្នាក់ឡើយ ផ្ទុយទៅវិញនាងមានកត្តាគួរឲ្យចាប់អារម្មណ៍ផ្សេងទៀត ដែលធ្វើឲ្យបុរសម្នាក់នោះដកចិត្តមិនរួចពីនាង។
សម្រាប់មនុស្សស្រី យើងសូមណែនាំ ៣ ចំណុចធំៗ ដែលអ្នកគួរតែមាន ហើយចំណុចទាំងនោះ ក៏ជឿថាមនុស្សប្រុសជាច្រើនរមែងពេញចិត្តខ្លាំងផងដែរ៖
នារីដែលចេះប្រើប្រាស់ជីវិតឲ្យមានក្តីសុខ
មនុស្សប្រុសចាស់ទុំគេមិនសម្លឹងតែលើសម្រស់របស់នារីម្នាក់នោះទេ ផ្ទុយទៅវិញគេសិក្សាយ៉ាងស៊ីជម្រៅថា តើនារីរូបនោះចេះប្រើប្រាស់ដំណើរជីវិតបែបណាខ្លះ ហើយនាងមានគោលដៅច្បាស់លាស់ដែរឬទេ? ជាការពិតបុរសចូលចិត្តនៅក្បែរមនុស្សស្រី ដែលរមែងគិតពីភាពវិជ្ជមាន និងរស់នៅដោយសាមញ្ញ តែអាចបង្កើតក្តីសុខសម្រាប់ជីវិត។
នារីដែលចេះដឹងទុក្ខធុរៈមនុស្សជុំវិញខ្លួន
នារីដែលមិនចេះគិតពីទុក្ខធុរៈមនុស្សជុំវិញខ្លួន ឬនិយាយឲ្យស្រួលស្តាប់ទៅ គឺគិតតែក្តីសុខសម្រាប់ខ្លួនឯង ក៏មិនមែនជាប្រភេទនារីក្នុងក្តីស្រមៃរបស់មនុស្សប្រុសទូទៅដែរ ហើយប្រសិនគេស្រលាញ់អ្នក ក៏គេទទួលយកបានតែមួយឆាវដូចគ្នា។ បុរសចូលចិត្តមនុស្សស្រី ដែលទន់ភ្លន់ ចេះយោគយល់ដល់មនុស្សជុំវិញខ្លួន និងមិនមានចរិតក្រអឺតក្រទម។
នារីដែលឲ្យតម្លៃដល់គ្រួសាររបស់ស្វាមី
ជារឿងចុងក្រោយដែលចាំបាច់បំផុតសម្រាប់បុរសដែលមានភាពឆ្លាតវៃ មុនសម្រេចចិត្តចាប់ដៃយកនារីណាម្នាក់មកធ្វើជាគូជីវិត។ ជាទូទៅពួកគេមិនងាយរំលងចំណុចទី ៣ នេះទេ ពោលគឺត្រូវការនារីដែលស្រលាញ់គ្រួសារ ឬម្តាយក្មេកឪពុកក្មេកដូចជាសាច់បង្កើតរបស់ខ្លួនឯង ហើយមនុស្សស្រីប្រភេទនេះ គឺរមែងធ្វើឲ្យមនុស្សប្រុសមានអារម្មណ៍កក់ក្តៅ និងសុវត្ថិភាពបំផុតពេលក្លាយជាគ្រួសារតែមួយ៕
ព័ត៌មានថ្មីៗ
